ދުނިޔެ
ޖަޕާނުގައި 30 އަހަރުގެ ތެރޭގައި ފެނުނު އެންމެ ބޮޑު އަލިފާނުގެ ހާދިސާ: 1,700 އަށްވުރެ ގިނަ ފަޔަރ ފައިޓަރުން މަސައްކަތުގައި

ޖަޕާނުގައި 30 އަހަރުގެ ތެރޭގައި ފެނުނު އެންމެ ބޮޑު އަލިފާނުގެ ހާދިސާ
ޖަޕާނުގެ އިވާޓޭ ސަރަޙައްދުގައި ފެށުނު ބޮޑު އަލިފާނުގެ ހާދިސާއާ ގުޅިގެން 1,700 އަށްވުރެ ގިނަ ފަޔަރ ފައިޓަރުން މިހާރު ވަނީ އަލިފާން ނިއްވުމުގެ މަސައްކަތުގައި ބައިވެރިވެފައެވެ. މިއީ ޖަޕާނުގައި ފާއިތުވި 30 އަހަރުގެ ތެރޭގައި ފެނުނު އެންމެ ބޮޑު އަލިފާނުގެ ހާދިސާ ކަމަށް ރަސްމީ ފަރާތްތަކުން ބުނެފައިވެއެވެ.
ހޯމަ ދުވަހު ފަޔަރ އެންޑް ޑިޒާސްޓަރ މެނޭޖްމަންޓް އޭޖެންސީން ހާމަކުރި ގޮތުގައި، އޮފުނާޓޯ ސިޓީ ކައިރީގައި ފެށުނު މި އަލިފާނުގެ ހާދިސާގައި މިހާތަނަށް 2,100 ހެކްޓަރުގެ ސަރަޙައްދެއް ވަނީ އަނދައިގެން ގޮސްފައެވެ. މި ހާދިސާ ފެށުނީ ބުރާސްފަތި ދުވަހުއެވެ.
މި ހާދިސާއާ ގުޅިގެން 4,600 އަށްވުރެ ގިނަ މީހުން ވަނީ ސަލާމަތީ ފިޔަވަޅެއްގެ ގޮތުން އެ ސަރަޙައްދުން ފޮނުވާލާފައެވެ. އޭގެ ތެރެއިން 2,000 މީހުން ވަނީ ރައްޓެހިންނާއި ގާތްތިމާގެ މީހުންގެ ގާތަށް ދިޔުމަށް ނިންމާފައެވެ. އަދި 1,200 އަށްވުރެ ގިނަ މީހުން ވަނީ ވަގުތީ މަރުކަޒުތަކަށް ބަދަލުވެފައެވެ.
މި ހާދިސާގައި މިހާތަނަށް އެކަކު ވަނީ މަރުވެފައެވެ. އަދި 84 އިމާރާތަށް ގެއްލުން ލިބިފައިވާ ކަމަށް ލަފާކުރެވެއެވެ. އަލިފާން ނިއްވުމުގެ މަސައްކަތުގައި ޖަޕާނުގެ 14 ސަރަޙައްދަކުން ފަޔަރ ފައިޓަރުން ބައިވެރިވެފައިވާއިރު، 16 ހެލިކޮޕްޓަރު ވެސް މި މަސައްކަތުގައި ބޭނުންކުރަމުންދެއެވެ.
މި ހާދިސާ ހިނގީ ޖަޕާނުގައި ވިއްސާރައިގެ މޫސުން ދަށްވެ، ފާއިތުވި އަހަރު ރެކޯޑު ހޫނު މޫސުމެއް ފެނުމަށްފަހުގައެވެ. އޮފުނާޓޯގައި ފެބްރުއަރީ މަހު ވެހުނު ވާރޭގެ މިންވަރު ވަނީ 1967 ވަނަ އަހަރުގެ ރެކޯޑު ވެސް ބަދަލުކޮށްލާފައެވެ.