ޖަޕާނުގެ އުމުރުން ދުވަސްވީ މީހުންގެ ފަރުވާއަށް އޭއައި ރޮބޮޓު ބޭނުންކުރަނީ

ޖަޕާނުގައި އުމުރުން ދުވަސްވީ މީހުންގެ އާބާދީ އިތުރުވަމުން ދިއުމާއި އެކު، އެމީހުންގެ ފަރުވާއަށް ބޭނުންވާ މުވައްޒަފުންގެ ދަތިކަން ޙައްލުކުރުމަށްޓަކައި އޭއައި ރޮބޮޓުތައް ތަޢާރަފުކުރަން ފަށައިފިއެވެ.

ވަސެދާ ޔުނިވަރސިޓީގެ ޕްރޮފެސަރ ޝިގެކީ ސުގާނޯގެ ދަށުން ސަރުކާރުގެ ފަންޑިންގ އާއެކު ތައްޔާރުކުރެވިފައިވާ "އެއަރެކް" ނަމަކަށް ކިޔާ އޭއައި ރޮބޮޓަކީ މުސްތަޤްބަލުގައި ދުވަސްވީ މީހުންގެ ފަރުވާއަށް ބޭނުންކުރެވޭނެ ޕްރޮޓޯޓައިޕް ރޮބޮޓެކެވެ. މި ރޮބޮޓަށް ދުވަސްވީ މީހުންގެ ނެޕީ ބަދަލުކުރުމާއި، އެނދުމަތިވެފައި ތިބޭ މީހުންގެ ހަށިގަނޑު އަނބުރާލުން ފަދަ މަސައްކަތްތައް ކުރެވޭނެއެވެ.

ޕްރޮފެސަރ ސުގާނޯ ވިދާޅުވީ، "އުމުރުން ދުވަސްވީ މީހުންގެ އާބާދީ އިތުރުވެ، އުފަންވާ ކުދިންގެ އަދަދު މަދުވަމުންދާތީ، މެޑިކަލް އަދި އުމުރުން ދުވަސްވީ މީހުންގެ ފަރުވާއަށް ރޮބޮޓުތަކުގެ އެހީތެރިކަން ބޭނުންވާނެ" ކަމަށެވެ.

ޖަޕާނުގައި 2024 ވަނަ އަހަރު އުފަންވި ކުދިންގެ އަދަދު ވަނީ 720,988 އަށް ދަށްވެފައެވެ. މިއީ ވޭތުވެދިޔަ 9 އަހަރު ވެސް ދަށްވަމުން އައި އަދަދެކެވެ. އަދި ނަރުހުންގެ ދާއިރާގައި ވަޒީފާ ހުސްވެފައިވާ މިންވަރު ވަރަށް ބޮޑެވެ.

ޒެންކޯކައި ނަމަކަށް ކިޔާ ދުވަސްވީ މީހުންގެ ފަރުވާދޭ މަރުކަޒުތަކެއް ހިންގާ ކުންފުންޏެއްގެ ޑިރެކްޓަރ ތަކާޝި މިޔަމޮޓޯ ވިދާޅުވީ، "10 ނުވަތަ 15 އަހަރު ފަހުން  މި ހާލަތު ވަރަށް ނުރައްކާތެރިވާނެ" ކަމަށާއި، "ޓެކްނޮލޮޖީއަކީ މިކަމުން ސަލާމަތްވުމަށް އޮތް އެންމެ ރަނގަޅު ގޮތް" ކަމަށެވެ.

ޕްރޮފެސަރ ސުގާނޯ ވިދާޅުވީ އެއަރެކް ރޮބޮޓަށް މީހަކު އިށީންނަން އެހީތެރިވުމާއި، ބިސް ނުވަތަ ބަތްޕެން ހެދުމާއި، ދޮވެފައިވާ ހެދުން ރީތިކޮށް ފަށްޖެހުން ފަދަ ކަންކަން ކުރެވޭނެ ކަމަށެވެ. ނަމަވެސް މި ރޮބޮޓު ބޭނުންކުރަން ފެށޭނީ 2030 ވަނަ އަހަރާ ހިސާބުގައި ކަމަށާއި، އޭގެ އަގު 10 މިލިއަން ޔެން (67,000 ޑޮލަރު) އަށްވުރެ ދަށްނުވާނެ ކަމަށް އޭނާ ވިދާޅުވިއެވެ.