ޚަބަރު
ރީނދޫ ސަމާލު ނެރެފައި އޮށްވާ ދަތުރުކުރަނިކޮށް އަޑިއަށް ދިޔަ ލޯންޗުގައި ލައިފްޖެކެޓް ދިނީ ދިޔަވާން ފެށުމުން

"ހުވަން" ލޯންޗުން ދަތުރުކުރި މީހުން ކަނޑުވެފައި ތިއްބާ ފުލުހުން ސަލާމަތްކުރަނީ، ފޮޓޯ: ފުލުހުން
މިދިޔަ އާދީއްތަ ދުވަހު މެދުރާއްޖެ ތެރެއަށް ރީނދޫ ސަމާލު ނެރެފައި އޮށްވާ އަދ. ދިގުރަށުން މާލެ ދަތުރުކުރަނިކޮށް އަޑިއަށް ދިޔަ "ހުވަން" ލޯންޗުގައި ލައިފްޖެކެޓް ދިނީ ދިޔަވާން ފެށުމުންކަމަށް، އެ ލޯންޗުން ދަތުރުކުރި ފަތުރުވެރިއަކު ނަގާފައިވާ ވީޑިއޯއަކުން އެނގިއްޖެއެވެ.
މި ހާދިސާގެ ރިޕޯޓު ފުލުހުންނަށް އެ ދުވަހުގެ ހެނދުނު 7:57ގައި ލިބިގެން އެ ސަރަޙައްދަށް ގޮސް، އެ ލޯންޗުން ދަތުރުކުރި އެންމެން ވަނީ ސަލާމަތްކޮށްފައެވެ. މަޢުލޫމާތު ލިބިފައިވާ ގޮތުގައި އޭރު ލޯންޗުން ދަތުރުކުރަމުން ދިޔައީ މުޅިން ވެސް ފަތުރުވެރިންނެވެ. އަދި އޭގައި 45 ފަސިންޖަރުންނާއި 3 ފަޅުވެރިން ތިއްބެވެ. ފަސިންޖަރުންގެ ތެރޭގައި 4 ކުޑަކުދިން ވެސް ހިމެނެއެވެ.
ފަތުރުވެރިޔާ ރެކޯޑުކޮށްފައިވާ އެ ހާދިސާގެ މަންޒަރުތައް ދުނިޔޭގެ މީޑިއާއަކުން ހިއްސާކޮށްފައިވާއިރު، އެ ވީޑިއޯއިން ފެންނަނީ ލޯންޗަށް ދިޔަވާން ފެށުމުން ފަސިންޖަރުންނާއި ފަޅުވެރިން ވެގެން ލައިފް ޖެކެޓުތައް ބަހާ މަންޒަރެވެ. އަދި ލައިފް ޖެކެޓުތައް ބަހަން ފެށިއިރު އެ ތަކެތު ހުރީ ލޯންޗުގެ ހޮޅި ދަނޑިއެއްގައި އަޅުވާފައެވެ.
ނަމަވެސް ޤާނޫނު ބުނާގޮތުން، ކަނޑުދަތުރު ފަތުރުކުރާއިރު ފަސިންޖަރުންނާއި ފަޅުވެރިން ތިބެން ޖެހޭނީ ލައިފް ޖެކެޓު އަޅައިގެންނެވެ.
މި ހާދިސާ ހިނގިއިރު އެ ލޯންޖުގައި އިން ފަތުރުވެރިޔަކުކޮށްފައިވާ ވީޑިއޯއިން، އެ މީހުން ކަނޑުވެފައި ތިއްބާ ފުލުހުން އައިސް ސަލާމަތްކުރާ މަންޒަރު ވެސް ފެނެއެވެ.