ފުވައްމުލަކު ހޮސްޕިޓަލުން ސީޓީ ސްކޭންގެ ޚިދުމަތް ދިނުމަށް ތައްޔާރުވަނީ

ފުވައްމުލަކު ހޮސްޕިޓަލުން ސީޓީ ސްކޭންގެ ޚިދުމަތް ދިނުމުގެ އެންމެ ފަހުގެ ތައްޔާރީތައް ވާންފަށައިފިއެވެ.

ފުވައްމުލަކު ހޮސްޕިޓަލުން ބުނީ، ސީޓީ ސްކޭންގެ ޚިދުމަތް ފެށުމަކީ އެ ހޮސްޕިޓަލުން ދެމުންގެންދާ ސިއްޙީ ޚިދުމަތްތައް ރަނގަޅުކޮށް، ޒަމާނީ ފަރުވާ ދިނުމަށް ލިބުނު ވަރަށް ބޮޑު ކުރިއެރުމެއް ކަމަށެވެ.

މި މެޝިން އެ ރަށަށް ގެންގޮސްފައިވަނީ އިއްޔެގެ ހެނދުނުގެ ވަގުތެއްގައެވެ. އަދި މިހާރު މިކަމުގެ ފައިނަލް އިންސްޕެކްޝަން ނިމިފައިވާ ކަމަށާއި، އެ ޚިދުމަތް ވީހާވެސް އަވަހަކަށް ފެށުމަށް ހެލްތު މިނިސްޓްރީގެ ޓީމަކާ ގުޅިގެން  މަސައްކަތް ކުރަމުން އަންނަކަމަށް، ފުވައްމުލަކު ހޮސްޕިޓަލުން ވަނީ ހާމަކޮށްފައެވެ.

ނަމަވެސް ސީޓީ ސްކޭންގެ ޚިދުމަތް ދޭން ފަށާނެ ވަކިދުވަހެއް އެ ހޮސްޕިޓަލުން އަދި ހާމަކޮށްފައެއް ނުވެއެވެ.

މަޢުލޫމާތު ލިބިފައިވާ ގޮތުގައި، އެ ރަށުން ސީޓީގެ ޚިދުމަތް ދިނުމަށް ތައްޔާރުވެފައި މިވަނީ، އެ ހޮސްޕިޓަލުން ދޭ ޚިދުމަތްތަކާމެދު ރައްޔިތުންގެ ކަންބޮޑުވުން އިތުރުވެފައިވާ ދަނޑިވަޅެއްގައެވެ.