ބިދޭސީންގެ ބައޯމެޓްރިކްސް ނެގުމަށް ޚާއްޞަ އިތުރު 2 ސެންޓަރެއް

ރާއްޖޭގައި އުޅެމުންދާ ބިދޭސީންގެ ބަޔޯމެޓްރިކްސް ނެގުމަށް ޚާއްޞަ އިތުރު 2 ސެންޓަރެއް ޤާއިމްކޮށްފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވެއްޖެއެވެ. 

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިފަދައިން ވިދާޅުވީ، މިކަމާއި ބެހޭ ގޮތުން އެ ވުޒާރާއިން ޢާންމުކޮށްފައިވާ އިޢުލާނެއްގައެވެ. 

އެ ވުޒާރާއިން ކުރި އިޢުލާނުގައި ވިދާޅުވީ، ރާއްޖެގައި މަސައްކަތްކުރަމުންދާ އެންމެހާ ބިދޭސީންގެ ބައޯމެޓްރިކްސް އަޕްޑޭޓުކުރުމަށް އެންސީއައިޓީ ގައި ޤާއިމްކޮށްފައިވާ ޖޮއިންޓް އޮޕަރޭޝަން ސެންޓަރާއި ނޯތު ހާބަރު ސަރަޙައްދުގައި ޤާއިމްކޮށްފައިވާ ޑެސްކްގެ އިތުރުން އެހެން ޑެސްކެއް އިތުރުކޮށްފައިވާ ކަމަށެވެ. އެގޮތުން، މިހާރު ވަނީ ކަލާފާނު ސްކޫލް ހޯލްގައި ބައޯމެޓްރިކްސް ނެގުމުގެ އިންތިޒާމު ހަމަޖެއްސެވުމަށް ނިންމަވާފައިވާ ކަމަށް އެ ވުޒާރާއިން ވިދާޅުވިއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވީ، ކަލާފާނު ސްކޫލްގެ ހޯލުގައި މި މަހުގެ 9 ވަނަ ދުވަހުން ފެށިގެން ޝައްވާލު މަހުގެ 7 ވަނަ ދުވަހާއި ހަމައަށް ހުކުރުދުވަސް ފިޔަވައި ކޮންމެ ދުވަހަކު ބަޔޯމެޓްރިކްސް ނެގުން އޮންނާނެ ކަމަށެވެ. އެގޮތުން، މި މަސައްކަތް ކުރިއަށްދާނީ ހެނދުނު 09:30 އިން 16:00 އަށް އަދި ރޭގަނޑު 21:30 އިން 23:30 އާއި ހަމައަށް ކަމަށް އެ ވުޒާރާއިން މަޢުލޫމާތުދެއްވަ އެވެ. 

މީގެ އިތުރުން އެ ވުޒާރާއިން ވިދާޅުވީ، ވަޒީފާދޭ ފަރާތްތަކާއި ގާތުން ހަލުވިކަމާއި އެކު މި އޮޕަރޭޝަން ކުރިއަށް ގެންދިޔުމަށް މަސައްކަތް ކުރައްވާ ކަމަށެވެ. އެގޮތުން، މިއަދުން ފެށިގެން ޝައްވާލު މަހުގެ 7 ވަނަ ދުވަހާއި ހަމައަށް ހުކުރުދުވަސް ފިޔަވައި ކޮންމެ ދުވަހަކު ރޭގަނޑު 21:30 އިން 00:30 އަށް ބަޔޯމެޓްރިކްސް އަޕްޑޭޓްކުރުން އޮންނާނެ ކަމަށް އެ ވުޒާރާއިން ވިދާޅުވިއެވެ. އެ ވުޒާރާއިން ވިދާލުވީ، މި މަސައްކަތް ކުރިއަށް ދާނީ ހުޅުމާލެ ފޭސް 1 ގެ ރެހެންދި ސްކޫލް ހޯލްގައި ކަމަށެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިންނާއި މޯލްޑިވްސް އިމިގްރޭޝަނުން ގުޅިގެން ވަނީ "އޮޕަރޭޝަން ކުރަނގި" ގެ ނަމުގައި ޚާއްޞަ އޮޕަރޭޝަނެއް މިދިޔަ އަހަރު ފަށައިފައެވެ. މި އޮޕަރޭޝަންގެ ދަށުން ރާއްޖޭގައި މަސައްކަތް ކުރަމުންދާ ބިދޭސީންގެ ފިންގާ ޕްރިންޓާއި ފޮޓޯ އަދި މައުލޫމާތު އެއްކުރުމުގެ މަސައްކަތް ދަނީ ކުރަމުންނެވެ.