ގދ. ވާދޫ ކައުންސިލުން ދޭ ބައެއް ޚިދުމަތްތަކަށް އިދާރީ ފީއެއް ނެގުމަށް ނިންމައިފި

ގދ. ވާދޫ ކައުންސިލުން ދޭ ބައެއް ޚިދުމަތަކަށް އިދާރީ ފީއެއް ނެގުމަށް ނިންމައިފިއެވެ.

ގދ. ވާދޫ ކައުންސިލުން މިއަދު ކުރި އިޢުލާނެއްގައި ވަނީ، ކައުންސިލުން މިހާރު  ދެމުންގެންދާ ޚިދުމަތްތަކުގެ ތެރެއިން ބައެއް ޚިދުމަތްތަކަށް އިދާރީ ފީއެއް ނެގުމަށް އެ ކައުންސިލްގެ ޢާންމު ޖަލްސާއިން ނިންމާފައިވާ ކަމަށެވެ. 

އެގޮތުން، އެ ކައުންސިލުން ދެމުން ގެންދާ ޚިދުމަތްތަކުގެ ތެރެއިން އުފަން ދުވަހުގެ ރަޖިސްޓްރީ ހެއްދުމާއި، ރަށްވެހިންގެ ރަޖިސްޓްރީ ހެއްދުމާއި، މަގު ކޮނުމުގެ ހުއްދައަށް 30 ރުފިޔާ ގެ ފީއެއް ނެގުމަށް ވަނީ ނިންމާފަ އެވެ. ހަމަ އެހެންމެ، އުފަންދުވަހުގެ ސެޓްފިކެޓް ހެއްދުމަށާއި، ގޯތީގެ ވަގުތީ ރަޖިސްޓްރީ ހެއްދުމަށާއި، އެކިއެކި ކަންކަމަށް ކައުންސިލުން ދޫކުރާ ލިޔުންތަކަށް 50 ރުފިޔާގެ ފީއެއް ނަގާނެ ކަމަށް ވެސް ކައުންސިލުން ހާމަކުރެއެވެ. މީގެ އިތުރުން، އިމާރާތާއި ގޯތީގެ ރަޖިސްޓްރީ ހެއްދުމަށާއި، ވަގުތީ ގޮތުން މަގު ބަންދުކުރުމާއި، ބީލަންތަކުގައި ރަޖިސްޓްރީވުމާއި، ކަނޑުއުޅަނދު ސާވޭކުރުމަށް 100 ރުފިޔާގެ ފީއެއް ނަގާނެކަންވެސް އެ ކައުންސިލުން ވަނީ ފާހަގަކުރައްވާފަ އެވެ.

 ކައުންސިލުން މިގޮތަށް ނިންމަވާފައިވީ ނަމަވެސް މިއިން ޚިދުމަތެއް އަލަށް ހޯދާ ފަރާތްތަކާއި، ކައުންސިލް އިދާރާގެ ބޭނުމަކަށްދޭ ޚިދުމަތްތައް މީގެތެރެއިން އިސްތިސްނާވާނެކަމަށް އެ ކައުންސިލުން ބުނެއެވެ.