ރަމަޟާން މަހު 10ގެ ކުރިން ރޯދަ ހަދިޔާ ބަހައި ނިންމުމަށް އަމާޒު ހިފައިފި

ރަމަޟާން މަހު 10ގެ ކުރިން ރޯދަ ހަދިޔާ ބަހައި ނިންމުމަށް އަމާޒު ހިފާފައިވާކަމަށް، ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު ވިދާޅުވީ، މިހާރު އަތޮޅު ތެރެއިން ރޯދަ ހަދިޔާ ނުފޯރާ އޮތީ ދެ އަތޮޅު ކަމަށެވެ. އެގޮތުން ބާކީ އޮތް ގއ އަތޮޅާއި ގދ އަތޮޅަށް މާދަމާ އެ ތަކެތި ފޯރާނެކަމަށް ވެސް ވަޒީރު ވިދާޅުވިއެވެ. 

އަދި މި ދެ އަތޮޅަށް ފޯރުމުން، މުޅި ރާއްޖެއަށް ރޯދަ ހަދިޔާ ބަހައި ނިމުނީ ކަމަށް އެ މަނިކުފާނު ވަނީ ވިދާޅުވެފައެވެ.

އަމާޒަކީ މާރިޗު 10 ގެ ނިޔަލަށް މާލޭގައި ރޯދަ ހަދިޔާ ބަހައި ނިންމުން. މާދަމާ ގއ. އަދި ގދ. އަތޮޅުގެ ހުރިހާ ރަށަކަށް ރޯދަ ހަދިޔާ ފޯރާނެ. އޭރުން މުޅި ރާއްޖެ ކަވަރވީ.

ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވިއެވެ.

ރޯދަ މަސް ފެށުނު ފަހުން މަސްދަޅު ކޭސް ދޫކުރަމުން އަންނަނީ ރޭގަނޑު 9:30 އިން 11:30 އަށެވެ. 

އެސްޓީއޯއިން ހާމަކޮށްފައިވާ ގޮތުގައި މަސްދަޅު ކޭސް ލިބޭނީ ހަމައެކަނި ދިވެހީންނަށެވެ. އަދި މަސްދަޅު ކޭސް ބަލާ ދާ މީހާގެ އައިޑީ ކާޑާއި ކަރަންޓް ބިލުގެ ކޮޕީއެއް ގެންދިއުން މުހިންމުކަމަށް އެސްޓީއޯއިން ވަނީ ހާމަކޮށްފައެވެ.

ރޯދަ ހަދިޔާ 2025ގެ ގޮތުގައި ސަރުކާރުން އަންނަނީ ކޮންމެ ގޭބީސީއަކަށް 180 ގްރާމްގެ 48 ދަޅުގެ މަސްދަޅު ކޭހެއް ދޫކުރަމުންނެވެ.