ފްރީ ޓްރޭޑް އެގްރީމެންޓެއް އޮތަސް ދުންފަތުން ޑިއުޓީ ނަގާނެ: ވަޒީރު ސަޢީދު

ޗައިނާއާއެކު ދިވެހިރާއްޖެއިން މިނިވަން ވިޔަފާރީގެ އެއްބަސްވުމެއް ހަދާފައި އޮތް ނަމަވެސް ޗައިނާއިން ރާއްޖެއަށް އެތެރެ ކުރާ ދުންފަތުގެ ބާވަތްތަކުން ޑިއުޓީ ނަގަމުންދާކަމުގައި އިކޮނޮމިކް މިނިސްޓަރ މުޙައްމަދު ޞަޢީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހީމް، ކުރައްވާފައިވާ ސުވާލަށް ލިޔުމުން ހުށައެޅުއްވި ޖަވާބުގައި ވަޒީރު ސަޢީދު މިހެން ވިދާޅުވެފައި ވާއިރު، ވަޒީރުގެ ޖަވާބު މަޖިލީހުގެ ތަޅުމަށް ހުށައަޅުއްވައި ދެއްވީ މަޖިލީހުގެ އަމީންޢާއްމެވެ.

މިނިސްޓަރ ސަޢީދު ވިދާޅުވީ، ދުންފަތުގެ ބާވަތްތަކާއި އަދި ސިނގިރޭޓުން ދައުލަތަށް ލިބޭނެ އާމްދަނީ ބިނާވާނީ، ޗައިނާއިން ދިވެހިރާއްޖެއަށް ދުންފަތުގެ ބާވަތްތަކާއި އަދި ސިނގިރޭޓް އިމްޕޯޓު ކުރާ މިންވަރެއްގެ މައްޗަށް ކަމަށެވެ. ހަމައެހެންމެ، މިނިވަން ވިޔަފާރީގެ އެއްބަސްވުމުގެ ދަށުން ސިނގިރޭޓުން ޑިއުޓީގެ އިނާޔަތްތައް ނުދޭނެ ކަމަށާއި، ޗައިނާއިން އެތެރެކުރާ ސިނގިރޭޓުން ވެސް ޑިއުޓީ ނަގާނީ ރާއްޖެއަށް އެހެން ޤައުމުތަކުން އެތެރެކުރާ ސިނގިރޭޓުން ޑިއުޓީ ނަގާ ރޭޓުން ކަމަށްވެސް ވަޒީރު މުޙައްމަދު ސަޢީދު ވިދާޅުވިއެވެ

ދުންފަތުގެ ޤާނޫނަށް ސަރުކާރުން ގެނެސްފައިވާ އިސްލާޙް ތަކާއި އެކު ދުންފަތުގެ ބާވަތްތަކާއި ސިނގިރޭޓުން ނަގާ ޑިއުޓީ ބޮޑުކުރުމާއި އެކު ޖެނުއަރީމަހުގައިވެސް ދައުލަތަށް ލިބުނު އާމްދަނީ ވަނީ ވަރަށް ބޮޑަށް އިތުރުވެފައެވެ.