އެމެރިކާގައި އުމުރުން 32 އަހަރުގެ މީހަކު އަގުބޮޑު އަލިމަހެއް ދިރުވާލައިފި

އެމެރިކާގައި އުމުރުން 32 އަހަރުގެ މީހަކު އަގުބޮޑު އަލިމަހެއް ދިރުވާލާފިއެވެ. އޭނާ މި އަލިމަސް ނަގާފައިވަނީ އެމެރިކާގެ ފްލޮރިޑާ ސްޓޭޓްގެ އޮލަންޑޯގައި ހުންނަ މޯލް އެޓް މިލެނިއާގައި ހުރި ޓިފަނީ އެންޑް ކޯ ފިހާރައަކުންނެވެ.

މި އަލިމަހަކީ، 769،000 ޑޮލަރުގެ އަގުހުރި ދެ ޖޯޑުގެ ޑައިމަންޑްއެކެވެ. މި ދިރުވާލި މީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

އޮލަންޑޯގެ ޕޮލިސް ޑިޕާޓްމަންޓުން ބުނީ، މި ޙާދިސާ ހިނގާފައިވަނީ ނިމިދިޔަ ފެބްރުއަރީ މަހުގެ 26 ވަނަ ދުވަހު ކަމަށެވެ. އަދި މި ޙާދިސާގައި ހައްޔަރުކޮށްފައިވަނީ އުމުރުން 32  އަހަރުގެ ޖޭތަން ލޯރެންސް ގްލައިޑަރ ނަމަކަށް ކިޔާ މީހަކުކަމަށް ފުލުހުން ވަނީ ބުނެފައެވެ. އޮލަންޑޯގެ ފުލުހުން ބުނީ މީނާ ފިހާރައަށް ވަދެފައިވަނީ އޮލަންޑޯ މެޖިކް ކުޅުންތެރިއެއްގެ މަންދޫބެއް ކަމަށް ބުނެފައި ކަމަށެވެ. އަދި އެނާ ވަނީ އަގުބޮޑު ޑައިމަންޑު ކަންފަތުލާ މުދި ޖޯޑެއް ވަގަށް ނަގާފައިވާ ކަމަށް ފުލުހުން ބުނެއެވެ.

ފުލުހުން ބުނި ގޮތުގައި، ގްލައިޑަރ ހައްޔަރުކޮށްފައިވަނީ އޭނާގެ އުޅަނދު ވޮޝިންގްޓަން ކައުންޓީގެ އިންޓަސްޓޭޓް 10 ގައި ހުއްޓުވުމަށްފަހުއެވެ. އޭނާ ހައްޔަރުކުރެވުނީ ހައްޔަރުވުމަށް ދެކޮޅުހެދުމުގެ ކުށުގެ އިތުރުން ކޮލޮރާޑޯ ސްޓޭޓުން ނެރެފައިވާ 48 ވޮރަންޓެއްގެ ދަށުންނެވެ. ފުލުހުން ބުނީ، ގްލައިޑަރ ހައްޔަރުކުރުމަށްފަހު، ޖަލުގެ މުވައްޒަފުންނާ މުޚާތަބުކޮށް އޭނާ ކުރި ސުވާލަކުން މި މައްސަލައަށް އިތުރު ސުވާލުތަކެއް ކުރިމަތިކޮށްފައިވާ ކަމަށެވެ.

ގްލައިޑަރ ވަނީ ފުލުހުންނަށް އޭނާގެ ބަނޑުގައި ހުރި އެއްޗަކަށް ވެސް ދައުވާ ކުރެވޭނެތޯ ސުވާލު އުފައްދާފައެވެ. އެހްންކަމުން، އޭނާގެ މި ސުވާލާއި ގުޅިގެން އޭނާގެ ހަށިގަނޑުގެ ސްކޭން ނެގުމުން، އޭނާގެ ބަނޑުގައި އިތުރު އެއްޗެއް ހުރިކަން ފާހަގަކުރެވުނު ކަމަށް ފުލުހުން ބުންޏެވެ. އަދި އެއީ ވަގަށް ނެގި ޑައިމަންޑު ކަމަށް ފުލުހުން ޝައްކުކުރެއެވެ.

ގްލައިޑަރ އަކީ ކުށުގެ ރެކޯޑެއް އޮތް މީހެކެވެ. ކޮލޮރާޑޯ ސްޓޭޓުން ވަނީ މީގެ ކުރިން ވެސް އޭނާ އާއި ދެކޮޅަށް 48 ވޮރަންޓް ނެރެފައެވެ. އަދި 2022 ވަނަ އަހަރު ޓެކްސާސް ސްޓޭޓުގައި ހުރި ޓިފަނީ އެންޑް ކޯ ފިހާރައަކުން ވައްކަންކުރި މައްސަލައެއްގައި ވެސް އޭނާއަށް ވަނީ ދައުވާ އުފުލާފައެވެ. މިފަަހަރުގެ ޙާދިސާއާއި ގުޅިގެން ގްލައިޑަރއަށް ފުރަތަމަ ދަރަޖައިގެ ބޮޑު ވައްކަމުގެ ދައުވާއާއި، މޫނު ނިވާކޮށްގެން ވައްކަންކުރުމުގެ ދައުވާ ވަނީ ކުރެވިފައެވެ.

މި މައްސަލައާއި ގުޅިގެން އޮލަންޑޯ ޕޮލިސް ޑިޕާޓްމަންޓުގެ ތަޙުޤީޤު ކުރިއަށްދާ ކަމަށް އެ ޑިޕާޓްމަންޓުން ވަނީ ބުނެފައެވެ. އަދި ގްލައިޑަރ ގެ ހަށިގަނޑުގައި ވާ ތަކެއްޗަކީ އޭނާ ވަގަށް ނެގި ޑައިމަންޑު މުދި ކަން ކަށަވަރުކުރެވޭނީ، އޭނާގެ ހަށިގަނޑުން މިތަކެތި ބޭރުވުމުންނެވެ.