ޗެމްޕިއަންސް ލީގު: މެޑްރިޑުގައި ކުރި ހޯދީ ރެއާލް

ޗެމްޕިއަންސް ލީގުގެ ގަދަ-16ގައި ސްޕެއިންގެ މެޑްރިޑަށް ނިސްބަތްވާ އެތުލެޓިކޯ މެޑްރިޑާއި ރެއާލް މެޑްރިޑް ބައްދަލުކުރި މެޗުން ރެއާލް ކުރިހޯދައިފިއެވެ.

މެޗުގެ 4 ވަނަ މިނެޓުގައި ރެއާލުން ވަނީ ލީޑު ނަގާފައެވެ. ފެޑެރިކޯ ވަލްވާރޑޭ ދިން ތުރޫ ޕާހެއް ހޯދައި، އެތުލެޓިކޯގެ ވާތް ފަރާތުން ގޮސް ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ދުރުކަނަށް ފޮނުވާލައިގެން މި ގޯލު ކާމިޔާބުކޮށްދިނީ ރޮޑްރީގޯއެވެ.

މި ގޯލާއެކު ރެއާލް ކުރީގައި އޮއްވައި، އެ ޓީމުގެ ލީޑު ގެއްލުވާލީ މެޗުގެ 28 ވަނަ މިނެޓުގައި ހޫލިއަން އަލްވަރޭޒް ކާމިޔާބުކުރި މޮޅު ގޯލަކުންނެވެ. ރެއާލްގެ ކަނާތް ފަރާތުން ޕެނަލްޓީ އޭރިއާގެ ބޭރުން ކަމަވިންގާ ކައިރިން ނައްޓާލުމަށްފަހު، ޕެނަލްޓީ އޭރިއާ ތެރެއަށް މާބޮޑަށް ނުވަދެ، ކަނާތުފައިގެ އެތެރެއިން ޖަހާ ފޮނުވާލި ބޯޅަ، ރެއާލްގެ ގޯލްކީޕަރ، ތިއާބަތު ކޯޓްވާރގެ ބޯމަތިން ގޮސް އޮއްސުނީ ގޯލުގެ ތެރެއަށެވެ. މިއީ އެތުލެޓިކޯގެ ޖާޒީގައި އަލްވަރޭޒް އެންމެ ފަހުން ކުޅުނު 7 މެޗުން ކާމިޔާބުކުރި 6 ވަނަ ގޯލެވެ.

މެޗުން މޮޅުވި ގޯލު ރެއާލަށް ކާމިޔާބުކޮށްދިނީ ބްރާހިމާ ދިއާޒްއެވެ. ދެވަނަ ހާފުގެ 9 ވަނަ މިނެޓުގައި އެތުލެޓިކޯގެ ޕެނަލްޓީ އޭރިއާ ތެރެއިން ބޯޅަ ހޯދުމަށްފަހު، ޑިފެންޑަރުންތައް ގިނަވެފައި އޮއްވައި އެންމެންގެ ތެރެއިން އެ ބޯޅަ ދުރުކަނަށް ފޮނުވާލިއިރު، އެތުލެޓިކޯގެ ގޯލްކީޕަރ، ޔާން އޮބްލަކްއަށް ހުރީ ހަރަކާތް ކުރަން ނޭންގިފައެވެ. 

ދިއާޒް މި މެޗަށް ނެރުނީ، ރެއާލްގެ ޖޫޑް ބެލިންހަމް އެއް މެޗުގެ ސަސްޕެންޝަނެއްގައި ހުރުމުން އޭނާގެ ބަދަލުގައެވެ. މިއީ މެންޗެސްޓާ ސިޓީ މެޗުގައި ބެލިންގްހަމްއަށް ދެއްކި ތިންވަނަ ރީނދޫ ކާޑާ ގުޅިގެން އޭނާއަށް އައި ސަސްޕެންޝަނެކެވެ.