Ads by Exprox

ޚަބަރު

މާލެ ތެރެއިން މަރުވެފައިވާ ކޮތަރުތައް ފެންނަން ފެށީ ނޭވާލާ ނިޒާމަށް ޖެހޭ ބައްޔެއްގެ ސަބަބުން

މާލެ ތެރެއިން މަރުވެފައިވާ ކޮތަރުތައް ފެންނަން ފެށީ ނޭވާލާ ނިޒާމަށް ޖެހޭ ބައްޔެއްގެ ސަބަބުން

ކޮތަރުތަކުގެ ސާމްޕަލް ނެގުން، ފޮޓޯ: އެނިމަލް ވެލްފެއަރ މިނިސްޓްރީ

މިފްތާޙް މުޙައްމަދު

މިފްތާޙް މުޙައްމަދު

06 މާރިޗު 2025، 09:58

06 މާރިޗު 2025، 09:58

މާލެ ތެރެއިން މަރުވެފައިވާ ކޮތަރުތައް ފެންނަން ފެށީ ނޭވާލާ ނިޒާމަށް ޖެހޭ ބައްޔެއްގެ ސަބަބުންކަމަށް އެނިމަލް ވެލްފެއާ މިނިސްޓްރީން މިއަދު ހާމަކޮށްފިއެވެ.

މާލޭގެ އެކި ސަރަޙައްދުތަކުން ކޮތަރުތައް ބަލިވެ މަރުވަމުންދާކަން ފާހަގަކުރެވުނީ މިދިޔަ ފެބުރުވަރީ މަހުގެ ތެރޭގައެވެ. އަދި މިކަން ފާހަގަކުރެވިގެން ގިނަ ބަޔަކު މިކަމާ ކަންބޮޑުވެފައި ވަނިކޮށް، އެނިމަލް ވެލްފެއާ މިނިސްޓްރީން މިފަދަ ކޮތަރުތަކުގެ ސާމްޕަލް ނަގާ ޓެސްޓުކުރަން ފެށިއެވެ.

މި ތަހުލީލުތަކާ ގުޅިގެން މިދިޔަ ހަފްތާގެ ކުރީކޮޅު ހެލްތު މިނިސްޓްރީން ބުނީ، އިންސާނުންގެ ސިއްޙަތަށް ނުރައްކާވާފަދަ އެއްވެސް ކަމެއް ކޮތަރުތަކުން ފާހަގަކުރެވިފައި ނުވާކަމަށެވެ.  

އަދި މިކަމާ ގުޅޭ އެންމެ ފަހުގެ މަޢުލޫމާތު ޙިއްސާކުރަމުން އެނިމަލް ވެލްފެއާ މިނިސްޓްރީން މިއަދު ބުނީ، ކޮތަރުތަކަށް ޖެހިފައިވަނީ އިންފެކްޝަން ކޮރައިޒްކަމަށް، ތަހުލީލުތަކުން ދެނެގަނެވިފައިވާ ކަމަށެވެ. އެ ބައްޔަކީ އާއްމުކޮށް ދޫނީގެ ނޭވާލާ ނިޒާމަށް ޖެހޭ ބައްޔެކެވެ.

ނަމަވެސް ދޫންޏަށް ޖެހޭ މިފަދަ ބަލިތަކަކީ އިންސާނުންނަށް އެއްވެސް ނުރައްކަލެއް ހުރިކަމެއް ނޫންކަމަށް އެ މިނިސްޓްރީން ހާމަކޮށްފައިވެއެވެ. އެހެންވިޔަސް، މިކަމުގައި އެންމެ ރައްކާތެރިގޮތަކީ ކުޑަކުދިންނާއި ބޮޑެތި މީހުން ވެސް މިފަދަ ދޫނީގައި އަތްލާ ނުހެދުންކަމަށް ވެސް އެ މިނިސްޓްރީން ވަނީ ހާމަކޮށްފައެވެ.

ކޮތަރުތަކަށް ޖެހިފައިވާ ބަލީގެ މައުލޫމާތު ޙިއްސާ ކުރަމުން އެނިމަލް ވެލްފެއަރ މިނިސްޓްރީން އިތުރަށް ބުނީ، ކޮތަރުތަކާ ބެހޭ މި ތަހުލީލު ބިނާކުރީ ބަލި ފެތުރިފައިވާ ގޮތާއި ބަލީގެ އަލާމާތްތަކާއި ނެކްރޯޕްސީ ހޯދުންތައް އަދި ލެބޯޓްރީ ޓެސްޓުތަކުގެ މައްޗަށް ކަމަށެވެ. އަދި މި ބައްޔަކީ އެލިބެކްޓީރިއަމް ޕެރަގެލިނޭރަމް ނަމަކަށް ކިޔާ ބެކްޓީރިއާއެއްގެ ސަބަބުން ޖެހޭ ބައްޔެއްކަމަށް ވެސް ހާމަކޮށްފައިވެއެވެ.

މީގެ އިތުރުން، މި ތަހުލީލުތަކުން އިތުރު ބެކްޓީރިއަލް އިންފެކްޝަންތައް ކޮތަރުތަކަށް ޖެހިފައިވާކަން ފާހަގަ ކުރެވުނުކަމަށް މިނިސްޓްރީން ބުންޏެވެ. އޭގެ ތެރޭގައި ކޮކްސިޑިއޯސިސް އަދި ކެންޑިޑިއޭސިސް ހިމެނޭކަމަށް ވެސް ވަނީ ހާމަކޮށްފައެވެ. 

އިންފެކްޝަސް ކޮރައިޒްގެ އިތުރުން ސެކަންޑްރީ ބެކްޓީރިއަލް އިންފެކްޝަންތަކުގެ ސަބަބުން ބަލި ބޮޑުވެ، ދޫނި މަރުވާ ކަމަށް މިނިސްޓްރީން ބުންޏެވެ. އެ ބަލި ޖެހުމުން ދޫނީގެ ނޭފަތުން ފެން އައިސް، ކެއްސައި ނޭވާލުމަށް އުނދަގޫވެ، ބޮލާއި މޫނު ދުޅަވެ، ކެއުންބުއިމަށް އުނދަގޫވެއެވެ.

ނަމަވެސް މި ބައްޔަކީ އޭގެ ޒާތުގައި އަމިއްލައަށް ކޮންޓްރޯލްވާ ބައްޔެއްކަމަށް ވެސް މިނިސްޓްރީން ވަނީ ފާހަގަކޮށްފައެވެ.

މި ލިޔުން ކިޔާލުމުން

Ads by MSS