ކަދުރު: ހަކަތަ އާއި ލޭ އިތުރުކޮށްދޭ ފައިދާހުރި މޭވާއެއް

ކަދުރު ކެއުމުގެ މުހިންމުކަމާއި ޞިއްޙީ ފައިދާތައް

ރަމަޟާން މަހަކީ ރޯދަހިފުމުގެ މަހެވެ. އަދި އެއީ ރޫޙާނީގޮތުން ވިސްނައި ފިކުރުކުރުމާއި، ނަފްސު ކޮންޓްރޯލްކުރުމާއި، އެކުވެރިކަމުގެ މައްޗަށް އަހަންމިއްޔަތުކަން ދެވޭ މަހެކެވެ. މި  މަހުގައި އެންމެ ލޮބުވެތި އާދަތަކުގެ ތެރެއިން އެއް އާދައަކީ ކަދުރުން ރޯދަ ވީއްލުމެވެ. މި އާދައަކީ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަގެ ސުންނަތެކެވެ. އަދި މިއީ ދީނީގޮތުން މުހިންމު ކަމެއް ވުމުގެ އިތުރުން ޞިއްޙީގޮތުން ވެސް ގިނަގުނަ ފައިދާތަކެއް ލިބޭ ކަމެކެވެ.

ދީނީ އަދި ޘަޤާފީ މުހިންމުކަން
ކަދުރަކީ މެދުއިރުމަތީގެ އަދި މުސްލިމު މުޖުތަމަޢުތަކުގެ ކާބޯތަކެތީގެ ތެރޭގައި ޒަމާނުއްސުރެ ހިމެނިފައިވާ އެއްޗެކެވެ. ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަ ރޯދަ ވީއްލަވާފައިވަނީ ފެހި ނުވަތަ ހިކި ކަދުރާއި ފެނުންކަމަށް ރިވާވެގެން އައިސްފައިވެއެވެ. މިއީ މަޣްރިބު ނަމާދު ކުރެއްވުމުގެ ކުރިންނެވެ. މި އާދަ މިއަދުވެސް މުސްލިމު ދުނިޔޭގައި ވަނީ ދެމެހެއްޓިފައެވެ. އަދި ކަދުރަކީ ދިރިއުޅުމާއި ބަރަކާތުގެ ނިޝާނެއްގެ ގޮތުގައި ދެކެވެއެވެ.

ކަދުރު ބޭނުންކުރުން އެހާ މުހިންމުވަނީ ކީއްވެ؟

ކަދުރަކީ "ޤުދުރަތީ ހަކަތައިގެ ފުރިހަމަ މޭވާ " އެއްގެ ގޮތުގައި ގިނަފަހަރު ބުނެވޭ އެއްޗެކެވެ. މިއީ އޭގައި އެކުލެވޭ މުހިންމު ފައިދާހުރި މާއްދާތަކުގެ ސަބަބުންނެވެ. ތިރީގައި މިވަނީ ރޯދަ ވީއްލުމަށް ކަދުރު އެންމެ އެކަށީގެންވާ ސަބަބުތަކެވެ:

1. ވަގުތުން ހަކަތަ ލިބުން
ކަދުރުގައި ގްލޫކޯސް އަދި ފްރުކްޓޯސް ފަދަ ޤުދުރަތީ ހަކުރު އެކުލެވެއެވެ. މިއީ މުޅިދުވަހު ނުކައި ހުރުމަށްފަހު އަވަހަށް ހަކަތަ ލިއްބައިދޭ އެއްޗެކެވެ. ޕްރޮސެސްކޮށްފައިވާ ހަކުރާއި ޚިލާފަށް، މި ޤުދުރަތީ ހަކުރު ފަސޭހައިން ހަޖަމުވެ، ގިނައިރުތަކަކަށް ހަކަތަ ލިއްބައިދެއެވެ.

2. ފައިބަރ ގެ މާއްދާއިން މުއްސަނދި
ރޯދައަށް ހުރުމުގެ ސަބަބުން ބައެއްފަހަރު ހަޖަމުކުރުމުގެ މައްސަލަތައް ދިމާވެއެވެ. ނަމަވެސް ކަދުރުގައި  އެކުލެވޭ ގިނަ ފައިބަރގެ ސަބަބުން ހަޖަމުގެ މައްސަލަ ހުއްޓުވައި، ގޮހޮރުގެ ޞިއްޙަތު ރަނގަޅުކުރެއެވެ. އަދި ހަޖަމުކުރުން ފަސޭހަކޮށްދެއެވެ.

3. ހަށިގަނޑަށް ފައިދާހުރި މުހިންމު މާއްދާތަކުން ފުރިފައިވުން

ކަދުރުގައި ޕޮޓޭސިއަމް، މެގްނީސިއަމް، އަޔަން އަދި ކެލްސިއަމް ފަދަ މުހިންމު މަޢުދަނުތައް އެކުލެވެއެވެ. ޕޮޓޭސިއަމްއިން ހަށިގަނޑުގައި ފެން ބެލެންސްކޮށްދީ މަސްތަކުގެ މަސައްކަތް ރަނގަޅުކުރެއެވެ. އަދި އަޔަންއަކީ ލޭގެ ރަތް ސެލްތައް އުފެއްދުމަށް މުހިންމު އެއްޗެއް ކަމުން، އެނީމިއާ ފަދަ ލޭމަދުކުރުވާ  ހާލަތްތަކުން  ރައްކާތެރިކުރުވައެވެ.

4. ސިކުނޑީގެ ޞިއްޙަތު ރަނގަޅުކުރުން
   ކަދުރުގައި ފްލެވޮނޮއިޑްސް އަދި ކެރޮޓިނޮއިޑްސް ފަދަ އެންޓިއޮކްސިޑެންޓްތައް އެކުލެވެއެވެ. މިއިން ސިކުނޑީގެ ސެލްތައް ރައްކާތެރިކޮށްދީ، ހަނދާން ރަނގަޅުކޮށް، ނިއުރޯޑީޖެނެރޭޓިވް ބަލިތަކަށް ހުށަހެޅުމުގެ ފުރުޞަތު ކުޑަކުރެއެވެ.

5. ލޭގައި ހުންނަ ހަކުރުގެ މިންވަރު ބެލެހެއްޓުން
   ކަދުރަކީ ޤުދުރަތީގޮތުން މީރު އެއްޗެއް ނަމަވެސް، އޭގެ ގްލައިސެމިކް އިންޑެކްސް ދަށެވެ. މާނައަކީ ކަދުރު ކެއުމުން ލޭގައި ހުންނަ ހަކުރުގެ މިންވަރު ކުއްލިއަކަށް މައްޗަށް ނުދެއެވެ. މިކަމުގެ ސަބަބުން އެދެވޭ މިންވަރަކަށް ކައިފިނަމަ ހަކުރު ބަލީގެ މީހުންނަށްވެސް ކަދުރަކީ ރަނގަޅު އެއްޗެކެވެ.

ރަމަޟާން މަހު ކަދުރު ކެއުމުގެ އެންމެ ރަނގަޅު ގޮތްތައް
- އާދައިގެ ގޮތުގައި ކެއުން: އެންމެ ސާދާ އަދި އާންމު ގޮތަކީ ކަދުރު އޮތްގޮތަށް ކެއުމެވެ. އެންމެ ރަނގަޅީ ފެން ނުވަތަ ކިރާއެކުގައެވެ.
- ކަދުރު މިލްކްޝޭކް: ކަދުރާއި ކިރު އެއްކޮށްލައިގެން ހަދާ މިލްކްޝޭކްއަކީ ހަކަތަ ލިބޭ އަދި ފައިދާހުރި އެއްޗެކެވެ. މިއީ ސުހޫރަށް ނުވަތަ އިފްޠާރަށް ވަރަށް ރަނގަޅު އެއްޗެކެވެ. 
- ކަދުރުގެ އެތެރެއަށް އެހެން އެއްޗެހި ލުން: ބަދަން ، އެލްމަންޑް ކެޝޫނަޓް ފަދަ ނަޓްތައް ނުވަތަ ފުރުޓް ފަދަ ތަކެތި ކަދުރުގެ އެތެރެއަށް ލުމުން އޭގެ  ފައިދާއާއި ރަހަ އިތުރުވެއެވެ.
- ކަދުރުން ހަދާ މީރު ކާނާ: ގިނަ ޘަޤާފަތްތަކުގައި ރަމަޟާން މަހަށް ޚާއްޞަކޮށް ކަދުރު ބާރސް، އެނަރޖީ ބޯލްސް އަދި ކޭކާއި ކުކީޒް ފަދަ ތަކެތި ހަދައެވެ.

ކަދުރަކީ ހަމައެކަނި މީރު މޭވާއެއް ނޫނެވެ. އެއީ އާދަކާދައިގެ، ޞިއްޙަތުގެ އަދި ރަހަމީރުކަމުގެ ނިޝާނެކެވެ. ކަދުރުގެ ގިނަގުނަ ފައިދާތަކުގެ ސަބަބުން އެއީ ރޯދަ ވީއްލުމަށް އެންމެ އެކަށީގެންވާ މޭވާއެވެ. އަދި ރޯދައަށް ހުރުމަށްފަހު ކެއުމަށް އާދަވުމަށް ވަރަށް ފަސޭހަ އެއްޗެކެވެ. މި ރަމަޟާން މަހު  ރޯދަ ވީއްލާއިރު، މި ސާދާ ނަމަވެސް ބާރުގަދަ ކާނާގެ ފަހަތުގައިވާ ޙިކުމަތް ހަނދާން ބަހައްޓާ ގިނައިން ކަދުރު ބޭނުން ކުރައްވާށެވެ.