މީހުން އެއްވެފައި އޮތް ތަނެއްގެ ތެރެއަށް ކާރެއް ވަދެގެން ހިނގި ހާދިސާގައި ދެ މީހަކު މަރުވެއްޖެ

ޖަރުމަނު ވިލާތުގެ މެންހެއިމް ސީޓީގައި މީހުން އެއްވެފައި އޮތް ތަނެއްގެ ތެރެއަށް ކާރެއް ވަދެގެން ހިނގި ހާދިސާގައި މަދުވެގެން ދެ މީހަކު މަރުވެފައިވާކަމަށް އެ ގައުމުގެ ކަމާގުޅުންހުރި އިދާރާތަކުން ހާމަކޮށްފިއެވެ.

ފުލުހުންގެ ތަރުޖަމާނު ސްޓެފަން ވިލްހެމް ބުނީ، މި ހާދިސާގައި ކާރު ވަދެގަތީ ޕެރަޑެޕްލެޓްސް ކިޔާ ސަރަޙައްދަކަށް ކަމަށާއި، އެއީ މީހުން ހިނގާބިނގާވެ އުޅުމަށް ޙާއްސަކޮށްފައި އޮތް ސަރަޙައްދެއް ކަމަށެވެ.

މި ހާދިސާއާ ގުޅިގެން ފުލުހުން ވަނީ ކާރު ދުއްވަން އިންމީހާ ހައްޔަރުކޮށްފައެވެ. އަދި އޭނާ ހައްޔަރުކުރުމަށްފަހު ފުލުހުން ބުނެފައިވަނީ، މި ކަމުގައި ޝާމިލް ވަނީ އޭނާ އެކަނިކަމަށާއި، އެހެންކަމުން، މި ހާދިސާއާ ގުޅިގެން އިތުރު ބިރުވެރިކަމެއް އާންމުންނަށް ނެތް ކަމަށެވެ. 

މި ހާދިސާއާ ގުޅިގެން ހައްޔަރުކޮށްފައިވާނީ އުމުރުން 41 އަހަރުގެ މީހެކެވެ. ޖަރުމަނުގެ ރައްޔިތެއް ކަމުގައިވާ މިމީހާ ނިސްބަތްވަނީ ރައިންލޭންޑް-ޕެލަޓިނޭޓް ކިޔާ ހިސާބަކަށެވެ. 

މި ހާދިސާގައި ދެ މީހުން މަރުވުމުގެ އިތުރުން، ބައެއް މީހުންނަށް ސީރިއަސް އަނިޔާތަކެއް ލިބިފައިވާކަމަށް ޖަރުމަނުގެ ސަރުކާރުން ވަނީ ހާމަކޮށްފައެވެ. 

މީ ހާދިސާ ހިނގާފައިވާ ގޮތް ފުލުހުން އިތުރަށް ތަޙުޤީޤު ކުރަމުން އަންނަ ކަމަށް، ބެޑަން-ވާރޓެމްބާރގުގެ އިންޓީރިއާ މިނިސްޓަރ، ތޯމަސް ސްޓްރޮބްލް ވަނީ ހާމަކޮށްފައެވެ. 

މި ހާދިސާ ހިނގި މެންހެއިމްގެ ޕެރަޑެޕްލެޓްސް އަކީ އެ ސަރަޙައްދުގައި މީހުން ހިނގާބިނގާވެ އުޅުމަށް ޙާއްސަ ބޮޑު ތަނެކެވެ. މެންހެއިމްގެ އާބާދީއަކީ ގާތްގަނޑަކަށް 326،000 މީހުންނެވެ. އަދި މިތަން އޮންނަނީ ފްރޭންކްފާޓުގެ ދެކުނުން 85 ކިލޯމީޓާރު ބޭރުގައެވެ.