ޚަބަރު
ޕީއެންސީގެ ފުރަތަމަ އިޙްޔާ ފޯރަމް ހުކުރު ދުވަހުގެ ރޭ، ތަޤުރީރު ކުރައްވާނީ ވަޒީރު ޑރ. ޝަހީމް

އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު/ފޮޓޯ: މެންދުރު
މިއަހަރުގެ ރަމަޟާން މަހަށް ޚާއްޞަކޮށް ޕީޕަލްސް ނޭޝަނަލް ކޮންގުރެސް، ޕީއެންސީން ކުރިއަށް ގެންދިޔުމަށް ހަމަޖެހިފައިވާ އިޙްޔާ ފޯރަމް ސިލްސިލާގެ ފުރަތަމަ ފޯރަމް އަންނަ ހުކުރު ދުވަހު (މާދަމާ) ބޭއްވުމަށް ހަމަޖެހިފައިވާކަމަށް އެ ޕާޓީއިން ވިދާޅުވެއްޖެއެވެ.
ޕީއެންސީ އިން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުފުޅާއި އެއްގޮތަށް އެ ޕާޓީއިން ވަނީ މިއަހަރުގެ ރަމަޟާން މަހުގެ ރޭތައް އިޙްޔާކުރުމަށް ޚާއްޞަ ފޯރަމުތަކެއް ބޭއްވުމަށް ނިންމާފައި ކަމަށެވެ. އެގޮތުން، މި ފޯރަމްތައް ކުރިއަށްދާނީ ސިލްސިލާކޮށް ރަމަޟާން މަހުގެ ކޮންމެ ހަފުތާއަކު އެއްފަހަރު ކަމަށް ޕީއެންސީ އިން ވިދާޅުވިއެވެ.
ޕީޕަލްސް ނޭޝަނަލް ކޮންގްރެސް، ޕީއެންސީ އިން ސިލްސިލާކޮށް ކުރިއަށް ގެންދިޔުމަށް ހަމަޖެހިފައިވާ އިޙްޔާ ފޯރަމްގެ ފުރަތަމަ ފޯރަމް އޮންނާނީ މާދަމާ ރޭ 21:30 ގައެވެ. މި ފޯރަމް ބޭއްވުމަށް ހަމަޖެހިފައިވަނީ، ހ.ވެޔޮވިލާގައި ހުންނަ ކޮންގުރެސް ހައުސްގައެވެ. ޕީއެންސީން ވިދާޅުވީ، މާދަމާ ރޭގެ ފޯރަމްގައި ތަޤުރީރު ކުރައްވާނީ އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު ކަމަށެވެ. އަދި މި ފޯރަމްގައި ވަޒީރު ތަޤުރީރު ކުރައްވާނީ "ރަމަޟާން މަހާއި ކީރިތި ޤުރުއާން" މި މަޢުޟޫގެ މައްޗަށެވެ.
ޕީއެންސީން ކުރިއަށް ގެންދަވާ އިޙްޔާ ފޯރަމްތަކުގައި ވީހާވެސް ގިނަ ރައްޔިތުން ބައިވެރިވެވަޑައިގަތުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އެ ޕާޓީގެ ލީޑަރޝިޕްގެ ވަރަށް ބޮޑު އެދުމެއްކަމަށް ޕާޓީ އިން ވަނީ ވިދާޅުވެފައެވެ. އަދި މި ފޯރަމްތަކުގައި ބައިވެރިވެވަޑައިގަތުމަށް ޕީއެންސީން ވަނީ ދިވެހި ހުރިހާ ރައްޔިތުންނަށް ދަޢުވަތު އަރުއްވާފައެވެ.