ބްލޫ ލައިޓް؛ ޒުވާނުންގެ އެންމެ ބޮޑު ހަތުރު

އައްޔަށް ޕަރުވާނާ އަންނަ ފަދައިން، ޝައުޤުވެރިކަން އުފައްދާ އެއްޗިއްސާއި ކަންކަމަށް ދެވިހިފުމަކީ އިންސާނީ ޠަބީޢަތެވެ. އަލިފާނުގެ އައްޔަށް ޕަރުވާނާ ގާތް ވަނީ އެ ހޫނުގެ ސަބަބުން ފިހިގެން ވެއްޓޭނެކަމާމެދު ފަރުވާލެއް ނެތިއެވެ. ނަމަވެސް، ހަމަބުއްދި ދެއްވާ، ހެޔޮ ނުބައި ވަކިކޮށްދެއްވާފައި ތިބި އަޅުގަނޑުމެން އިންސާނުންގެ ޢަމަލުތަކުން، އަޅުގަނޑުމެންނަށް އަސަރު ކުރާ ގޮތްތައް ދެނެގަތުމަކީ ވަރަށް މުހިންމު ކަމެކެވެ.

21 ވަނަ ޤަރުގައި ކޮންމެ މީހެއްގެ ވެސް އެންމެ ގާތް އެކުވެރިޔަކީ އެމީހެއްގެ މޮބައިލް ފޯނެވެ. ދުވަހީ ތާވަލުގައި ހިމެނޭ ގިނަ ކަންތައްތަކަކީ، ފޯނުން، ނުވަތަ އެހެން ފަންނީ ވަސީލަތެއްގެ އެހީގައި ކުރެވޭ ކަންކަމަށް ވީއިރު، ދުވަހީ ތާވަލު ވެސް މިހާރު އޮންނަނީ ފޯނުގައެވެ. ވުމާއެކު، ގިނަ ވަގުތު ތަކެއް ސުމޭކު މަންސަތަކެއްގައި، ފަންނީ ވަސީލަތްތަކެއްގެ ކުރިމަތީގައި ހޭދަކުރުމަކީ، ކިތަންމެ ހައްޓަށް ފަސޭހަ ނަމަވެސް، ޞިއްޙަތަށް ގެއްލުން ހުރި ކަމެއްކަން ދެނެގަތުމަކީ ވަރަށް މުހިންމުކަމެކެވެ. 

ސްކްރީން ޓައިމް، ނުވަތަ ސުމޭކު ސްކްރީނެއްގެ ކުރިމަތީގައި ދުވާލެއްގެ މައްތަށް ހޭދަކުރެވޭ ވަގުތު އިތުރުވުމަކީ ފަހުގެ ޖީލުތަކުގައި ފެތުރެމުންދާ ބަލިމަޑުކަމެކެވެ. ސްކްރީނުތަކުން އަޅުގަނޑުމެންގެ ލޮލަށް އެޅޭ އަލި، ނުވަތަ ބްލޫ ލައިޓަކީ، ގިނަ އަދަދެއްގެ އެނަޖީ އޭގައި އެކުލެވޭ، ގިނަ ވަގުތުތަކެއް ވަންދެން މި އައްޔަށް ބަލައިފި ނަމަ، ޔޫވީ ލައިޓުން، ލޮލަށް ލިބޭހާ ގެއްލުންކުރާ ލައިޓެކެވެ. 

ލޮލުގައި، ޔޫވީ ލައިޓު ފަދަ ބައެއް ބާވަތްތަކުގެ އަލިން، ލޮލަށް ލިބޭ ގެއްލުން ކުޑަކުރާނެ އަމިއްލަ ދިފާއީ ނިޒާމުތައް ލައްވާފައިވެއެވެ. ނަމަވެސް، ބްލޫ ލައިޓަކީ، މިނިޒާމުތަކަށް ވެސް ލޯ ރައްކާތެރި ނުކުރެވޭނެ ފަދަ ނުރައްކާތެރި އައްޔެކެވެ. ބްލޫ ލައިޓަށް ގިނަ ވަގުތު ބެލުމުގެ ސަބަބުން ލޮލުގެ ފަހަތުގައިވާ މެކިއުލާ ހަލާކުވެ، އުމުރުން ދުވަސްވާ ވަރަކަށް ލޮލުގެ ފެނުން ގޯސްވަމުން ދިޔުމަށް މަގުފަހިވެއެވެ. 

ދިރާސާތަކުން ދައްކާގޮތުގައި، ގިނަ ވަގުތު ބްލޫ ލައިޓަށް ބަލާ މީހުންނަށް، އެސްފިޔަ ޖެހެ މިންވަރު މަދުވެއެވެ. މަދުން އެސްފިޔަ ޖެހޭކަމުގައި ވާނަމަ، ލޮލުގައި ހުންނަން ޖެހޭ ތެއްކަން ނުހިފެހެއްޓި، ލޮލަށް ގިނަ ގެއްލުންތަކެއް ލިބިގެންދާނެއެވެ. ލޮލުގައި ހުންނަންޖެހޭ ތެއްކަން އެއް މިނެއްގައި ނުހިފެހެއްޓިއްޖެ ނަމަ ތަފާތު ބާވަތްތަކުގެ ޖަރާސީމާއި، ގައިން ގަޔަށް އަރާ ލޮލުރޯގާ ފަދަ ބަލިތައް ޖެހުމަށް މަގުފަހިވެއެވެ. 

ސްކްރީނުގެ ކުރިމަތީގައި ވަގުތު ހޭދަކުރާ މިންވަރު އިތުރުވުމުން، އެންމެ ބޮޑު ގެއްލުމެއް ލިބެނީ މީހާގެ ނިދުމަށެވެ. ކޮންމެ މީހެއްގެ ވެސް އަމިއްލަ ނިދުމާއި ހޭލަމުގެ ނިޒާމެއް ސިކުނޑީގައި ރައްކާކުރެވިފައި ވާއިރު، މި ތާވަލާއި ވަގުތުތަކަށް ނިދި ފައްތަން އުނދަގޫވުމުގެ އެންމެ މައިގަނޑު ސަބަބަކީ، ބްލޫ ލައިޓް އެކްސްޕޯޜާ ގެ ސަބަބުން، ނިދުމަށް ބޭނުންވާ މެލަޓޯނިން ހޯމޯން މަދުވެ، ނިދި އަންނަ މިންވަރު ލަސްވެފައި މަދުވުމެވެ.  

ޕަރުވާނާ އައްޔަށް ގާތްވާހެން، އިންސާނުން ސްކްރީނެއްގެ ދޮށުގައި ގިނަ ވަގުތު ހޭދަކުރުމަކީ އެންމެ ބުއްދިވެރިގޮތް ނޫންކަން ދިރާސާތައް ހެކިދެއެވެ. މިގޮތުން ބްލޫ ލައިޓަށް އެކްސްޕޯޒް ވުމުގެ ސަބަބުން، ޔޫވީ ލައިޓުން ލޮލަށް، ލިބޭހާ ބޮޑެތި ގެއްލުން ލިބޭތީ އާއި، މި ލައިޓުގެ ސަބަބުން އުމުރުން ދުވަސްވާ ވަރަކަށް ލޮލުގެ ފެނުން ގޯސްވަމުން ދިޔުމަކީ ބްލޫ ލައިޓަށް ބެލުން މަދު ކުރަންވީ މައިގަނޑު ސަބަބުތަކެވެ. ހަމައެހެންމެ، ބްލޫލައިޓުގެ ސަބަބަން ލޮލުގައި ހުންނަންޖެހޭ ތެއްކަން ނުހިފެހެއްޓި، ގައިންގަޔަށް އަރާ ބަލިތައް ޖެހޭ މިންވަރު އިތުރުވުމުގެ އިތުރުން، އިންސާނާގެ ނިދުމާއި ހޭލުމުގެ ނިޒާމު ހަލާކުކޮށްލާ ކަމެއްކަން ވެސް ހަނދާން ބަހައްޓަންޖެހެއެވެ. އެހެންކަމުން، ދުވަހީ ހަރަކާތްތަކުގައި ފޯނާއި، ފަންނީ ވަސީލަތްތައް ބޭނުންކުރާމިންވަރު މަދުކުރުމަށް އަޒުމު ކަނޑައަޅާށެވެ. ދުވަހީ ތާވަލު ގަނޑެއްގައި ލިޔަން އާދަކުރުމަކީ ރަނގަޅު ފެށުމެކެވެ.