ބޮޑު މޮޅަކާއެކު އާސެނަލްއަށް ޗެމްޕިއަންސް ލީގު ރެކޯޑެއް

ޗެމްޕިއަންސް ލީގުގެ ގަދަ-16ގައި ރޭ ނެދަލޭންޑްސްގެ ޕީއެސްވީ އެންދޯވެން އާއި އާސެނަލް ބައްދަލުކުރި މެޗު 7-1 އިން ކާމިޔާބުކޮށް، މުބާރާތުގެ ރެކޯޑެއް އާސެނަލް އައުކޮށްފިއެވެ. 

ޕީއެސްވީގެ ފިލިޕްސް ސްޓޭޑިއޯންގައި ކުޅުނު މި މެޗުގައި އެ ޓީމު ލަދުގަންނަވާލުމަށްފަހު އާސެނަލް މިވަނީ މުބާރާތުގެ ނޮކް-އައުޓް ބުރުގައި އިދިކޮޅު ޓީމުގެ ދަނޑުގައި އެންމެ ގިނަ ގޯލު ޖެހި ޓީމުގެ ރެކޯޑު އައުކޮށްފައެވެ.  

އަދި މިއީ 13 އަހަރަށްފަހު އެއް މެޗެއްގައި މިހާ ގިނަ ގޯލު އާސެނަލް ކާމިޔާބުކުރި ފުރަތަމަ ފަހަރުވެސް މެއެވެ. އެންމެ ފަހުން މި އަދަދަށް އެ ޓީމުން ގޯލު ކާމިޔާބުކުރީ ލީގު މެޗެއްގައި ނިއުކާސްލް ކޮޅަށެވެ. އެ މެޗުން އާސެނަލް މޮޅުވީ 7-3 އިންނެވެ.

ރޭގެ މެޗުގައި އާސެނަލް ވަނީ ފުރަތަމަ ހާފުގައި ތިން ގޯލު ކާމިޔާބުކޮށްފައެވެ. އެގޮތުން މެޗުގެ 18 ވަނަ މިނެޓުގައި ޖުރިއެން ޓިމްބަރ އެ ޓީމަށް ލީޑު ނަގައިދިންއިރު، އޭގެ ތިން މިނެޓު ފަހުން އީތަން ނުވަނޭރީ ވަނީ އާސެނަލްއަށް ލީޑު ފުޅާކޮށްދީފައެވެ. އަދި މެޗުގެ 31 ވަނަ މިނެޓުގައި މިކޭލް މޮރީނޯ ކާމިޔާބުކުރި ގޯލަކާއެކު އާސެނަލް ތިން ގޯލުގެ ލީޑެއް ނެގިއެވެ.

ޕީއެސްވީއިން އާ އުއްމިދަކާއެކު ފުރަތަމަ ހާފު ނިންމާލީ، ހާފު ނިމެން ދެ މިނެޓަށް ވެފައިވަނިކޮށް އެ ޓީމަށް ލިބުނު ޕެނަލްޓީއެއް ކާމިޔާބު ކުރެވުމުންނެވެ. މި ޕެނަލްޓީ އެ ޓީމަށް ކާމިޔާބުކޮށްދިނީ ނޮއާ ލާންގްއެވެ.

ނަމަވެސް ދެވަނަ ހާފު ފަށައިގެން މާގިނައިރުތަކެއްނުވެ، އާސެނަލްއިން މުޅި މެޗު އަނބުރާލިއެވެ. އެގޮތުން 47 ވަނަ މިނެޓާއި 48 ވަނަ މިނެޓުގައި މާޓިން އޮޑެގާޑް އާއި ލިސާންޑްރޯ ޓްރޮސަޑް ކާމިޔާބުކުރި ގޯލުތަކުން، ޕީއެސްވީ ކުޅުންތެރިންގެ ހިތްވަރު އެއްކޮށް މަރާލިއެވެ. 

އާސެނަލްގެ 6 ވަނަ ގޯލު މެޗުގެ 73 ވަނަ މިނެޓުގައި އޮޑެގާޑް ކާމިޔާބުކުރިއިރު، އެ ޓީމުގެ ފަހު ގޯލު ކާމިޔާބުކުރީ މެޗު ނިމެން 5 މިނެޓަށްވެފައި ވަނިކޮށް ރިކާޑޯ ކެލިފިއޯރީއެވެ. 

މި މެޗަށްފަހު ވާހަކަ ދައްކަމުން އާޓޭޓާ ބުނީ، މި ނަތީޖާއާ ގުޅިގެން އެންމެ އުފާވަނީ، ކުއާޓާ ފައިނަލަށް ދިއުމަށް އޮތް ފުރުސަތު ބޮޑުކަމުން ކަމަށެވެ. 

މި ނަތީޖާއަކީ ހަމަގައިމު ވެސް އާޓޭޓާ އުއްމީދުކުރި ނަތީޖާއަކަށް ނުވާނެއެވެ. ސަބަބަކީ އެ ޓީމު އެންމެ ފަހުން ކުޅުން ދެ މެޗުގައި ވެސް ގޯލެއް ކާމިޔާބު ކުރެވިފައި ނުވުމެވެ. އެގޮތުން ނޮޓިންހަމް ފޮރެސްޓްއާ ދެކޮޅަށް ކުޅުނު މެޗުން 0-0 އިން އެއްވަރުވިއިރު، ވެސްޓް ހޭމް މެޗުން ވަނީ 1-0 އިން ބަލިވެފައެވެ.