ޑޮކްޓަރުންނަށް 1 އަހަރަށް ދޫކުރަމުން ދިޔަ ވަގުތީ ލައިސަންސް 6 މަހަށް ކުރުކޮށްފި

ޑޮކްޓަރުންނަށް ދޫކުރަމުން އައި ވަގުތީ ލައިސަންސް 6 މަސްދުވަހަށް ކުރުކުރުމަށް މިނިސްޓްރީ އޮފް ހެލްތު ނިންމައިފިއެވެ.

މޯލްޑިވްސް މެޑިކަލް އެންޑް ޑެންޓަލް ކައުންސިލްގެ މެޑިކަލް ލައިސެންސިންގ އެގްޒާމް ފުރިހަމަ ކުރަންޖެހޭ ޑޮކްޓަރުންނަށް 1 އަހަރު ދުވަހުގެ މުއްދަތަށް ދޫކުރަމުން ދިޔަ ޕްރޮވިޝަނަލް ރެޖިސްޓްރޭޝަންގެ މުއްދަތު 2024 ސެޕްޓެންބަރު 01 އިން ފެށިގެން 6 މަސް ދުވަހުގެ މުއްދަތަށް ކުރުކުރުމަށް ނިންމާފައިވާ ކަމަށް ހެލްތު މިނިސްޓްރީން މައުލޫމާތުދެއްވައެވެ. 

މި ގޮތަށް މި ނިންމުން ނިންމެވީ ޕްރެކްޓިސް ލައިސަންސް އެއް،  އެއް އަހަރު ދުވަހަށް ދިނުމަކީ މާ ދިގުމުއްދަތެއް ކަމަށް ޤަބޫލުކުރެވޭތީ ކަމަށް ސިއްޙަތާ ބެހޭ ވުޒާރާއިން މަޢުލުމާތުދެއްވާފައިވެއެވެ.

މިނިސްޓްރީން ވިދާޅުވީ 2025 މާރިޗު 01 ވަނަ ދުވަހުން ފެށިގެން ޕްރޮވިޝަނަލް ރެޖިސްޓްރޭޝަން އަދި ލައިސެންސް ދޫކުރަމުން ދާނީ 6  މަސް ދުވަހަށް ކަމަށެވެ. އަދި 2024 ސެޕްޓެންބަރު 01 އިން  2025 މާރިޗު 01 ވަނަ ދުވަހާއި ހަމައަށް  ރެޖިސްޓްރޭޝަން "ބީ" ކެޓަގަރީ ދޫކުރެވިފައިވާ ހުރިހާ ޑޮކްޓަރުންނަށް 2025 މާރިޗު 01 ވަނަ ދުވަހުން ފެށިގެން އިތުރު 6 މަސް ދުވަސް ދެވޭނެ ކަމަށް ވެސް އެ ވުޒާރާއިން ވިދާޅުވިއެވެ.