ދުނިޔެ / ޚަބަރު

ޣައްޒާއަށް ކާބޯތަކެއްޗާއި އިންސާނީ އެހީ ވެއްދުން އަނެއްކާ ވެސް މަނާކޮށްފި

ޣައްޒާއަށް ކާބޯތަކެއްޗާއި އިންސާނީ އެހީ ވެއްދުން އަނެއްކާ ވެސް މަނާކޮށްފި

ކާބޯތަކެތި ނުލިބިގެން ބަނޑުހައިހޫނުކަން ތަޙައްމަލު ކުރންޖެހިފައިތިބި މީހުން---

މިފްތާޙް މުޙައްމަދު

މިފްތާޙް މުޙައްމަދު

02 މާރިޗު 2025، 09:51

02 މާރިޗު 2025، 09:51

ޣައްޒާއަށް ކާބޯތަކެއްޗާއި އިންސާނީ އެހީ ވެއްދުން އިޒްރޭލުން އަނެއްކާ ވެސް މަނާކޮށް، އެހީގެ ޓްރަކްތައް ޣައްޒާއަށް ވަނަނުދީ ހިފަހައްޓައިފިއެވެ.

އިސްރޭލުގެ މި ލާއިންސާނީ އަމަލާ ގުޅިގެން، އެ ޤައުމުގެ ޙައްދު ފަހަނައަޅާފައިވާ ބޮޑުވަޒީރު، ބެންޖަމިން ނަތަންޔާހޫގެ އޮފީހުން ބުނީ، އެހީގެ ޓްރަކްތައް ޣައްޒާއަށް ވަނުން ހުއްޓުވީ، ފަލަސްތީނާ ދެމެދު ހަނގުރާމަ ހުއްޓާލުމަށް ވެވުނު އެއްބަސްވުމުގެ ފުރަތަމަ މަރުހަލާ ނިމުމުން ކަމަށާއި، އަދި ދެވަނަ މަރުހަލާއަށް ދިޔުމާމެދު ހަމާސްއާއެކު އެއްބަސްވުމަކަށް ނާދެވުމުގެ ސަބަބުން ކަމުގައެވެ.

ނަމަވެސް، ހަނގުރާމަ ހުއްޓާލުމުގެ ދެވަނަ މަރުހަލާއަށް ޙަޤީޤަތުގައި ހުރަސްއެޅީ ވެސް އިޒްރޭލުންނެވެ. އިޒްރޭލުން ވަނީ ހަމާސްގެ ބެލުމުގެ ދަށުގައި ތިބި އަސީރުން އެއްކޮށް މިނިވަން ކުރުމަށް ގޮވާލާފައެވެ. ނަމަވެސް އެއްބަސްވުމުގައި ބުނާ ގޮތުން، ބާކީ ތިބި އަސީރުންގެ ތެރެއިން އެއް ބަޔަކު ދެވަނަ މަރުހަލާގައި ދޫކޮށްލަން ޖެހެއެވެ. އަދި ހުރިހާ އަސީރުން އެއްކޮށް މިނިވަންކުރާނީ ހަމަލާތައް ދާއިމީ ގޮތަކަށް ހުއްޓާލައި، އިސްރާއީލުގެ ހުރިހާ ސިފައިން ޣައްޒާއިން ބޭލުމުންކަމަށް އެއްބަސްވުމުގައިވެއެވެ.

މީގެ އިތުރުން، އިޒްރޭލުން މިހާރު އަންނަނީ ޣައްޒާއިން އެއްކޮށް ފޭބުމަށް ވެސް ދެކޮޅު ހަދަމުންނެވެ. އަދި މި ސަބަބުތަކާހެދި، ހަމާސްއިން ވަނީ ދެވަނަ މަރުހަލާގެ އެއްބަސްވުމަކަށް ދެކޮޅު ހަދާފައެވެ.

ހަނގުރާމަ ހުއްޓާލުމުގެ ފުރަތަމަ މަރުހަލާ މިހާރު ނިމުމަކަށް އައިސްފައިވާ ނަމަވެސް، މި މަރުހަލާގައި ވެސް އިޒްރޭލުން ވަނީ ގިނަ ކަންކަމުގައި އޮޅުވާލާފައެވެ. އެގޮތުން ފުރަތަމަ މަރުހަލާގައި މިނިވަން ކުރަންޖެހޭ ފަލަސްތީނުގެ 1900 ވަރަކަށް އަސީރުންގެ ތެރެއިން ތިރީހަކަށް މީހުން މިނިވަންކުރުމަށްވެސް އިސްރާއީލުވަނީ އެންމެ ފަހު ވަގުތު ދެކޮޅު ހަދައި އެއްބަސްވުމާ ޚިލާފުވެފައެވެ.

މީގެ އިތުރުން، ފުރަތަމަ މަރުހަލާގައި ޣައްޒާއަށް ވެއްދުމަށް އެއްބަސްވި ބޭހާއި ހޮސްޕިޓަލްތަކަށް ބޭނުންވާ މެޑިކަލް ސާމާނާއި ވަގުތީ ހޮސްޕިޓަލް ހެދުމަށް ބޭނުންވާ ފޭލިގެތައް ޣައްޒާއަށް ވެއްދުމަށް ވެސް އިޒްރޭލުން ވަނީ ދެކޮޅުހަދާފައެވެ.

ކަންމިހެން އޮތް ނަމަވެސް، ޣައްޒާގެ ރައްޔިތުން ބުނަމުން އަންނަނީ، މަރުވިޔަސް ޣައްޒާ ދޫކޮށް ނުދާނެކަމަށެވެ. 

އެހީގެ ޓްރަކްތައް ޣައްޒާއަށް ވަނަނުދީ ހިފެހެއްޓުމުން ޣައްޒާގެ ރައްޔިތުންގެ ގިނަ ބަޔަކު އަނެއްކާވެސް ހައިހޫނުކަން ތަހައްމަލް ކުރަންޖެހޭނެކަމަށް އދ.ގެ އުންރުވާ ޖަމާއަތުން ބުނެއެވެ.

މި ލިޔުން ކިޔާލުމުން

Ads by MSS