މޯލްޑިވިއަންގެ ފުރަތަމަ ވައިޑްބޮޑީގެ ދަތުރުތަކެއް ކޮޗިންއާއި ޓްރިވަންޑްރަމަށް!

މޯލްޑިވިއަންގެ ފުރަތަމަ ވައިޑްބޮޑީ، އޭ330 މަތިންދާބޯޓުގެ ދަތުރުތަކެއް އިންޑިއާގެ  ކޮޗިންއާއި ޓްރިވަންޑްރަމަށް ކޮށްފިއެވެ.  

މޯލްޑިވިއަނުން ވިދާޅުވީ، މި ދަތުރުތައް ކޮށްފައިވަނީ މި ދުވަސްވަރަކީ ޗުއްޓީ ދުވަސްވަރެއްކަމުން ދަތުރުތަކުގެ ޑިމާންޑް ބޮޑުވުމާއި ގުޅިގެން ކަމަށެވެ. 
އިންޑިއާގެ ޓްރިވަންޑްރަމާއި ކޮޗިންއަކީ، ދިވެހިރާއްޖޭގެ ގިނަ ޢަދަދެއްގެ ރައްޔިތުންނެއް ބޭސް ފަރުވާ ހޯދުމަށްޓަކައި ގޮސް އުޅޭ ދެ ސިޓީއެކެވެ. މޯލްޑިވިއަނުން ވިދާޅުވީ، މީގެ ކުރިން ކޮޗިންއާއި ޓްރިވަންޑަރަމަށް ދަތުރުކުރަނީ މޯލްޑިވިއަންގެ އޭޓީއާރު 72 މަރުކާގެ ބޯޓާއި އެއަރބަސް އޭ320 މަރުކާގެ ބޯޓު ކަމަށެވެ. މީގެ އިތުުރުން މޯލްޑިވިއަނުން ވިދާޅުވީ، ކުރިއަށް އޮތް ތަނުގައިވެސް ދަތުރުކުރާ މީހުންގެ ޢަދަދު އިތުރުވެ، ޑިމާންޑް ބޮޑުވާނަމަ އޭ330 މަތިންދާބޯޓުގައި މީހުން އުުފުލާނެ ކަމަށެވެ. 
މިދިއަ ޖަނަވަރީ މަހުގެ ތެރޭގައި މޯލްޑިވިއަނަށް ގެނައި މި ވައިޑް ބޮޑީ މަތިންދާބޯޓަކީ 264 މީހުންގެ ޖާގައިގެ މަތިންދާބޯޓެކެވެ. އެހެންކަމުން، އެ އެއަރލައިނުން ވަނީ އެ އެއަރލައިންގެ ސީދާ ދަތުރުތައް ޗައިނާގެ 3 މަންޒިލަކަށް ފަށައިފައެވެ.