ސާރބިއާގެ މަޖިލީހުގައި ހޫނުވެ ސްމޯކް ބޮން އުކުމުން ތިން މެންބަރަކަށް އަނިޔާވެއްޖެ

ސާރބިއާގެ ޤާނޫނު ހަދާ މަޖިލީހުގައި ހޫނުވެ، ސްމޯކް ބޮން އުކުމާއި ގުޅިގެން ތިން މެންބަރަކަށް އަނިޔާވެއްޖެއެވެ.

މި ހާދިސާ ހިނގާފައި މިވަނީ އެ ޤައުމުގެ މަޖިލީހުގައި މިއަދު ވޯޓަށް އެހުމަށް ތާވަލުކޮށްފައި އޮތް ބައެއް ބިލުތަކުގެ ސަބަބުންކަމަށް މީޑިއާ ރިޕޯޓުތައް ބުނެއެވެ. އެގޮތުން ސަރުކާރުން ބުނަމުން ދިޔައީ، މިއަދު މަޖިލީހުން ފާސްކުރަން މަސައްކަތްކުރީ ޔުނިވާސިޓީ ތަޢުލީމަށް ސަރުކާރުން ފޯރުކޮށްދޭ ފަންޑު އިތުރުކުރުމުގެ ބިލް ކަމަށާއި، ނަމަވެސް އިދިކޮޅުން ބުނީ، މަޖިލީހުގައި މެޖޯރިޓީ އޮތް ސަރުކާރުން މަސައްކަތްކުރީ، އެހެން ކަންކަމާ ގުޅުންހުރި ބިލުތަކެއް ފާސްކުރުމަށެވެ. 

މަޖިލީހުގައި ތިބި އިދިކޮޅު މެންބަރުން ބުނަމުން ދިޔައީ، ސަރުކާރަށް ތާޢީދުކުރާ މެންބަރުން ފުރަތަމަ ކުރަންވީކަމަކީ އެ ޤައުމުގެ ޕްރައިމް މިނިސްޓަރ، މިލޯސް ވުޗެވިކް މަޤާމުން ދުރުކުރުން ކަމަށެވެ.

މިއަދު އޮތް މަޖިލީހުގެ ޖަލްސާ ހޫނުވެގެން ދިޔައީ، ޖަލްސާ ފެށުނުތާ ގަޑިއެއްހާއިރު ފަހުންނެވެ. އެގޮތުން މަޖިލީހުގެ އަމާންކަން ނަގާލުމަށް އިދިކޮޅު މެންބަރުން ވަނީ ކަށިގަނޑު ފުމެފައެވެ. އަދި އެމީހުން ވަނީ، "ސާރބިއާ ތެދުވެއްޖެ، އެހެންވީމަ ވެރިކަން ދެން ޖެހޭނީ ވެއްޓެން"، މިހެން ޖަހައިގެން މަޖިލީހުގެ ތެރޭގައި ބެނާއެއް ވެސް ގެންގުޅެފައެވެ. މީގެ އިތުރުން، އިދިކޮޅުގެ އެތައް ސަތޭކަ ސަޕޯޓަރުންނެއް ދިޔައީ، މަޖިލިސް ކުރިޔަށް ދިޔަ ގަޑީގައި ބޭރުގައި ތިބެ އިހުތިޖާޖުކުރަމުންނެވެ. 

މަޖިލީހުހެ އެތެރެ ފެންނަ ގޮތަށް ނަގާފައިވާ ވީޑިއޯތަކުން ދައްކުވައިދޭ ގޮތުގައި، ސަރުކާރަށް ތާޢިދުކުރާ މެންބަރުންނާއި ސަރުކާރާއި އިދިކޮޅު މެންބަރުންގެ މެދުގައި ބަހުގެ ހަމަލާތަކެއް ކުރިއަށް ދިއުމަށްފަހު، އިދިކޮޅުން މަޖިލީހުގެ ތަޅުމަށް "ސްމޯކް ބޮން" އުކަންފެށިއެވެ. އަދި ސާރބިއާގެ ބައެއް ނޫސްތަކުން ބުނާ ގޮތުގައި، ބިހާއި ކުދި ފެންފުޅި ވެސް ވަނީ މަޖިލީހުގެ ތަޅުމަށް އުކާފައެވެ.

މި ހާދިސާއާ ގުޅިގެން އެއް މެންބަރަކަށް ފަރުވާ ދިނުމަށް ހޮސްޕިޓަލަށް ވެސް ގެންދަން ޖެހުނެވެ. އަދި މަޖިލީހުގެ ސްޕީކަރ މަޖިލިސް އޭރު ސިފަކުރީ "ޓެރަރިސްޓު ގޭންގް" އެއްގެ ގޮތަށެވެ.

ސާރބިއާގެ ޑިފެންސް މިނިސްޓަރ، ބްރަޓިސްލޭވް ގެސިޗް ވިދާޅުވީ، އެ ހަރަކާތަކީ މުޅި ޤައުމަށް ވެސް ހުތުރު ޢަމަލެއް ކަމަށެވެ. 

ސާރބިއާގެ މަޖިލީހުގައި ހިނގި މި ހާދިސާއިން ރަމްޒުކޮށްދެނީ، އެ ޤައުމުގައި ސިޔާސީ ހަމަނުޖެހުން އެފެދިފައި އޮތް މިންވަރެވެ. އެ ޤައުމުގެ ސަރުކާރާ ދެކޮޅަށް އިހުތިޖާޖުތައް ކުރިޔަށް ގެންދާތާ މިހާތު މަހެއްހާ ދުވަސް ވެއްޖެއެވެ. މަ އިހުތިޖާޖުތަކުގައި ގޮވާލަނީ، ނަޒާހަތްތެރިކަމެއް ނެތް ސަރުކާރުން ޤައުމު މިންޖުކުރުމަށެވެ. 

އަދި މި އިހުތިޖާޖުތައް ކުރިޔަށް ގެންދިއުމުގައި ބޮޑު ދައުރެއް އަދާކުރާ ދަރިވަރުންގެ އެންމެ ބޮޑު ޑިމާންޑަކީ ޔުނިވަސިޓީ ތަޢުލީމަށް ހޭދަކުރާ މިންވަރު ސަރުކާރުން އިތުރުކުރުމެވެ. 

އިދިކޮޅުން ބުނަމުން ދަނީ، ވަގުތީ ސަރުކާރެއް އުފެއްދުން މުހިންމު ކަމަށާއި، އެއަށްފަހު އިންތިހާބެއް ބާއްވަން ޖެހޭ ކަމަށެވެ.