އިޒްރާއިލުން ލުބްނާނަށް ވަރުގަދަ ހަމަލާތަކެއް ދެނީ!

އިޒްރާއިލުން ލުބްނާނަށް ވަރުގަދަ ހަމަލާތަކެއް ދެމުންއެބަދެއެވެ.

 އިޒްރާއިލްގެ މިހަމަލާތަކުގެ ސަބަބުން މިހާތަނަށް ލުބްނާންގެ 182 މީހަކު ވަނީ ޝަހީދުވެފައެވެ. ހަމަމިއާއި އެކު 700 އަށްވުރެ ގިނަ މީހުންނަށް ބޮޑެތި އަނިޔާތައް ވަނީ ލިބިފައެވެ. 

އަލްޖަޒީރާގައި ލުބްނާންގެ ޞިއްޙީ ވުޒާރާއާ ހަވާލާދީ ބުނެފައިވަނީ ޝަހީދުވި މީހުންނާއި އަނިޔާވި މީހުންގެ ތެރޭގައި ގިނަ ޢަދަދެއްގެ ކުޑަކުދިންނާއި އަންހެނުން އަދި ޕެރަމެޑިކްސް ހިމެނޭކަމަށެވެ. 

އަލްޖަޒީރާގައި ލުބްނާންގެ ރެޑްކްރެސެންޓަށް ހަވާލާދީ ބުނެފައިވަނީ ރެޑްކްރެސެންޓުގެ ރެސްކިޔު ޓީމު ތަކުން އިޒްރާއިލުން ހަމަލާތައް އަމާޒުކުރަމުންދާ ސަރަހައްދުތަކުން މީހުން ސަލާމަތްކުރުމުގެ މަސައްކަތް ފަށައިފައިވާކަމަށެވެ. 

އެގޮތުން ރެޑްކްރެސެންޓުގެ އެމްބިޔުލާންސްތައް ތައްޔާރީ ހާލަތުގައި ތިބި ކަމަށާއި ޒަޚަމްވާ މީހުންގެ ޢަދަދު މަތިވަމުން އަންނަ ކަމަށެވެ.

ލުބްނާންގެ ދެކުނު ސަރަހައްދަށް އިޒްރާއިލުން ހަމައެއް ލަމައެއް ނެތި ދެމުންދާ މިހަމަލާތަކުން ރައްކާތެރިވުމަށް ލުބްނާނުގެ ދެކުނު ސަރަހައްދުގައި ދިރިއުޅޭ މީހުން އެސަރަހައްދު ދޫކޮށް ރައްކާތެރި ހިސާބުތަކަށް މިހާރު ވަނީ ދަތުރުފަށައިފައެވެ. 

މިހަމަލާތަކާއި ގުޅިގެން އިޒްރާއިލުން ބުނެފައިވަނީ އިޒްރާއިލުން ލުބްނާނަށް މިހާތަނަށް 35 ރޮކެޓް އަމާޒުކޮށް ފޮނުވައިލައިފައިވާ ކަމަށެވެ.

އިޒްރާއިލްގެ ވަރުގަދަ ހަމަލާތަކާއި ގުޅިގެން ގެދޮރު ގެއްލި ވަގުތީ ބޯހިޔާވަހިކަމަށް ބޭނުންވެފައިވާ އެތައް ސަތޭކަ ބަޔަކު މިހާރުވެސް އެބަތިބިކަމަށް ލުބްނާންގެ ކަމާއި ބެހޭ އިދާރާތަކުން ހާމަކޮށްފައިވެއެވެ. މިހަމަލާތަކުގެ ބަދަލުގައި ލުބްނާންގެ ހިޒްބުއްﷲ އިން މިހާރު ވަނީ އިޒްރާއިލްގެ ދެ މިލިޓަރީ ބޭސްއަކަށް އަމާޒުކޮށް ހަމަލާތަކެއް ދީފައެވެ. މިހަމަލާތަކުގައި މީހަކަށް އަނިޔާއެއް ވިކަމެއް އަދި މީހަކު މަރުވިކަމެއް އަދި އެއް އެނގިފައެއް ނުވެއެވެ.