ކުޅިވަރު
އައިސީސީ ޗެމްޕިއަންސް ޓްރޮފީ: ސެމީގެ މެޗުތައް ޔަގީންވެއްޖެ

ނިއުޒީލޭންޑު ބަލިކުރުމަށްފަހު އިންޑިއާއިން އުފާފާޅުކުރަނީ، ފޮޓޯ: އޭއެފްޕީ
ހުލާސާ
އައިސީސީ ޗެމްޕިއަންސް ޓްރޮފީ ސެމީ ފައިނަލް މެޗުތައް:
އިންޑިއާ - އޮސްޓްރޭލިއާ
ސައުތު އެފްރިކާ - ނިއުޒީލޭންޑު
އައިސީސީ ޗެމްޕިއަންސް ޓްރޮފީގައި ސެމީ ފައިނަލް ކުޅޭ ޓީމުތައް ޔަގީންވެއްޖެއެވެ.
އެގޮތުން ގްރޫޕް-އޭގެ ފަހު މެޗުގައި އިންޑިއާއިން ނިއުޒީލެންޑު 44 ލަނޑުން ބަލިކޮށް، ގްރޫޕްގެ އެއްވަނަ ހޯދުމުން، ސެމީގައި އިންޑިއާ ބައްދަލު ކުރަންޖެހޭނީ ގްރޫޕް-ބީގެ ދެވަނައަށް ދިޔަ އޮސްޓްރޭލިއާއާއެވެ. އަނެއްކޮޅުން ނިއުޒީލޭންޑު ބައްދަލުކުރަން ޖެހެނީ ގްރޫޕް-ބީގެ އެއްވަނައަށް ދިޔަ ސައުތު އެފްރިކާއާއެވެ.
މުބާރާތުގައި އިންޑިއާ ކުޅޭ މެޗުތައް ދުބާއީގައި ކުޅެން ނިންމާފައި އޮތުމުން، އިންޑިއާ މެޗަށް ދުބާއީއަށް ދިޔަ ނިއުޒީލޭންޑަށާއި، ސެމީފައިނަލުގައި އިންޑިއާއާ ބައްދަލުކުރަން ޖެހިދާނެކަމަށް ބަލައި، ފަރިތަކުރުމަށް ދުބާއީއަށް ދިޔަ ސައުތު އެފްރިކާއަށް ޖެހޭނީ މުބާރާތް ރަސްމީކޮށް ބާއްވާ ޤައުމު ކަމުގައިވާ ޕާކިސްތާނަށް އެނބުރި ދާށެވެ.
އިންޑިއާގެ މެޗުތައް ޕާކިސްތާނުގައި ނުކުޅުމަށް އިންޓަނޭޝަނަލް ކްރިކެޓް ކައުންސިލް (އައިސީސީ) އިން ނިންމީ، އިންޑިޔާގެ ސަރުކާރުން އެ ގައުމުގެ ގައުމީ ޓީމު ޕާކިސްތާނަށް ނުފޮނުވަން ނިންމާފައިވާތީ އެވެ. މިހެންވެ ގްރޫޕް ސްޓޭޖުގައި އިންޑިޔާއާ ދެކޮޅަށް ކުޅެން ހުދު ޕާކިސްތާން ވެސް ޖެހުނީ ދުބާއީ އަށް ދަތުރުކުރާށެވެ.
މުބާރާތުގެ ސެމީ ފައިނަލްގެ ފުރަތަމަ މެޗުގައި ބައްދަލުކުރާނީ އިންޑިއާ އާއި އޮސްޓްރޭލިއާއެވެ. މި މެޗު އޮންނާނީ އަންގާރަ ދުވަހު ދުބާއީގައެވެ. ސެމީ ފައިނަލް ދެވަނަ މެޗުގައި ނިއުޒީލޭންޑާއި ސައުތު އެފްރިކާ ބައްދަލުކުރާ މެޗު އޮންނާނީ ބުދަ ދުވަހެވެ.
އަދި މުބާރާތުގެ ފައިނަލް މެޗު އޮންނާނީ އަންނަ އާދީއްތަ ދުވަހެވެ. އިންޑިޔާ ފައިނަލަށް ނުގޮސްފިނަމަ ފައިނަލް މެޗު ކުޅޭނީ ޕާކިސްތާނުގައެވެ.