ދުނިޔެ
ހިޖުރަވެރިން ހުއްޓުވުމަށް ތުރުކީއިން ފާރެއް ބިނާކުރަނީ

ބަލްގޭރިއާ އަދި ތުރުކީ ބޯޑަރުގައި ހަދާފައިވާ ފާރު ފޮޓޯ:އިންޓަނެޓް
ޔޫރަޕިއަން ޔޫނިއަންގެ މެމްބަރު ޤައުމުތަކަށް ހިޖުރަވެރިން ވަނުން ހުއްޓުވުމަށްޓަކައި، ތުރުކީގެ ހުޅަނގު ސަރަހައްދުގައި 8.5 ކިލޯމީޓަރުގެ ފާރެއް ނުވަތަ ހުރަހެއް ޢިމާރާތްކުރުމަށް ވަނީ ނިންމާފައެވެ.
އެޑިރްނޭގެ ގަވަރނަރު ޔޫނުސް ސެޒަރ ވިދާޅުވި ގޮތުގައި މިއީ ތުރުކީގެ ހުޅަނގު ސަރަހައްދުގައި ފިޒިކަލް ސެކިއުރިޓީ ފިޔަވަޅެއްގެ ގޮތުގައި އަޅާ ފުރަތަމަ ބިއްގަނޑެވެ. އޭނާ އިތުރަށް ވިދާޅުވި ގޮތުގައި މި ބިއްގަނޑު ގްރީސްގެ ބޯޑަރުން ފެށިގެން ކުރިއަށްދާނެއެވެ. އަދި ހާލަތަށް ބަލައި މުސްތަޤުބަލުގައި މި ބިއްގަނޑު އިތުރަށް ދިގުކުރެވިދާނެއެވެ.
ތުރުކީއާއި ގްރީސްގެ ދެމެދުގައިވާ 200 ކިލޯމީޓަރުގެ ބޯޑަރު ވަކިކުރަނީ އެވްރޮސް ކޯރުންނެވެ. ގްރީސްއިން ވަނީ 2012 ވަނަ އަހަރު 3 މީޓަރު އުސްމިނުގެ ކަށިނަރު އަޅާފައިވާ ދެ ބިއްގަނޑެއް 11 ކިލޯމީޓަރުގެ ދިގުމިނަށް ޢިމާރާތްކޮށްފައެވެ. ބުލްގޭރިއާއިން ވެސް ވަނީ 2014 ވަނަ އަހަރު 30 ކިލޯމީޓަރުގެ ބިއްގަނޑެއް ޢިމާރާތްކޮށް، 2018 ގައި އެ ބިއްގަނޑު 259 ކިލޯމީޓަރަށް ދިގުކޮށްފައެވެ.
މީގެ ކުރިން ތުރުކީއިން ވަނީ އީރާން އަދި ސީރިއާއާ ދެމެދުގައިވާ ބޯޑަރުގައި ވެސް ބިއްގަނޑު ޢިމާރާތްކޮށްފައެވެ. ގްރީސްގެ ބޮޑުވަޒީރު ކިރިއަކޮސް މިޓްސޮޓަކިސް ވަނީ 2026 ވަނަ އަހަރާ ހަމައަށް އެ ޤައުމުގެ ބިއްގަނޑު 100 ކިލޯމީޓަރަށްވުރެ ދިގުކުރުމަށް ވަޢުދުވެފައެވެ.