އީރާނުގެ ނައިބު ރައީސް މަޤާމުން އިސްތިއުފާ ދެއްވައިފި

އީރާނުގެ ނައިބު ރައީސް ޖާވިދް ޒަރީފް މަޤާމުން އިސްތިއުފާ ދެއްވައިފިއެވެ.

ޖާވިދް ޒަރީފް އޭނާގެ އިސްތިއުފާގެ ޚަބަރު ދެއްވާފައިވަނީ އޭނާގެ އޮފިޝަލް އެކްސް މެދުވެރިކޮށް ހިއްސާކުރެއްވި ޕޯސްޓެއްގައެވެ. ޒަރީފް ވިދާޅުވީ، ވޭތުވެދިޔަ 9 މަސްދުވަހު ރައީސް މަސްއޫދު ޕެޒެޝްކިއަންގެ ސަރުކާރުގައި ވަރަށް ފަރުވާތެރިކަމާއެކު މަސައްކަތްކުރެއްވި ކަމަށެވެ. ނަމަވެސް، ފާއިތުވި 6 މަސްދުވަހުގެ ތެރޭގައި އޭނާއާއި އޭނާގެ އާއިލާއަށް އަމާޒުކޮށް ނުބައި ބަހުރުވައިން މުޢާމަލާތުތަކާއި، ވާހަކަ އުފެއްދުމާއި، ބިރުދެއްކުން ކުރިމަތިވެފައިވާ ކަމަށް އެނާ ވިދާޅުވިއެވެ.

މީގެ އިތުރުން ޒަރީފް ވިދާޅުވީ، ސިޔާސީ ޙަޔާތުގައި އޭނާ ހޭދަކުރި 40 އަހަރު ދުވަހުގައި މިއީ އޭނާ އަށް ކުރިމަތިވި އެންމެ ހިތި ދުވަސްވަރު ކަމަށެވެ. އޭނާ މިފަދައިން ވިދާޅުވެފައިވަނީ، ނައިބު ރައީސްކަމަށް އައްޔަންކުރުމާއި ގުޅިގެން އުފެދުނު ޚިލާފަށް އިޝާރާތްކުރައްވާފައެވެ. އެގޮތުން، އޭނާ ނައިބު ރައީސް އަށް އައްޔަންކުރެއްވުމާ އެކު ފާޑުކިޔާ ފަރާތްތަކުން ވަނީ އޭނާގެ ދަރިން އެމެރިކާގައި އުފަންވެފައިވާތީ، އެއީ އެމެރިކާގެ ރައްޔިތުންކަމުގައި ވުމާއެކު، އޭނާ އައްޔަންކުރުމަކީ ޤާނޫނު އަސާސީއާ ޚިލާފު ކަމެއް ކަމަށް ބުނެފައެވެ.

ޖާވިދް ޒަރީފް އަކީ ރައީސް ހަސަން ރޫހާނީގެ ވެރިކަމުގައި 8 އަހަރު ވަންދެން ޚާރިޖީ ވަޒީރުކަން ކުރައްވާފައިވާ ހީވާގި ބޭފުޅެކެވެ. މީގެ އިތުރުން، 2015 ވަނަ އަހަރު އީރާނުގެ ނިއުކްލިއަރ އެއްބަސްވުމުގައި ވެސް އޭނާ ވަނީ މުހިންމު ދައުރެއް އަދާކުރައްވާފައެވެ. ޒަރީފް ވިދާޅުވީ، އީރާނުގެ މިހާރުގެ ޙާލަތަށް ބަަލައި އެ ޤައުމުގެ ސަރުކާރަށް އިތުރު ފިއްތުންތަކެއް ކުރިމަތިވުމަށް ބޭނުންނުވާ ކަަމަށެވެ. އަދި އެކަޑަމިކް ދާއިރާއަށް އެނބުރި ދިއުމަށް ފަނޑިޔާރުގޭގެ އިސްވެރިޔާ އޭނާއަށް ލަފާ ދެއްވާފައިވާކަމަށް އޭނާ މަޢުލޫމާތުދެއެވެ.

ޖާވިދް ޒަރީފް އިސްތިއުފާ ދިނުމާއި ގުޅިގެން އީރާނުގެ ސަރުކާރުން އަދި ރަސްމީ ބަޔާނެއް ނެރެފައެއް ނުވެއެވެ. ނަމަވެސް، އޭނާގެ އިސްތިއުފާއާއި ގުޅިގެން އީރާނުގެ ރައްޔިތުންގެ މެދުގައި ވަނީ ހިތްހަމަނުޖެހުން އުފެދިފައެވެ.