ސަރުކާރުން ސުޕްރީމް ކޯޓަށް ނުފޫޒު ފޯރުވާކަމަށް ބުނެ މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފި

އަދުގެ ސަރުކާރުން ސުޕްރީމް ކޯޓަށް ނުފޫޒު ފޯރުވާ ކަމަށް ބުނެ ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފިއެވެ.

މި މައްސަލަ "ކުއްލި މައްސަލަ" އެއް ގޮތުގައި ހުށަހެޅުއްވާފައިވަނީ ހުޅުމާލެ ދެކުނު ދާއިރާގެ މަޖިލިސް މެންބަރު، އަހުމަދު ޝަމްހީދުއެވެ.

މި މައްސަލަ މަޖިލީހަށް ބަލާގަތުމާއި މެދު ގޮތެއް ނިންމެވުމަށް މިއަދު ވަނީ މެންބަރުންގެ މެދުގައި ވޯޓެއް ނަގައިފައެވެ. މި ވޯޓުގައި، މައްސަލަ ބަލައިގަތުމަށް ވޯޓު ދެއްވީ އެންމެ 11 މެންބަރުންނެވެ. އެ މައްސަލަ ބަލައިގަތުމާއި ދެކޮޅަށް 46 މެންބަރުން ވަނީ ވޯޓުދެއްވާފަ އެވެ. އަދި 1 މެންބަރަކު ވަނީ ވަކި ގޮތަކަށް ވޯޓު ދެއްވަން ބޭނުންނުވާ ކަމަށް ވޯޓު ދެއްވައިފައެވެ.

މި މައްސަލަ ހުށައެޅުމަށްފަހު މަޖިލިސް މެންބަރު ޝަމްހީދުު ވިދާޅުވީ، ދިވެހިރާއްޖޭގެ ސުޕްރީމް ކޯޓަކީ އަދުލު އިންސާފު ޤާއުމުކުރުމުގައި އެންމެ އިސް ދައުރެއް އަދާކުރާ ފަރާތް ކަމަށެވެ. އެހެންކަމުން، ޤާނޫނެއް ނުވަތަ ޤާނޫނެއްގެ ބައެއް،  ޤަވާއިދެއް ނުވަތަ ޤަވާއިދެއްގެ ބައެއް، އަދި ދައުލަތުގެ އިދާރާއަކުން ނެރޭ އަމުރެއް، ނުވަތަ އެއިން އިދާރާއެއްގެ މުވައްޒަފަކު ކުރާ ކަމެއް، ނުވަތަ ނިންމާފައިވާ ނިންމުމެއް ވިޔަސް ގާނޫނުއަސާސީ އާއި ޚިލާފުވާނަމަ، އެ ޚިލާފުވުން ބާތިލުކުރުމަކީ ސުޕްރީމް ކޯޓުގެ ބާރުތަކުގެ ތެރޭގައި ހިމެނޭ ކަމެއް ކަމަށް އޭނާ ވަނީ ފާހަގަކުރައްވާފަ އެވެ. 

މި ކުއްލި މައްސަލާގައި މަޖިލިސް މެންބަރުންގެ މެންބަރުކަން ގެއްލުވައިލެވޭ ގޮތަށް މަޖިލީހުން ޤާނޫނުއަސާސީ ބަދަލު ކުރި މައްސަލަ ސުޕްރީމް ކޯޓަށް ހުށަހެޅުމާ ހަމައިން، އެ މައްސަލަ އެ ކޯޓަށް ނުބެލޭނެ ކަމަށް ބުނެ ދައުލަތުން ވަކާލާތު ކުރުމާއި، އެ މައްސަލަ ބެލޭނެ ކަމަށް ސުޕްރީމް ކޯޓަށް ނިންމުމުން ފަނޑިޔާރުންގެ އަދަދު މަދު ކުރެވޭ ގޮތަށް ކުއްލިއަކަށް މަޖިލީހަށް އިސްލާހެއް ހުށަހެޅުނުކަން ޝަމްހީދު ވަނީ ފާހަގަކުރައްވާފައެވެ. މީގެ އިތުރުން، ސުޕްރީމް ކޯޓުގެ އިސް ފަނޑިޔާރުންގެ އަދަދު 7 އިން 5 އަށް  މަދުކޮށް، ދެ ފަނޑިޔާރެއް މަޤާމުން ވަކި ކުރަން ލާޒިމްވާ ގޮތަށް ރާއްޖޭގެ ކޯޓުތަކާ ބެހޭ ޤާނޫނަށް އިސްލާހު ގެނައުމުގެ ބިލް ރައްޔިތުންގެ މަޖިލިހުން ފާސްކޮށްފައިވަނީ މިދިޔަ މަހު އެވެ.

ރައްޔިތުންގެ މަޖިލީހުން މި ބިލު ފާސްކޮށްފައިވީ ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އަދު މި ބިލު ތަސްދީގެއް ނުކުރައްވައެވެ. އަހުމަދު ޝަމްހީދު މި ކުއްލި މައްސަލަ ހުށައަޅާފައިވަނީ، ސުޕްރީމް ކޯޓަށް މި ސަރުކާރުން ނުފޫޒު ފޯރުވާ ކަމަށް ވިދާޅުވެ، އެ ކޯޓުގެ ފަނޑިޔާރު ހުސްނުއްސޫއޫދު އިސްތިއުފާ ދެއްވާފައިވާ ދަނޑިވަޅެއްގަ އެވެ.