ޤައުމިއްޔަތު ދިރުވާ އާލާކުރާ ދުވަސް ފާހަގަކުރުމުގެ ގޮތުން ސައިކަލް ބުރެއް ބާއްވައިފި

ޤައުމިއްޔަތު ދިރުވާ އާލާކުރާ ދުވަސް ފާހަގަކުރުމުގެ ގޮތުން ދިވެހި ބަހާއި ސަޤާފަތާއި ތަރިކައާއި ބެހޭ ވުޒާރާއިން ސައިކަލް ބުރެއް ބާއްވައިފިއެވެ. މިއަދު ހަވީރު މާލޭގައި އޮތް މި ސައިކަލު ބުރު ކުރިޔަށް ގެންގޮސްފައި ވަނީ ހެންވޭރު ހެދިގޮނޑުދޮށް ސަރަޙައްދުން ފެށިގެން ރަސްފަންނު ސަރަޙައްދަށެވެ.

މި ހަރަކާތާ ގުޅޭގޮތުން މަޢުލޫމާތު ދެއްވަމުން ދިވެހި ބަހާއި ސަޤާފަތާއި ތަރިކައާއި ބެހޭ ވަޒީރު އާދަމް ނަޞީރު ޢިބްރާޙިމް ވިދާޅުވީ، މިފަދަ ހަރަކާތެއް އިންތިޒާމުކުރީ މި އަހަރުގެ ޤައުމިއްޔަތު ދިރުވާ އާލާކުރާ ދުވަސް ރޯދަ މަހާއި ދިމާވުމުން ކަމަށާއި، އެއީ ރޯދަ މަހުގެ ހަވީރުގެ ވަގުތަކީ ގިނަ ބަޔަކު ފިނިބުރުޖަހާލަން ނިކުންނަ ގަޑިއަކަށް ވުމުންކަމަށެވެ. މީގެ އިތުރުން، ދިވެހި ދިދަޔާއެކު ވަގުތު ހޭދަކޮށްލުން ވެސް މި ހަރަކާތުގެ މަޤުސަދުތަކުގެ ތެރޭގައި ހިމެނޭކަމަށް ވަޒީރު ވިދާޅުވިއެވެ.

ދިވެހި ޤައުމިއްޔަތަށް ސަރުކާރުން ދެއްވާ އިސްކަމަށް އަލިއަޅުވާލައްވަމުން ވަޒީރު ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޚާއްސަ އިސްކަމެއް ދެއްވާ މަސައްކަތެއް ކަމަށާއި، މި ދާއިރާއިން މުހިންމު 4 މަޝްރޫއެއް ހިނގަމުންދާކަމަށެވެ.

އަދި ޤައުމިއްޔަތު ދިރުވާ އާލާކުރުމުގެ ގޮތުން މިހާރު ކުރެވެމުންދާ މަސައްކަތަކީ ޕްލޭންތައް ހެދުމާއި ދިރާސާތައް ހެދުންކަމަށް ވެސް ވަޒީރު ވަނީ ވިދާޅުވެފައެވެ. 

ޤައުމިއްޔަތު ދިރުވާ އާލާކުރުމަށް ކުރިއަށް ގެންދިޔަ ސައިކަލު ބުރުގައި ދަޢުލަތުގެ ބައެއް ވަޒީރުންނާއި، ދިވެހި ބަހާއި ސަޤާފަތާއި ތަރިކައާއި ބެހޭ ވުޒާރާގެ އިސްބޭފުޅުންނާއި، ސަރުކާރުގެ ކުންފުނިތަކުގެ ބޭފުޅުންނާއި، އެކި މުއައްސަސާތަކުގެ މުވައްޒަފުންނާއި އިސް ފަރާތްތަކުން ބައިވެރިވެވަޑައިގެންނެވިއެވެ.

ޤައުމިއްޔަތު ދިރުވާ އާލާކުރާ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ މާރިޗު 6 ވަނަ ދުވަހެވެ. މިއީ 2017 ވަނަ އަހަރުގެ މާރިޗު 6 ގައި "ތަރިކަ" މަޝްރޫޢު އިފްތިތާޙު ކުރެވުނު ދުވަހެވެ. މި ދުވަހުގެ މައިގަނޑު މަޤްޞަދަކީ ދިވެހީންގެ މެދުގައި އިސްލާމީ ވަޙްދަތާއި ޤައުމީ ރޫޙު އުފައްދައި އާލާކުރުމެވެ.