ކުޅުދުއްފުށީ ސިޓީގެ މަސްޖިދުލް ޖަމާއަތް މަރާމާތަށްފަހު އަލުން ހުޅުވާލައިފި

ކުޅުދުއްފުށީ ސިޓީގެ މަސްޖިދުލް ޖަމާއަތް މަރާމާތުކުރުމަށް ފަހު، އަލުން ޢާންމުންނަށް ހުޅުވާލާފިއެވެ. 

ކުޅުދުއްފުށީ ސިޓީ ކައުންސިލުން ވިދާޅުވީ، އެ ސިޓީގައި ހުންނަ މަސްޖިދުލް ޖަމާއަތް ދިޔައީ ބާވެ ވީރާނާ ވަމުން ކަމަށެވެ. އެހެންކަމުން، އެ މިސްކިތުގެ އާބާތުރަ ފިލުވުމަށް ގިނަ މަސަައްކަތްތަކެއްކޮށް މިހާރު މިސްކިތް ވަނީ ޢާންމުންނަށް ހުޅުވާލާފައި ކަމަށް ސިޓީ ކައުންސިލުން މަޢުލޫމާތުދެއެވެ.

ކުޅުދުއްފުށީ ސިޓީ ކައުންސިލުން އެ މިސްކިތް މަރާމާތު ކުރުމަށް ފަށާފައިވަނީ، މިއަހަރުގެ ޖަނަވަރީ މަހުގެ ތެރޭގައެވެ. އެގޮތުން، މިސްކިތުގެ ބައެއް ތަންތަނުގެ މުށިތައް އާ ކުރުމާއި، މުޅި މިސްކިތުގެ ސީލިންގް ވަނީ އާކޮށްފައެވެ. އަދި ދެ ފަރާތުގެ ފެންޑާ ހެދުމާއި، މިހުރާބުގޭގެ އިންޓީރިއާ ހަދައި މިންބަރު ވަނީ އާކޮށްފައެވެ. މީގެ އިތުރުން، މިސްކިތުގެ އިސްކޫރު ބަރިޔާއި ފާހަނަ އަލުން މަރާމާތުކޮށް، މިސްކިތުގެ ގޯތިތެރޭގައި ލޭންޑް ސްކޭޕްކޮށް ވޯކްވޭ ހަދައި ގައު އެތުރުމާއި ބައެއް ސަރަހައްދުތަކުގެ ވަށާފާރު އާ ކޮށް ލައިޓިން އާ ކުރުމުގެ މަސައްކަތް ވަނީ ކޮށްފައެވެ.

ކުޅުދުއްފުށީ ސިޓީ ކައުންސިލުން ވިދާޅުވީ، މިސްކިތް ހުންނަ ސަރަޙައްދުގެ ޓްރެފިކް މައްސަލަތައް ހައްލުކުރުމަށް ވެސް މަސައްކަތް ކޮށްފައިވާ ކަމަށެވެ. އެގޮތުން، މިސްކިތުގެ ޕާކިންގ ޒޯން އިތުރަށް ފުޅާކޮށް، މިސްކިތުގެ ހުޅަނގުގައި ބޭނުންނުކޮށް އޮތް ސަރަޙައްދުގައި ތަޅުން އަޅައި، އެތަން ތަރައްޤީކޮށްފައިވާ ކަމަށް އެ ކައުންސިލުން މަޢުލޫމާތު ދެއެވެ.