ސަލާޙްގެ ބަދަލުގައި ކުޅެން ނިކުމެ ފުރަތަމަ ޓަޗުން ލިވަޕޫލް މޮޅުކޮށްދީފި

މި ސީޒަންގައި އެއް ފެންވަރެއްގައި ކުޅުން ހިފަހައްޓަމުން އަންނަ މުޙައްމަދު ސަލާޙްގެ ބަދަލުގައި ކުޅެން ނިކުމެ، ހާވީ އެލިއަޓް އޭނާގެ ފުރަތަމަ ޓަޗުން ލިވަޕޫލް 1-0 އިން މޮޅުކޮށްދީފިއެވެ.

ޗެމްޕިއަންސް ލީގުގެ ގަދަ-16ގެ ފުރަތަމަ ލެގުގައި ލިވަޕޫލްއާ ދެކޮޅަށް ކުޅެ، މެޗު މުޅިންހެން ޑޮމިނޭޓްކުރި ޕެރިސް ސެއިންޓް-ޖަމެއިން، ޕީއެސްޖީއަށް މިއީ ޤަބޫލުކުރަން ދަތި ބައްޔެކެވެ. އެ ޓީމުން މުޅި މެޗުގައި 27 ޝޮޓް ލިވަޕޫލްގެ ގޯލަށް ފޮނުވާލިއިރު، ލިވަޕޫލްގެ ގޯލު ދިފާއުކުރުމަށް އެ ޓީމުގެ ގޯލްކީޕަރ، އެލިސަން ބެކާރ ވަނީ ނުރައްކާތެރި 9 ހަމަލާއެއް މަތަކޮށްފައެވެ.  

ލިވަޕޫލުން މެޗުގައި ލީޑު ނެގީ، މެޗު ނިމެން ތިން މިނެޓަށްވެފައި ވަނިކޮށް އެ ޓީމުން މުޅި މެޗުގައި ވެސް ހެދި ދެވަނަ ޝޮޓުގައެވެ.

ލިވަޕޫލުން ލީޑު ނެގި ގޯލަކީ، އެލިސަން ކުރިޔަށް ކުޅުނު ބޯޅައަކުން އެ ޓީމުން ތަނަވަސްކުރި ފުރުސަތެކެވެ. އެ ބޯޅަ ހޯދުމަށްފަހު ކަނާތް ފަރާތުން ކުރިއަށް ދުވެފައި އައި އެލިއަޓްއަށް ބޯޅަ ރީއްޗަށް ސެޓްކޮށްދިނީ ޑާވިން ނުނޭޒްއެވެ. އަދި އެލިއެޓް ފޮނުވާލި ބޯޅަ ގޮސް ގޯލަށްވަނީ، ޖިއަންލޫޖީ ޑޮނަރުއްމާގެ އަތުގައި ޖެހުމަށްފަހު ދުރު ކަނަށެވެ. 

ޕީއެސްޖީގެ ފޯވާޑް، ކްވިޗާ ވަޓްޝެލިއާ އެ ޓީމަށް މި މެޗުގައި ގޯލެއް ކާމިޔާބުކޮށްދީފައި ވެއެވެ. ނަމަވެސް ވީޑިއޯ އެސިސްޓެންޓް ރެފްރީ ނިންމީ އެއީ އޮފްސައިޑް ގޯލެއް ކަމަށެވެ. 

މި ދެ ޓީމު ލިވަޕޫލްގެ ދަނޑުގައި ކުޅޭ ދެވަނަ ލެގު އޮންނާނީ މި އަންނަ ހަފްތާގެ އަންގާރަ ދުވަހެވެ.