ސޮސިއެދާދު ބަލިކޮށް ބާސެލޯނާ އަނބުރާ ލީގު އެއްވަނައަށް

ސްޕެނިޝް ލަ ލީގާގައި ބާސެލޯނާ އިން ރެއާލް ސޮސިއެދާދު 4-0 އިން ބަލިކޮށް، އަނބުރާ ލީގު އެއްވަނައަށް އަރައިފިއެވެ.

ބާސެލޯނާ އާއި ރެއާލް މެޑްރިޑް ފަހަތަށް ޖައްސާލުމަށްފަހު މި މަގާމުގައި ކުރިން އޮތީ، ހޮނިހިރު ދުވަހު އެތުލެޓިކް ކްލަބް 1-0 އިން ބަލިކުރުމަށްފަހު ތިން ޕޮއިންޓު ހޯދި އެތުލެޓިކޯ މެޑްރިޑެވެ.

ނަމަވެސް، ހެންސީ ފްލިކްގެ ޓީމުން މިވަނީ އެކަން ބަދަލުކޮށް، އެއް ޕޮއިންޓުގެ ލީޑަކާއެކު ލީގުގެ އެއްވަނައަށް އަރާފައެވެ. މި މެޗުގައި އެ ޓީމުގެ ގޯލުތައް ކާމިޔާބުކުރީ ޖެރާޑް މާޓިން އާއި މާކު ކަސާޑޯ އާއި ރޮނާލްޑް އަރައުހޯ އަދި ރޮބަޓް ލެވަންޑޯސްކީއެވެ.

މިހާރު ލީގުގެ 9 ވަނައިގައި އޮތް ސޮސިއެދާދު ވަނީ، މި ދެ ޓީމު މިދިޔަ ނޮވެންބަރު މަހު ބައްދަލުކުރިމެޗު 1-0 އިން ކާމިޔާބުކޮށް، އޭރު ލީގުގެ އެއްވަނައަށް ވެސް އަރާފައެވެ. އަދި ޔޫރޮޕާ ލީގުގެ ގަދަ-16ގައި މީގެ 3 ދުވަސް ފަހުން އެ ޓީމަށް ނިކުންނަން ޖެހޭނީ މެންޗެސްޓަރ ޔުނައިޓެޑާ ދެކޮޅަށެވެ.

ރޭގެ މެޗުގައި ސޮސިއެދާދަށް ކުރިމަތިވި އެންމެ ބޮޑު ގޮންޖެހުމަކަށްވީ، މެޗުގެ ކުރީކޮޅު އެ ޓީމުގެ ޑިފެންޑަރު، އެރިޓްޒް އެލުސްޓޮންޑޯއަށް ރަތް ކާޑު ދެއްކުމެވެ. އޭނާއަށް ރަތް ކާޑު ދައްކާފައިވަނީ މެޗުގެ 17 ވަނަ މިނެޓުގައި ޑެނީ އޮލްމޯއަށްކުރި ފައުލަކާ ގުޅިގެންނެވެ. 

އޭގެ 8 މިނެޓު ފަހުން ބާސެލޯނާއިން މެޗުގެ ލީޑު ނެގިއެވެ. މިއީ ލެމިން ޔަމާލްގެ މޮޅު ހުނަރު ދައްކާލުމަށްފަހު ޕެނަލްޓީ އޭރިއާގެ ތެރޭގައި ހުރި އޮލްމޯއަށް ޕާސްކޮށްލުމުން، އޮލްމޯ އެ ބޯޅަ ދިނީ ގޯލުގެ ވާތް ފަޅީގައި ހުރި ފުލް-ބެކް، މާޓިން އަށެވެ. އޭނާ އެ ބޯޅަ ގޯލަށް ފޮނުވާލީ އެއް ޓަޗުން ދުރުކަނަށެވެ.

އޭގެ 4 މިނެޓު ފަހުން އޮލްމޯ ގޯލަށް އަމާޒުކޮށް ފޮނުވާލި ބޯޅަ ގޯލުގެ ތެރެއަށް ވަނީ ކަސާޑޯގެ ފައިގަ ޖެހުމަށްފަހު، ގޯލުގެ ދަނޑީގަ ޖެހިފައެވެ.

ބާސެލޯނާއިން ތިންވަނަ ގޯލު ކާމިޔާބުކުރީ ދެވަނަ ހާފުގައެވެ. އެގޮތުން މެޗުގެ 56 ވަނަ މިނެޓުގައި ރަފީނިއާ ނަގައިދިން ކޯނަރަކުން މި ގޯލު ކާމިޔާބުކުރީ އަރައުހޯއެވެ. އަދި ބާސެލޯނާގެ ފަހު ގޯލަކީ އަރައުހޯ ގޯލަށް އަމާޒުކޮށް ފޮނުވާލި ބޯޅައެއްގައި ލެވަންޑޯސްކީ ފައިން ޖައްސާލުމުން، ސޮސިއެދާދުގެ ގޯލް ކީޕަރަށް މަތަނުކުރެވުނު ބޯޅައެކެވެ.