މެލޭޝިއާއިން ގެއްލުނު ދިވެހި ޒުވާނާ މެލޭޝިއާ ފުލުހުންގެ ބެލުމުގެ ދަށުގައި

 މެލޭޝިއާއިން ގެއްލިގެން ހޯދަމުންދިޔަ ދިވެހި ޒުވާނާ އަހުމަދު އުސައިދު އިބްރާހީމް އަފީފް މިހާރު ހުރީ މެލޭޝިޔާ ފުލުހުންގެ ބެލުމުގެ ދަށުގައެވެ. ފުލުހުން އުސައިދު ގެންގޮސްފައިވީ ނަމަވެސް، އޭނާ ހައްޔަރުކުރި ސަބަބު އަދި ހާމަކޮށްފައެއް ނުވެއެވެ. 

އުސައިދުގެ ބައްޕަ އިބްރާހީމް އަފީފް މައުލޫމާތު ދެއްވިގޮތުގައ، އުސައިދު އެންމެ ފަހުން ފެނިފައި ވަނީ މިދިޔަ އާދިއްތަ ދުވަހުގެ މެންދުރުފަހު 15:15 ގައި ސަންވޭ ޖީއޯ ސަރަހައްދުންނެވެ. އެއަށްފަހު އުސައިދުގެ އެއްވެސް ޚަބަރެއް ނުލިބުމާ ގުޅިގެން، އެރޭ 22:00 ގައި މެލޭޝިއާ ފުލުހުންނަށް މައްސަލަ ރިޕޯޓުކޮށްފައިވާ ކަމަށް އުސައިދުގެ ބައްޕަ ބުނެފައިވެއެވެ.

މެލޭޝިއާގައި ހުންނަ ދިވެހިރާއްޖޭގެ ހައި ކޮމިޝަނުން ވެސް މި މައްސަލައިގައި މަސައްކަތްތަކެއް ކުރަމުން ގޮސްފައިވާއިރު، ސީސީޓީވީ ފުޓޭޖްތަކުން ދައްކާގޮތުން، އުސައިދު އާދިއްތަ ދުވަހުގެ 16:00 އެހާކަށްހާއިރު ރާއްޖޭގެ އެމްބަސީއަށް ވަނީ ޒިޔާރަތްކޮށްފައެވެ. ނަމަވެސް އެދުވަހަކީ ބަންދު ދުވަހަކަށްވުމާއެކު، އެމްބަސީގެ އެއްވެސް މުވައްޒަފަކާ ބައްދަލުކުރެވިފައެއް ނުވެއެވެ.

އުސައިދު ހުރީ ހެޔޮ ހާލުގައިކަން ޔަޤީންވެފައި ވާކަމަށް އުސެއިދުގެ ބައްޕަ މަޢުލޫމާތު ދެއްވައެވެ.