ދުނިޔެ
އަންހެނުންގެ ޙައްޤުތައް ރައްކާތެރިކުރުމަށް ކުރިމަތިވާ ގޮންޖެހުންތައް އިތުރުވެއްޖެ: އ.ދ ގެ ރިޕޯޓު

އަންހެނުންގެ ހައްޤުތަކާއި ގުޅޭ ހިނގާލުމެއްގެ ތެރެއިން ފޮޓޯ:އިންޓަނެޓް
ހުލާސާ
ދުނިޔޭގެ އެކި ގައުމުތަކުގައި އަންހެނުންގެ ޙައްޤުތަކަށް ލިބެމުންދާ އުނިކަން އިތުރުވަމުންދާކަމަށް އ.ދ އިން ބުރާސްފަތި ދުވަހު ނެރުނު ރިޕޯޓެއްގައި ފާހަގަކޮށްފިއެވެ. މިގޮތުން ފާއިތުވި އަހަރު ދުނިޔޭގެ ހަތަރުބައިކުޅަ އެއްބައި ގައުމުތަކުގައި އަންހެނުންގެ ޙައްޤުތަކަށް އުނިކަން ލިބިފައިވާކަމަށް ރިޕޯޓުގައި ބަޔާންކޮށްފައިވެއެވެ.
އ.ދ ގެ "ޔޫއެން ވިމެން" އިން ނެރުނު މި ރިޕޯޓުގައި، މޫސުމަށް އަންނަ ބަދަލުތަކާއި ޑިމޮކްރަސީއަށް ކުރިމަތިވާ ގޮންޖެހުންތަކުގެ ސަބަބުން އަންހެނުންގެ ޙައްޤުތަކަށް ނޭދެވޭ އަސަރުކުރަމުންދާކަން ފާހަގަކޮށްފައިވެއެވެ. އަދި 1995 ވަނަ އަހަރު ބޭއްވުނު އަންހެނުންގެ ބައިނަލްއަޤްވާމީ ބައްދަލުވުމުގައި އެއްބަސްވި ކަންކަން ތަންފީޒުކުރުމަށް ހުރަސްތަކެއް ކުރިމަތިވަމުންދާކަމަށްވެސް ރިޕޯޓުގައި ބުނެފައިވެއެވެ.
ރިޕޯޓުގައި ފާހަގަކޮށްފައިވާ ގޮތުގައި، ފާއިތުވި 10 އަހަރުގެ ތެރޭގައި ހަނގުރާމަތަކާ ގުޅިގެން ހިންގޭ ޖިންސީ އަނިޔާތައް 50 އިންސައްތަ އިތުރުވެފައިވެއެވެ. މީގެ 95 އިންސައްތައަކީ ކުޑަކުދިންނާއި ޒުވާން އަންހެނުންނެވެ. އަދި 2023 ވަނަ އަހަރު، 612 މިލިއަން އަންހެނުން ދިރިއުޅެމުން ގެންދަނީ ހަނގުރާމަވެރި ސަރަޙައްދުތަކާ ކައިރީގައެވެ.
ރިޕޯޓުގައި އިތުރަށް ފާހަގަކޮށްފައިވާ ގޮތުގައި، ދުނިޔޭގެ ފެންވަރުގައި ކޮންމެ ތިން އަންހެނުންގެ ތެރެއިން އެކަކަށް ޖިސްމާނީ ނުވަތަ ޖިންސީ އަނިޔާ ކުރިމަތިވެއެވެ. މި މައްސަލަތައް ހައްލުކުރުމަށް އައު ޓެކްނޮލޮޖީތަކުގެ ބޭނުން ހަމަހަމަކަމާއެކު ހިފުމާއި، މޫސުމީ އިންސާފު ޤާއިމުކުރުމާއި، ފަގީރުކަން ނައްތާލުމަށް އިންވެސްޓްކުރުމާއި، އަންހެނުންނަށް ކުރިމަތިވާ އަނިޔާތައް ހުއްޓުވުމަށް މަސައްކަތްކުރުން މުހިންމުކަމަށް ރިޕޯޓުގައި ބަޔާންކޮށްފައިވެއެވެ.