އަތޮޅު ތެރެއަށް ދަތުރުކުރާ ފެރީ ލޯންޗުތަކަށް ހުޅުމާލެ ޓާމިނަލް އަދި ހެންވޭރު ޓާމިނަލް ހުޅުވާލަނީ

އަތޮޅު ތެރެއަށް ދަތުރުކުރާ ފެރީ ލޯންޗުތަކަށް ހުޅުމާލެ ޓާމިނަލް އަދި "ބާސެލޯ ނަސަންދުރާ މާލެ" ކުރިމަތީގައި އޮންނަ ހެންވޭރު ޓާމިނަލް ހުޅުވާލުމަށް މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ، އެމްޓީސީސީން ނިންމައިފިއެވެ. 

އެމްޓީސީސީގެ މި ނިންމުމަކީ، އަތޮޅު ތެރެއިން މާލެ ދަތުރުކުރާ ފަރާތްތަކަށް އުފުލަންޖެހިފައިވާ ތަކުލީފުތަކަށް ލުއިގޮތެއް ހަމަޖައްސައިދެއްވުމުގެ ގޮތުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިރުޝާދުގެ ދަށުން ނިންމެވި ނިންމެވުމެއްކަމަށް މަޢުލޫމާތު ލިބެއެވެ.

އެހެންކަމުން، ލަފާފުރުމަށް މި ޓާމިންލްތައް ބޭނުންކުރަން ބޭނުންވާ ފެރީ އޮޕަރޭޓަރުން، މި މަހު 10ގެ ކުރިން އެ ކުންފުންޏަށް އެކަން އެންގުމަށް ވަނީ އިޢުލާންކޮށްފައެވެ. އަދި މި ޓާމިނަލްތައް ބޭނުން ކުރުމަށް ޝައުގުވެރިވާނަމަ، އެ ކުންފުނީގެ އީމެއިލް، [email protected] އަށް އެކަން އެންގުމަށް ވަނީ އެދިފައެވެ. މިކަމާ ގުޅޭ އިތުރު މަޢުލޫމާތު ހޯއްދެވުމަށް 7978865 އަށް ގުޅުއްވުމަށް ވެސް އެމްޓީސީސީން ވަނީ އެދިފައެވެ.

އެމްޓީސީސީގެ އޮފިޝަލަކު ހާމަކޮށްފައިވާ ގޮތުގައި، މި ޓާމިނަލްތައް ފެރީ ލޯންޗުތަކަށް ހުޅުވާލި ނަމަވެސް، މި ތަންތަން އެމްޓީސީސީގެ ފެރީތައް ވެސް ބޭނުންކުރާނެއެވެ. އަދި ޓާމިނަލް ބޭނުންކުރުމަށް ޝައުގުވެރުވެލައްވާ ފަރާތްތަކުން ރެޖިސްޓަރވުމަށް ހުޅުވާލީ ވެސް އެމްޓީސީސީގެ ފެރީތައް ވެސް އެ ޓާމިނަލްތައް ބޭނުންކުރާނެތީކަމަށް، އެމްޓީސީސީގެ ފަރާތުން ވަނީ ހާމަކޮށްފައެވެ.

އަތޮޅު ތެރެއިން މާލެއަށް ދަތުރުކުރާ ލޯންޗުތައް ލަފާފުރުމަށް މިހާރު ބޭނުންކުރަނީ މޯލްޑިވްސް މަނިޓަރީ އޮތޯރިޓީ، އެމްއެމްއޭ ކުރިމަތިން އޮންނަ ސަރަޙައްދެވެ. އަދި ބައެއް ފެރީތަކުން މާފަންނު ސްޓޭޑިއަމްއާ ދިމާލުގެ ބަނދަރު ވެސް ބޭނުންކުރެއެވެ.

މި ތަންތަނަކީ، މިގޮތަށް ދަތުރުކުރާ ދަތުރުވެރިންނަށް ޙާއްސަ އެއްވެސް ޚިދުމަތެއް ނެތް ތަންތަންކަމުން، ދަތުރުވެރިންނަށް ލަފާފުރުން ވެފައި އޮންނަނީ ބައެއް ފަހަރު ތަކުލީފަކަށެވެ. އެގޮތުން ލަގެޖު ޖެޓީ މައްޗަށް ބޭލުމުން ފާލަން މަތިން ހިނގާބިނގާވެ އުޅެއް ދަތިވުމާއި، މަގާ ކައިރިކަމުން ކުޑަކުދިންނަށް ރައްކާތެރި ނުވުމުގެ އިތުރުން، ހޫނުވެއްޖެ ނަމަ ހޫނުގައި އަދި ވާރޭވެހެފިނަމަ މި ދަތުރުވެރިން އުޅެން ޖެހެނީ ތެމިގެނެވެ.

އެހެންކަމުން، އެމްޓީސީސީގެ މި ނިންމުމާއެކު، މި ތަކުލީފުތަކަށް ލުޔެއް ލިބޭނެކަމަށް ޤަބޫލުކުރެވެއެވެ.