ޚަބަރު
ސްޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ނިންމާފައިވަނިކޮށް ހުސްނުއްސުޢޫދު އިސްތިއުފާ ދެއްވައިފި

އަލްއުސްތާޛު ހުސްނުއްސުޢޫދު---
ސްޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ކޯޓުތަކާ ބެހޭ ޤާނޫނަށް އިޞްލާހުގެނައުމަށް ރައްޔިތުންގެ މަޖިލީހުން ފާސްކޮށްފައިވަނިކޮށް، އެ ކޯޓުގެ 7 ފަނޑިޔާރުންގެ ބެންޗުގައި ހިމެނިވަޑައިގަންނަވާ އަލްއުސްތާޛު ހުސްނުއްސުޢޫދު މަޤާމުން އިސްތިއުފާ ދެއްވައިފިއެވެ.
ހުސްނުއްސުޢޫދުގެ މި ނިންމެވުން އެންގެވުމުގެ ގޮތުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއަށް ވަނީ ސިޓީފުޅެއް ވެސް ފޮނުއްވާފައެވެ.
ކޯޓުތަކާ ބެހޭ ޤާނޫނަށް އިޞްލާހުގެނައުމަށް ރައްޔިތުންގެ މަޖިލީހުން ފެބުރުވަރީ މަހުގެ 26 ވަނަ ދުވަހު ފާސްކޮށްފައިވީ ނަމަވެސް، ރައީސުލްޖުމްހޫރިއްޔާ އަދި އެ ބިލު ތަސްދީޤުކުރައްވާފައެއް ނުވެއެވެ. އެ ބިލުގައި އޮތީ ސުޕްރީމް ކޯޓުގެ ފަނޑިޔާރުންގެ އަދަދު 7 އިން 5 އަށް ބަދަލުކުރުމަށެވެ.
ހުސްނުއްސުޢޫދު މަޤާމުން އިސްތިއުފާ ދެއްވާފައިވާއިރު، އެ ބޭފުޅާ ހިމެނޭހެން ސްޕްރީމް ކޯޓުގެ ބެންޗުގައި ހިމެނިވަޑައިގަންނަވާ އިތުރު ދެ ފަނޑިޔާރަކު ތިއްބެވީ ސަސްޕެންޝަނެއްގައެވެ.
ސަސްޕެންޑުކޮށްފައިވަނީ ފަނޑިޔާރު ޑޮކްޓަރ އަޒްމިރާލްދާ ޒާހިރާއި، ފަނޑިޔާރު އަލްއުސްތާޛު މަޙާޒު ޢަލީ ޒާހިރުގެ އިތުރުން ފަނޑިޔާރު ހުސްނުއްސުޢޫދެވެ. އެއީ އެ ފަނޑިޔާރުންނާ ގުޅޭގޮތުން ޖިނާއީ ތަޙްޤީޤެއް ކުރަމުންދާކަމަށް އެންޓި-ކޮރަޕްޝަން ކޮމިޝަން، އޭސީސީން، ޖުޑީޝަލް ސަރވިސް ކޮމިޝަން، ޖޭއެސްސީއަށް އެންގުމާއި ގުޅިގެންނެވެ.
ސްޕްރީމް ކޯޓުގެ ބެންޗުގައި ހިމެނިވަޑައިގަންނަވާ ފަނޑިޔާރުންގެ އަދަދަކީ އެކި ދުވަސްވަރު ބަދަލުވަމުންއައި އަދަދެކެވެ. އެގޮތުން، މިހާރު ޢަމަލުކުރަމުން އައި ފެހި ޤާނޫނު އަސާސީ ވުޖޫދަށް އައިއިރު، ސްޕްރީމް ކޯޓުގެ ބެންޗުގެ އަދަދަކީ 5 އެވެ. އޭގެ ފަހުން 2010 ވަނަ އަހަރު، ރައީސް މުޙައްމަދު ނަޝީދުގެ ވެރިކަމުގައި މި އަދަދު 7 ފަނޑިޔާރުންގެ މައްޗަށް ދާއިމީ ސުޕްރީމް ކޯޓެއް އެކުލަވާލެވުނެވެ. ނަމަވެސް ޤާނޫނު އަސާސީއަށް އިސްލާހު ގެނަސް، ރައީސް އަބްދުﷲ ޔާމީން އަބްދުލް ޤައްޔޫމްގެ ވެރިކަމުގައި މި އަދަދު އަނެއްކާ ވެސް 5 އަށް ބަދަލުކުރެއްވިއެވެ. އޭގެ ފަހުން ރައީސް އިބްރާހީމް މުހައްމަދު ޞާލިހުގެ ސަރުކާރުގެ ދުވަސްވަރު 2019ވަނަ އަހަރު ސުޕްރީމް ކޯޓުގެ ބެންޗު އަނެއްކާވެސް 7 އަށް އިތުރުކުރިއެވެ.
ސުޕްރީމް ކޯޓުގެ ފަނޑިޔާރުކަމަށް ޙުސްނުއް ސުޢޫދު އައްޔަންކުރައްވާފައިވަނީ 8 ޑިސެމްބަރު 2019 ވަނަ އަހަރުއެވެ. އެ މަޤާމަށް ސުޢޫދު ޢައްޔަންކުރެއްވީ ކުރީ ސަރުކާރުގައި އުފެއްދެވި، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަނުގެ ރައީސްގެ މަޤާމުގައި ހުންނަވަނިކޮށެވެ.