ފެބްރުއަރީ މަހު ރާއްޖެއަށް އެންމެ ގިނަ ފަތުރުވެރިން ޒިޔާރާތްކުރީ އިނގިރޭސީވިލާތުން: އިމިގްރޭޝަން

ނިމިގެން ދިޔަ ފެބުރުވަރީ މަހު ރާއްޖެއަށް އެންމެ ގިނައިން ޒިޔާރަތްކޮށްފައި ވަނީ އިނގިރޭސިވިލާތުގެ ފަތުރުވެރިންކަން އިމިގްރޭޝަނުން ހާމަކޮށްފިއެވެ.

އިމިގްރޭޝަނުން މިއަދު އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ މަހު ރާއްޖެއަށް ޒިޔާރަތްކުރީ 214،091 ފަތުރުވެރިންނެވެ. 2024 ވަނަ އަހަރުގެ ފެބުރުވަރީ މަހު ރާއްޖެ އައިސްފައިވަނީ 217،391 ފަތުރުވެރިންނެވެ.

މިދިޔަ މަހު އެވަރެޖުކޮށް ދުވާލަކު 7،646 ފަތުރުވެރިން ރާއްޖެ އައިސްފައިވާއިރު، އެއް ދުވަހެއްގައި އެންމެ ގިނައިން އައިސްފައި ވަނީ 9،518 ފަތުރުވެރިންނެވެ. އަދި ދުވާލަކު އެންމެ މަދުން ޒިޔާރަތްކޮށްފައިވަނީ 5،479 ފަތުރުވެރިންނެވެ.

އިނގިރޭސި ވިލާތުގެ 23،210  ފަތުރުވެރިން މިދިޔަ މަހު ރާއްޖެ އައިސްފައިވާއިރު، ލިސްޓުގެ ދެވަނައިގައި އޮތް ޗައިނާއިން އައިސްފައިވަނީ 21،928 ފަތުރުވެރިންނެވެ. އަދި ތިންވަނައިގައި އޮތް ރަޝިއާއިން އައީ 20،649 ފަތުރުވެރިންނެވެ.

މިދިޔަ ފެބުރުވަރީ މަހުގެ ނިޔަލަށް ރާއްޖެ އައި ފަތުރުވެރިންގެ އަދަދަކީ 428،954 އެވެ.