މަސްތުވާ ތަކެއްޗާއެކު ކަމަދޫ ޒުވާނަކު ހައްޔަރުކޮށްފި

މަސްތުވާތަކެތީގެ މައްސަލައެއްގައި ހުޅުމާލެ ފޭސް 2 އިން ބ. ކަމަދޫ މީހަކު ހައްޔަރުކޮށްފިއެވެ. ފުލުހުން ބުނީ މި މައްސަލައާ ގުޅިގެން ހައްޔަރުކޮށްފައި ވަނީ އެރަށު، މިނާ، އިބްރާހީމް ޝާއިން ސައީދު (20އ) ކަމަށެވެ.

އޭނާ ހައްޔަރުކޮށްފައި ވަނީ މިދިޔަ މަހު 27 ވަނަ ދުވަހުގެ ރޭ ހުޅުމާލެ ފޭސް 2 ގެ ފުލުހުން ހިޔާ ޓަވަރު 3 ޕެޓްރޯލް ކުރަމުންދިޔައިރު އޭނާގެ އަމަލުތައް ހުރިގޮތުން ގާނޫނާއި ގަވާއިދާ ހިލާފު އެއްޗެއް ގެންގުޅޭކަމަށް ތުހުމަތުކުރެވިގެން ހުއްޓުވައި ބަލައިފާސްކުރިއިރު މަސްތުވާތަކެތި ކަމަށް ބެލެވޭ ތަކެތި ފެނުމާ ގުޅިގެން ކަމަށް ފުލުހުން ވިދާޅުވިއެވެ. 

ފުލުހުން ވިދާޅުވީ، ހިޔާ ޓަވަރު 3 ގެ 24 ވަނަ ފަންގިފިލާގައި އުތުރު ފަރާތު ސިޑި ގޮޅި ކައިރިން އޭނާ ހުއްޓުވައި ބަލައި ފާސްކުރިއިރު، 42 ރަބަރު ޕެކެޓުގެ މަސްތުވާ ތަކެތި ކަމަށް ބެލެވޭ ތަކެއްޗާއި،  ހަތް ސެލޯފިންކޮޅު ފެނިފައިވާ ކަމަށާއި މިތަކެތީގެ ވަގުތީ ބަރުދަނަކީ 10.98 ގުރާމް ކަމަށެވެ.

މި މައްސަލައާ ގުޅިގެން އިބްރާހިމް ޝާއިން ސައީދުގެ ބަންދާމެދު ގޮތެއް ނިންމުމަށް ފެބްރުއަރީ 28 ވަނަ ދުވަހު ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން 7 ދުވަހަށް އޭނާ ބަންދުކުރުމަށް ކޯޓު އަމުރު އައިސްފައިވާކަމަށެވެ. 

މި މައްސަލަ ފުލުހުން ގެންދަނީ ތަހުގީގުކުރަމުންނެވެ.