"ހުވަން" ލޯންޗުން ދަތުރުކުރި މީހުން ސަލާމަތްކުރުމުގައި ފުލުހުން ކުރެއްވި މަސައްކަތަށް ޝުކުރު ދަންނަވައިފި

"ހުވަން" ނަމަކަށް ކިޔާ ލޯންޗުން ދަތުރުކުރި މީހުން ސަލާމަތްކުރުމުގައި ފުލުހުން ކުރެއްވި މަސައްކަތަށް، ކޮމިޝަނަރ އޮފް ޕޮލިސް، ޢަލީ ޝުޖާއު ފޯނުން ގުޅުއްވައި ޝުކުރު ދަންނަވައިފިއެވެ.

މި ހާދިސާގެ ރިޕޯޓު ފުލުހުންނަށް ލިބިފައިވަނީ މިއަދު ހެނދުނު 7:57 ހާއިރެވެ. އޭރު މި ލޯންޗު ދަތުރުކުރަމުން ދިޔައީ އދ. ދިގުރަށުން މާލެ އަށެވެ. އަދި އޭރު އޭގައި 45 ފަސިންޖަރުންނާއި 3 ފަޅުވެރިން ތިއްބެވެ. މީގެ ތެރޭގައި 4 ކުޑަކުދިން ވެސް ހިމެނެއެވެ.

ކޮމިޝަނަރގެ މެސެޖުގައި ވިދާޅުވީ، ރޯދަމަހުގެ ހެނދުނުގެ ވަގުތެއްގައި އެ ހާދިސާ ރިޕޯޓު ކުރުމާއެކު، އެކަމަށް އަވަސް އިޖާބައެއް ދެއްވައި، އޭގެން ދަތުރުކުރި އެންމެން ސަލާމަތްކޮށްފައިވާތީ، އެ މަސައްކަތުގައި ބައިވެރިވި ހުރިހާ އޮފިސަރުންނަށް ޝުކުރު އަދާކުރާ ކަމަށާއި، އަދި އެ މަސައްކަތާމެދު ފަޚުރުވެރިވާ ކަމަށެވެ. 

ކޮމިޝަނަރގެ އިތުރުން، މި ހާދިސާއާ ގުޅިގެން ފުލުހުންގެ ލީޑަރޝިޕްގެ އެހެން ބައެއް ބޭފުޅުންވެސް، މި އޮޕަރޭޝަންގައި ފުލުހުން ޢަމަލުކުރެއްވެވި ގޮތަށް ތަޢުރީފް ކުރެއްވެވިއެވެ. 

އެގޮތުން ޑެޕިއުޓީ ކޮމިޝަނަރ ފަރުހާދު ފިކުރީ ވިދާޅުވީ، މި އޮޕަރޭޝަންގައި ފުލުހުންގެ އަވަސް ނިންމުންތަކަކީ، އެ ފަރާތްތަކުގެ އިހްލާސްތެރި މަސައްކަތުގެ ހެއްކެއް ކަމަށެވެ.

މީގެ އިތުރުން، ޑެޕިއުޓީ ކޮމިޝަނަރ އިސްމާޢީލް ނަވީން ވިދާޅުވީ، މި ލޯންޗުން ދަތުރުކުރި އެންމެން ސަލާމަތް ކުރެވުނީ، އޮޕަރޭޝަންގެ ކޯޑިނޭޝަން ދިޔަލެއް ފުރިހަމަކަމުން ކަމަށެވެ.

މި އޮޕަރޭޝަންގައި އާންމު ރައްޔިތުންގެ ދައުރު ފާހަގަކުރައްވައި، ކަނޑުވި މީހުން ދިގުރަށަށް އަނބުރާ ގެންދިއުމުގައި އެހީތެރިވި ލޯންޗުގެ މަސައްކަތް ފާހަގަކުރައްވައި ރީޖަން ކޮމާންޑަރ އެ ބޭފުޅުންނަށް ވަނީ ޝުކުރު އަދާކުރައްވާފައެވެ.

ފުލުހުން ދަނީ މި ހާދިސާ ހިނގިގޮތުގެ ތަޙުޤީޤެއް ހިންގަމުންނެވެ.