ފިލިޕީންސްގައި ހޫނުގެ ސަބަބުން ސްކޫލްތައް ބަންދުކޮށްފި

ފިލިޕީންސްގެ ވެރިރަށް މެނީލާގައި ހޫނުގެ ސަބަބުން ގިނަ ސްކޫލްތަކެއް ބަންދުކޮށްފިއެވެ.  ހޯމަ ދުވަހު ވެރިރަށުގެ ގާތްގަނޑަކަށް ދެބައިކުޅަ އެއްބައި ސްކޫލްތައް ބަންދުކުރި ކަމަށް އެ ގައުމުގެ އިސް އޮފިޝަލުން މަޢުލޫމާތު ދީފައިވެއެވެ.

ފިލިޕީންސްގެ ނޭޝަނަލް ވެދަރ ސަރވިސްއިން ނެރުނު އިންޒާރެއްގައި ބުނެފައިވަނީ މެނީލާއާއި އިތުރު ދެ ސަރަހައްދެއްގައި ހޫނުގެ މިންވަރު "ނުރައްކާތެރި" ފެންވަރަށް އަރާނެ ކަމަށެވެ. އަދި މިފަދަ ހޫނުގައި ގިނަ ވަގުތު އުޅުމުން ހޫނުގެ ސަބަބުން ގަޔަށް އަސަރުކޮށް ވަރުބަލިވުން އެކަށީގެންވާ ކަމަށް އިންޒާރުގައި ބުނެފައިވެއެވެ.

މެނީލާގެ އިތުރުން އަދި 6 ޑިސްޓްރިކްޓެއްގައި ސްކޫލްތައް ބަންދުކޮށްފައިވާ ކަމަށް ވެއެވެ. މިގޮތުން މަނީލާގެ މަލާބޯން ޑިސްޓްރިކްޓްގައި 42 ސްކޫލެއްގެ 68،000 އަށްވުރެ ގިނަ ދަރިވަރުންނަށް މި ބަންދުގެ އަސަރުކުރާނެ ކަމަށް އެޑިއުކޭޝަން ޑިޕާޓްމަންޓްގެ އޮފިޝަލެއް ކަމަށްވާ އެޑްގަރ ބޮނިފާސިއޯ ވިދާޅުވިއެވެ.

މަނީލާގެ ސަރަހައްދުގައި 2.8 މިލިއަނަށްވުރެ ގިނަ ދަރިވަރުން ކިޔަވަމުންދާ ކަމަށް އެޑިއުކޭޝަން ޑިޕާޓްމަންޓްގެ ތަފާސްހިސާބުތަކުން ދައްކައެވެ. މިއަދު މެނީލާގެ ފިނިހޫނުމިން 33 ޑިގްރީ ސެލްސިއަސްއަށް އަރާނެ ކަމަށް ލަފާކުރެވުނު ނަމަވެސް، ރައްކާތެރިކަމުގެ ގޮތުން ސްކޫލްތައް ބަންދުކުރުމަށް ނިންމާފައިވާ ކަމަށް ވެއެވެ.

ފާއިތުވި އަހަރުގެ އޭޕްރީލް މަހުގެ 27 ވަނަ ދުވަހު މެނީލާގެ ފިނިހޫނުމިން 38.8 ޑިގްރީ ސެލްސިއަސްއަށް އަރާފައިވެއެވެ. މިއީ މެނީލާގައި މިހާތަނަށް ރެކޯޑުކުރެވިފައިވާ އެންމެ މަތީ ފިނިހޫނުމިނެވެ.

ދުނިޔޭގެ އެކި ކަންކޮޅުތަކުގައި މޫސުމަށް އަންނަމުންދާ ބަދަލުތަކާ ގުޅިގެން ސްކޫލްތަކަށް ދަތިތަކާ ކުރިމަތިވަމުންދާ ކަމަށް ޔުނިސެފްއިން ފާހަގަކޮށްފައިވެއެވެ. މިގޮތުން 2023 ވަނަ އަހަރު 85 ގައުމެއްގައި 242 މިލިއަން ކުދިންގެ ތަޢުލީމަށް އަސަރުކޮށްފައިވާ ކަމަށް ޔުނިސެފްއިން ބުނެފައިވެއެވެ.