ފްރާންސަށް ކަނޑައެޅުއްވި ސަފީރުގެ ފަތްކޮޅު އެ ޤައުމުގެ ރައީސަށް އަރުވައިފި

ދިވެހިރާއްޖެއިން ފްރާންސަށް ކަނޑައަޅުއްވާފައި ހުންނަވާ ނަން-ރެސިޑެންޓް ސަފީރު، ޑރ. އިރުތިޝާމް އާދަމްގެ ސަފީރުކަމުގެ ފަތްކޮޅު ފްރާންސްގެ ރައީސް، އެމަނުއެލް މެކްރޯންއަށް އަރުވައިފިއެވެ. 

މިކަމަށް ޙާއްސަ ރަސްމިއްޔާތު ބާއްވާފައިވަނީ ފްރާންސްގެ ވެރިރަށް ޕެރިހުގައި ހުންނަ އެ ގައުމުގެ ރިޔާސީ ގަނޑުވަރު، ޕެލެއިސް ޑި އެލިސީގައެވެ.

މި ރަސްމިއްޔާތުގައި ޑރ. އިރުތިޝާމް އާދަމް ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއި ދިވެހި ސަރުކާރާއި ދިވެހިން ރައްޔިތުންގެ ފަރާތުން ފްރާންސްގެ ރައީސާއި އެ ޤައުމުގެ ސަރުކާރާއި ރައްޔިތުންނަށް ހެޔޮ އެދުންތައް އަރިސްކުރައްވާފައެވެ. 

މީގެ އިތުރުން ދެ ޤައުމުގެ ގުޅުން އިތުރަށް ބަދަހިކުރެއްވުމާ ގުޅޭ ގޮތުން ވެސް މި ބައްދަލުކުރެއްވުމުގައި މަޝްވަރާ ކުރެއްވެވިއެވެ. މި މަޝްވަރާތަކުގައި ބޮޑަށް އަލިއަޅުވާލެއްވީ ވިޔަފާރި އާއި އިޤުތިޞާދީ ދާއިރާއިން ގުޅުން ބަދަހި ކުރެއްވުމަށެވެ.

މި ޒިޔާރަތުގައި ޑރ. އިރުތިޝާމް އާދަމް ވަނީ، އެމްބެސެޑަރ ފޯރ ރީޖަނަލް ކޯޕަރޭޝަން އިން ދަ އިންޑިއަން އޯޝަން، ޖީން ކްލޯޑް ބްރޫނެޓް އާއި ޑެޕިއުޓީ ޑިރެކްޓަރ އޮފް ދަ އޭޝިއާ އެންޑް އޯޝޭނިއާ ޑިޕާޓްމެންޓް، މީރިއަމް ސެއިންތް ޕިއެރޭ އާއި ފްރާންސްގެ ފޮރިން މިނިސްޓްރީގައި ބައްދަލުކުރައްވާފައެވެ. 

ދިވެހިރާއްޖެއިން ފްރާންސަށް ކަނޑުއަޅުއްވާފައި ހުންނަ ނަން-ރެސިޑެންޓް ސަފީރު ޑރ. އިރުތިޝާމް އާދަމްއަކީ ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ވެސް މެއެވެ.