Ads by Exprox

ޚަބަރު

މިހާތަނަށް 24 ގަޑިއިރުގެ ތެރޭގައި އެންމެ ގިނައިން ވާރޭވެހުނު ރަށަކަށް ކ. ދިއްފުށި

މިހާތަނަށް 24 ގަޑިއިރުގެ ތެރޭގައި އެންމެ ގިނައިން ވާރޭވެހުނު ރަށަކަށް ކ. ދިއްފުށި

ވާރޭ ވެހުމުގެ ސަބަބުން މާލޭގެ މަގުމަތީގައި ފެން ބޮޑުވެފައި---

މިފްތާޙް މުޙައްމަދު

މިފްތާޙް މުޙައްމަދު

02 މާރިޗު 2025، 12:15

02 މާރިޗު 2025، 12:15

މޯލްޑިވްސް މީޓިއޮރޮލޮޖިކަލް ސަރވިސަސް (މެޓް އޮފީސް)ގެ ރެކޯޑުތައް ދައްކާ ގޮތުން، 24 ގަޑިއިރުގެ ތެރޭގައި މިހާތަނަށް އެންމެ ގިނައިން ވާރޭވެހިފައިވާކަމަށް ރެކޯޑު ކުރެވިފައިވަނީ އިއްޔެ މާލެ އަތޮޅު ދިއްފުއްޓަށެވެ.

މެޓް އޮފީހުން އާންމުކޮށްފައިވާ ތަފާސް ހިސާބުތައް ދައްކާ ގޮތުން، އިއްޔެގެ ހެނދުނު 8:00 އިން މިއަދު ހެނދުނު 8:00އަށް އެ ރަށަށް ވަނީ 296.1 މިލިމީޓަރުގެ ވާރޭ ވެހިފައެވެ. 

24 ގަޑިއިރުގެ ތެރޭގައި އެންމެ ގިނައިން ވާރޭ ވެހިފައިވާކަމަށް މީގެ ކުރިން ރެކޯޑު ކުރެވިފައިވަނީ ހއ. ކެލާއަށެވެ.  

24 ގަޑިއިރުގެ ތެރޭގައި އެންމެ ގިނައިން ވާރޭ ވެހެފައިވާ ރަށްތައް:

  • 02 މާރިޗު 2025: ކ. ދިއްފުށި، 296.1 މިލިމީޓަރުގެ ވާރޭ
  • 12 އޮގަސްޓު 2024: ހއ. ކެލާ، 231.5 މިލިމީޓަރުގެ ވާރޭ
  • 05 ޑިސެންބަރު 2018: މާލެ، 228.9 މިލިމީޓަރުގެ ވާރޭ
  • 24 ނޮވެންބަރު 2015: ސ. ގަން، 228.4 މިލިމީޓަރުގެ ވާރޭ
  • 09 ޖުލައި 2002: ގދ. ކާޑެއްދޫ، 219.8 މިލިމީޓަރުގެ ވާރޭ

ރާއްޖެއަށް މިހާރު ކުރަމުންދާ ވިއްސާރައިގައި މާލެއާއި އަތޮޅުތެރޭގެ ގިނަ ރަށްރަށުގައި ފެން ބޮޑުވުމުގެ ސަބަބުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އަންނަނީ ފެން ހިންދުމުގައި ހަރަކާތްތެރިވަމުންނެވެ. 

ފާއިތުވި 24 ގަޑިއިރުގެ ތެރޭގައި ކ. ދިއްފުއްޓަށްފަހު ދެން އެންމެ ގިނައިން ވާރޭވެހިފައިވަނީ ހުޅުމާލެއަށެވެ.

ފާއިތުވި 24 ގަޑިއިރު އެންމެ ގިނައިން ވާރޭވެހެފައިވާކަމަށް ރެކޯޑު ކުރެވިފައިވާ ރަށްތައް:

  • ކ. ދިއްފުށި: 296.1 މިލިމީޓަރުގެ ވާރޭ
  • ހުޅުމާލެ: 185.2 މިލިމީޓަރުގެ ވާރޭ
  • ފ. ނިލަންދޫ: 178.2 މިލިމީޓަރުގެ ވާރޭ
  • ހުޅުލެ: 177.2 މިލިމީޓަރުގެ ވާރޭ
  • ބ. ގޮއިދޫ: 166.3 މިލިމީޓަރުގެ ވާރޭ

 އިއްޔެ ހަވީރުން ފެށިގެން ރޭ ފަތިސް ވަންދެން މެދުނުކެނޑި ބޯކޮށް ވާރޭވެހި އަދި ބައެއް ސަރަހައްދު ތަކުގައި ފެންބޮޑުވެ، އެކަމުގެ ސަބަބުން ވަރަށް ގިނަ ރައްޔިތުންނަށް ދަތިވެ، ތަކުލީފުތަކެއް ލިބިފައިވާތީ މިއަދަކީ ސަރުކާރުގެ ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ހަމަޖައްސަވާފައެވެ.

މި ލިޔުން ކިޔާލުމުން

Ads by MSS