ދެކުނު ކޮރެއާގެ އަސްކަރީ ބޯޓަކުން އޮޅިގެން ބޮންތަކެއް ވެއްޓި 7 މީހުން ޒަޚަމްވެއްޖެ

ދެކުނު ކޮރެއާގެ އެއަރ ފޯސްގެ ފައިޓަރ ޖެޓަކުން  އެއްގަމަށް ވައްޓާލަން ކަނޑައެޅިފައިވާ ސަރަހައްދުން ބޭރަށް 8 ބޮން ވެއްޓި، 7 އާންމު ރައްޔިތުން ޒަޚަމްވެއްޖެއެވެ.

މިއަދު ހެނދުނު 10:00 ގައި ހިނގި މި ހާދިސާގައި އެމްކޭ-82 ބާވަތުގެ 8 ބޮން ވެއްޓުނީ އުތުރު ކޮރެއާގެ ބޯޑަރާ 25 ކިލޯމީޓަރު ދުރުގައި އޮންނަ ޕޮޗިއޯން ސަރަހައްދަށެވެ. މި ހާދިސާ ހިނގީ ދެކުނު ކޮރެއާ އާއި އެމެރިކާގެ އަސްކަރިއްޔާ ގުޅިގެން ކުރިޔަށްގެންދިޔަ ލައިވް-ފަޔަރ ޓްރެއިނިންއެއްގައެވެ.

ދެކުނު ކޮރެއާގެ ނެޝަނަލް ފަޔަރ އޭޖެންސީން ބުނީ މި ހާދިސާގައި 4 މީހަކަށް ބޮޑެތި އަނިޔާތަކެއް ވެފައިވާ ކަމަށާއި، 3 މީހަކަށް ކުދި އަނިޔާތަކެއް ވެފައިވާ ކަމަށެވެ. އަދި  އިމާރާތަކާއި ދެ ގެއަކަށް ގެއްލުން ލިބި، ގިނަ އަދަދެއްގެ ރައްޔިތުން ވަނީ އެހެން ސަރަޚައްދުތަކަށް ދާން ޖެހިފައެވެ.

ދެކުނު ކޮރެއާގެ އެއަރ ފޯސްއިން މި ހާދިސާއާ ގުޅިގެން ހިތާމަ ފާޅުކޮށް، ޒަޚަމްވި ފަރާތްތަކަށް އަވަސް ޝިފާއަކަށް އެދިފައިވެއެވެ. އަދި މި ހާދިސާ ތަހުގީގުކުރުމަށް ކޮމިޓީއެއް އުފައްދައި، ގެއްލުމުގެ ބަދަލު ދިނުމަށް ކުރަންޖެހޭ ހުރިހާ ކަމެއް ކުރާނެ ކަމަށް ބުނެފައިވެއެވެ.

މި ހާދިސާ ހިނގީ ދެކުނު ކޮރެއާ އާއި އެމެރިކާގެ އެންމެ ބޮޑު އަހަރީ އަސްކަރީ ތަމރީން ކަމަށްވާ "ފްރީޑަމް ޝީލްޑް" ފެށުމުގެ ކުރިންނެވެ.