މަޖިލީހުގެ މަސައްކަތްތަކީ ހަަމައެކަނި ތަޅުމުގައި ކުރެވޭ މަސައްކަތުގެ މައްޗަށް ބިނާވެފައި އޮންނަ ކަމެއް ނޫން: އަބްދުއްރަޙީމް

މަޖިލީހުގެ މަސައްކަތްތަކީ ހަަމައެކަނި ތަޅުމުގައި ކުރެވޭ މަސައްކަތުގެ މައްޗަށް ބިނާވެފައި އޮންނަ ކަމެއް ނޫން ކަމަށް ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުﷲ ވިދާޅުވެއްޖެއެވެ.

މަޖިލީސްގެ ރައީސް މިފަދައިން ވިދާޅުވީ، މިއަދު އޮތް ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުންނެވެ.

އަބްދުއްރަޙީމް ވިދާޅުވީ، ރައްޔިތުންގެ މަޖިލީހުގެ ތަޅުމުގެ މަސައްކަތް ނިމުމަކީ މަޖިލީހުގެ މަސައްކަތް ނިމުމެއް ނޫން ކަމަށެވެ. މަޖިލީހުގެ ރައީސް މިދައިން ވިދާޅުވެފައި މިވަނީ އިއްޔެ ބޭއްވި ޖަލްސާ 30 މިނެޓް ތެރޭގައި ނިންމާލައިފި ކަމަށް ބުނެ ނޫހަކުން ޚަބަރެއް އާންމުކޮށްފައިވާ ދަނޑިވަޅެއްގައެވެ.

މިއަދުގެ ޖަލްސާގައި އަބްދުއްރަޙީމް ވިދާޅުވީ، މިއަދު ވެސް މަޖިލީހުގެ 5 ކޮމިޓީގެ މަސައްކަތް ހިނގަމުންދާނެ ކަމަށެވެ. އެހެންކަމުން، މަޖިލީހުގެ މަސައްކަތްތަކީ ހަމައެކަނި ތަޅުމުގައި ކުރެވޭ މަސައްކަތުގެ މައްޗަށް ބިނާވެފައި އޮންނަ ކަމެއް ނޫން ކަން އޭނާ ވަނީ ފާހަގަކުރައްވާފައެވެ. މީގެ އިތުރުން އަބްދުއްރަޙީމް ވިދާޅުވީ، މަޖިލީހުގެ މައިގަނޑު މަސައްކަތްތައް ކުރަނީ މަޖިލީހުގެ ކޮމިޓީތަކުގައި ކަމަށާއި އެއީ ވިސްނުން މުހިންމު ކަމެއް ކަމަށެވެ. އަދި 5 ކޮމިޓީތަކުގެ މަސައްކަތް ހިނގަމުންދާއިރު، ކޮމިޓީތަކަށް ބަރާބަރަށް މެމްބަރުން ތިބޭ ކަމުގައިވާނަމަ 55 މެމްބަރުން އެ ކޮމިޓީތަކުގެ މަސައްކަތްތަކުގައި އުޅޭނެކަން އަބްދުއްރަޙީމް ވަނީ ފާހަގަކުރައްވާފަ އެވެ. 

މަޖިލީހުގެ ރައީސް އަބްދުއްރަޙީމް ވިދާޅުވީ، ތަޅުމުގައި ކުރަންޖެހޭ މަސައްކަތްތައް އަވަހަށް ނިމުމަކީ މެމްބަރުންނަށް ކޮމިޓީތަކުގައި މަސައްކަތް ކުރުމަށް އިތުރު ވަގުތު ލިބިގެންދާނެ ކަމެއް ކަމަށެވެ.