ޚަބަރު
ރަޖިސްޓްރާ އޮފް ކޮމްޕެނީޒްގެ މަޤާމުން ވިސާމް އިސްތިއުފާ ދެއްވައިފި

ވިސާމް ވަނީ 10 އަހަރަށް ވުރެ ގިނަ ދުވަހު ރަޖިސްޓްރާ އޮފް ކޮމްޕެނީޒްގެ މަޤާމު އަދާކުރައްވާފައި---
ހުލާސާ
މަޤާމަށް އައްޔަން ކުރެއްވީ 28 ޖެނުއަރީ 2014ގައި ރައީސް އަބްދުﷲ ޔާމީން އަބްދުލް ޤައްޔޫމް.
ރަޖިސްޓްރާ އޮފް ކޮމްޕެނީޒްގެ މަޤާމުން ގަލޮޅު ސައިމާ އަލްފާޟިލާ މަރްޔަމް ވިސާމް އިސްތިއުފާ ދެއްވައިފިއެވެ. މިއީ މިނިސްޓަރުގެ ނާއިބު ފެންވަރުގެ މަޤާމެކެވެ.
މި މަޤާމުން ވިސާމް އިސްތިއުފާ ދެއްވިއިރު، އޭނާ ވަނީ 10 އަހަރަށް ވުރެ ގިނަ ދުވަހު މި މަޤާމުގައި މަސައްކަތްކުރައްވާފައެވެ.
ރައީސް އަބްދުﷲ ޔާމީން އަބްދުލް ޤައްޔޫމްގެ ވެރިކަމުގައި ރެޖިސްޓްރާ އޮފް ކޮންޕެނީޒްގެ މަޤާމަށް އައްޔަން ކުރެއްވި ވިސާމް ވަނީ އޭނާ އިސްތިއުފާ ދެއްވިކަން ބައެއް މީޑިއާތަކަށް ކަށަވަރުކޮށްދެއްވާފައެވެ.
އަދި އިސްތިއުފާ ދެއްވީ އަމިއްލަ ވިޔަފާރިތަކުގެ ދާއިރާގައި މަސައްކަތް ކުރެއްވުމަށްކަމަށް ވެސް ވިދާޅުވެފައި ވެއެވެ.
28 ޖެނުއަރީ 2014ގައި މި މަޤާމަށް އައްޔަން ކުރެވުނު ފަހުން، ވިސާމްވަނީ ރައީސް އިބްރާޙިމް މުޙައްމަދު ޞާލިޙުގެ ވެރިކަމުގައި ވެސް އެ މަޤާމުގައި ހުންނަވާފައެވެ.
ވިސާމް މާސްޓަރޒް ޑިގްރީ ޙާޞިލު ކުރައްވާފައިވަނީ އޮސްޓްރޭލިއާގެ ޔުނިވަރސިޓީ އޮފް ކްއީންސްލެންޑުން، ބިޒްނަސް އިކޮނޮމިކްސްގެ ދާއިރާއިންނެވެ. އަދި އޭނާ ބެޗެލަރޒް ޑިގްރީ ޙާޞިލު ކުރައްވާފައިވަނީ އިނގިރޭސިވިލާތުގެ ޔުނިވަރސިޓީ އޮފް ނޮރދަންބްރިއާއިން މާކެޓިންގ މެނޭޖްމަންޓުގެ ދާއިރާއިންނެވެ.
ރަޖިސްޓްރާ އޮފް ކޮމްޕެނީޒްގެ މަޤާމަށް އައްޔަން ކުރެއްވުމުގެ ކުރިން ވިސާމް ހުންނެވީ ކެޕިޓަލް މާކެޓް ޑިވެލޮޕްމަންޓް އޮތޯރިޓީގެ ޑިރެކްޓަރ ޖެނެރަލް ކަމުގެ މަޤާމުގައެވެ. އޭގެ ކުރިން، އެތާނގެ މެނޭޖަރު ކަމުގެ މަޤާމާއި، ޑެޕިއުޓީ މެނޭޖަރު ކަމުގެ މަޤާމުވެސް އޭނާ އަދާކޮށްފައިވެއެވެ.