އޯއައިސީ ބައްދަލުވުމުގައި ފަލަސްތީނުގެ ރައްޔިތުން އެ ޤައުމުން ބޭލުމާ ދެކޮޅަށް ފޮރިން މިނިސްޓަރު ވާހަކަފުޅު ދައްކަވައިފި

އޯގަނައިޒޭޝަން އޮފް ދަ އިސްލާމިކް ކޯޕަރޭޝަން، އޯއައިސީއިން އިއްޔެ ބޭއްވި އެކްސްޓްރާ އޯޑިނަރީ ސެޝަން އޮފް ދަ ކައުންސިލް އޮފް ފޮރިންމިނިސްޓަރސް ބައްދަލުވުމުގައި، ފަލަސްތީނުގެ ކުށެއް ނެތް ރައްޔިތުން އެ ޤައުމުން ބޭލުމާ ދެކޮޅަށް ރާއްޖޭގެ ފޮރިން މިނިސްޓަރ ޑރ. އަބްދުﷲ ޚަލީލް ވާހަކަފުޅު ދައްކަވައިފިއެވެ.

ސައުދީ އަރަބިއްޔާގެ ޖިއްދާގައި ކުރިޔަށްދިޔަ މި ބައްދަލުވުމުގައި، މިނިސްޓަރ ޑރ. ޚަލީލް ވަނީ ހަނގުރާމަ ހުއްޓާލުމުގެ އެއްބަސްވުމާ އިސްރާއީލުން ޚިލާފުވެފައިވާތީ އެކަމާ ކަންބޮޑުވުން ފާޅުކުރައްވާފައެވެ. 

އަދި މެދުކެނޑުމެއް ނެތި އިންސާނީ އެހީ ފަލަސްތީނުގެ ރައްޔިތުންނަށް ލިއްބައިދީ، ހަނގުރާމަ އެއްކޮށް ހުއްޓާލުމަށް ވެސް މިނިސްޓަރު ވަނީ ގޮވާލައްވާފައެވެ.

މީގެ އިތުރުން، ޢަރަބި ލީގު ސަމިޓުގައި މަޝްވަރާކުރެވުނުގޮތަށް، ޣައްޒާ އަލުން އާރާސްތުކުރުމަށް ދިވެހިރާއްޖެއިން ތާޢީދުކުރައްވާކަން އެ މަނިކުފާނުފާނު ވަނީ ހާމަކުރައްވާފައެވެ. 

މި ބައްދަލުވުމުގައި މިނިސްޓަރު އިތުރަށް ވިދާޅުވީ، މިއީ ދިވެހިރާއްޖެއަށް ވެސް ޙައްސާސް މައްސަލައެއް ކަމަށާއި އަދި މިކަމުގެ ދާއިމީ ޙައްލަކަށް ވާނީ 1967ގައި އެއްބަސްވެވުނު ގޮތަށް، ފަލަސްތީނަކީ މިނިވަން ދަޢުލަތެއްގެ ގޮތުގައި ބަލައިގަނެ، އުތުރު ޖެރުއްސަލާމްއަކީ އެ ޤައުމުގެ ވެރިރަށް ކަމުގައި ކަނޑައަޅައިގެންކަމަށެވެ. 

އޯއައިސީއަކީ 57 މެންބަރު ޤައުމުތަކުގެ މައްޗަށް އެކުލެވިގެންވާ ޖަމްޢިއްޔާއެކެވެ. އަދި 1976 އިން ފެށިގެން ދިވެހިރާއްޖެއަކީ އޯއައިސީގެ މެންބަރު ޤައުމެކެވެ.