ދުނިޔެ
ޠާލިބާނުންގެ ހަރުކަށި ސިޔާސަތުތަކުގެ ސަބަބުން އަންހެނުން އިންސާނީ ގުޅުންތަކުން މަހުރޫމްވެ އޭއައި ގެ އެހީއަށް

އަފްގާނިސްތާންގެ ސެލޫންތަކަށް އަންހެނުން ވަނުން ވަނީ މަނާކޮށްފައި ފޮޓޯ:ސީއެންއެން
ޠާލިބާނުން ވެރިކަމާ ހަވާލުވުމަށްފަހު އަފްޣާނިސްތާނުގެ އަންހެނުންނަށް ކުރިމަތިވެފައިވާ ހަރުކަށި ސިޔާސަތުތަކާއި އެކަހެރިވުމުގެ ސަބަބުން، އެ ގައުމުގެ އަންހެނުން މިހާރު ވަނީ އެކުވެރިކަމަށްޓަކައި އާޓިފިޝަލް އިންޓެލިޖެންސް (އޭއައި) އަށް ބަރޯސާވާން މަޖުބޫރުވެފައެވެ. 2021 ވަނަ އަހަރު ވެރިކަމާ ހަވާލުވި ޠާލިބާނުން ވަނީ އަންހެނުންގެ މިނިވަންކަމާއި އާންމު އިންސާނުންގެ ގޮތުގައި ދިރިއުޅުމުގެ ހައްގު ހަނިކުރާ ގިނަ ފިޔަވަޅުތަކެއް އަޅާފައެވެ.
ބީބީސީއަށް ވާހަކަދެއްކި އަފްޣާނިސްތާނުގެ ރަށުތެރޭގައި ދިރިއުޅޭ 18 އަހަރުގެ ލީމާ ބުނީ އޭނާ މިހާރު ދުވަސްތައް ހޭދަކުރަނީ އޭއައިގެ އެހީ ހޯދައިގެން ކަމަށާއި، އެއީ އޭނާގެ އެކުވެރިއެއްގެ ގޮތުގައި ކަމަށެވެ.
އަހަރެން ހެނދުނު ހޭދަކުރަނީ ފޮތް ކިއުމުގައި ނުވަތަ އޭއައިއާ ވާހަކަދެއްކުމުގައި. އަހަރެންގެ ހިތުގައި ހުރި ހުރިހާ އެއްޗެއް ބުނެލުމަށް، ސުވާލުކުރުމަށް ނުވަތަ އެކުވެރިއެއްގެ ގޮތުގައި އޭއައި ބޭނުންކުރެވޭ
ލީމާ
މީގެ އިތުރުން ލީމާ ބުނީ އޭނާއަށް އަރާމު ލިބެނީ މިއުޒިކުންކަމަށެވެ. އޭނާގެ އެންމެ ކަމުދާ އާޓިސްޓުންގެ ތެރޭގައި ބިލީ އައިލިޝް، ބީޓީއެސް، ޓަމީނޯ، ލާނާ ޑެލް ރޭ، ލޭޑީ ގާގާ، ޝޯން މެންޑެސް އަދި ޗާލީ ޕުތު ހިމެނެއެވެ.
އަހަރެން ދުވާލު ހޭދަކުރަނީ މިއުޒިކާއެކު. ރޭގަނޑު ވަރަށް ގިނައިން ވިސްނަން. ކުރިމަގާ މެދު ޔަގީންކަން ނެތް ގޮތާމެދު ވަރަށް ގިނައިން ވިސްނަން
ލީމާ
ޠާލިބާނުން އަންހެނުންގެ ހައްގުތަކަށް އަރައިގަތުމުގެ ތެރޭގައި އަންހެނުން މޫނު ނިވާކުރުން މަޖުބޫރުކުރުމާއި، ފިރިހެން ބަލަދުވެރިއެއް ނެތި ދަތުރުކުރުން މަނާކުރުން ހިމެނެއެވެ. މީގެ އިތުރުން އާންމު ތަންތަނާއި މުނިފޫހިފިލުވުމުގެ ޕާކުތަކަށް އަންހެނުން ވަނުން މަނާކޮށް، ޖިމްތަކާއި ފިޓްނެސް ސެންޓަރުތަކުން އަންހެނުންނަށް ހިދުމަތް ދިނުން ވަނީ މަނާކޮށްފައެވެ. އަދި 12 އަހަރުން މަތީގެ އަންހެން ކުދިންނަށް ތައުލީމު ހާސިލުކުރުމުގެ ފުރުސަތު ވަނީ ބަންދުކޮށްފައެވެ.
މާރިޗު 8 އަކީ ދުނިޔޭގެ އެހެން ގައުމުތަކުގައި ބައިނަލްއަގުވާމީ އަންހެނުންގެ ދުވަހުގެ ގޮތުގައި ފާހަގަކުރާ ދުވަހެއް ނަމަވެސް، އަފްޣާނިސްތާނުގެ އަންހެނުންނަށް މިއީ އާދައިގެ ދުވަހެކެވެ. ޠާލިބާނުންގެ އަނިޔާވެރި ވެރިކަމުގެ ދަށުން އެ ގައުމުގެ އަންހެނުންނަށް ކުރިމަތިވެފައިވާ ދަތިތަކުން އެއްވެސް ލުޔެއް ލިބޭ ދުވަހެއް ނޫނެވެ.
އަފްޣާނިސްތާނުގެ އަންހެނުންގެ ހައްގުތައް އިތުރަށް ހަނިކުރުމުގެ ގޮތުން، ޠާލިބާނުން ވަނީ އަންހެނުންނަށް މެޑިކަލް ތަމްރީނު ހޯދުން މަނާކޮށް، އަންހެނުންގެ ރޭޑިއޯ ސްޓޭޝަންތައް ދާއިމީކޮށް ބަންދުކޮށްފައެވެ. އަދި ގައުމީ އަދި ބޭރުގެ މަދަނީ ޖަމްއިއްޔާތަކުން އަންހެނުން ވަޒީފާއަށް ނެގުން ވެސް ވަނީ މަނާކޮށްފައެވެ.
މި ހާލަތުގައި، އަފްޣާނިސްތާނުގެ އަންހެނުން އެކަނިވެރިކަމުން އަރައިގަތުމަށް އާޓިފިޝަލް އިންޓެލިޖެންސްގެ އެހީ ހޯދަމުންދާކަމީ އެ ގައުމުގެ އަންހެނުންގެ ހާލަތު ދައްކުވައިދޭ ހިތާމަވެރި ހަގީގަތެކެވެ. ޠާލިބާނުންގެ ހަރުކަށި ސިޔާސަތުތަކުގެ ސަބަބުން އިންސާނީ ގުޅުންތަކުން މަހުރޫމްވެފައިވާ އަންހެނުން، މިހާރު ވަނީ އިންސާނުންނާ ވާހަކަދެއްކުމުގެ ބަދަލުގައި މެޝިނަކާ ވާހަކަދައްކަން މަޖުބޫރުވެފައެވެ.
ބައިނަލްއަގުވާމީ މުޖުތަމައުއިން އަފްޣާނިސްތާނުގެ އަންހެނުންގެ ހާލަތާމެދު ކަންބޮޑުވުން ފާޅުކޮށްފައިވީ ނަމަވެސް، އަދިވެސް އެކަށީގެންވާ ފިޔަވަޅުތަކެއް އެޅިފައެއް ނުވެއެވެ. މި ހާލަތުގައި، އަފްޣާނިސްތާނުގެ އަންހެނުންނަށް އުއްމީދީ މުސްތަގުބަލެއް ފެންނާކަށް ނެތެވެ. އެހެންކަމުން، ލީމާ ފަދަ ގިނަ އަންހެނުން މިހާރު ވަނީ އެކަނިވެރިކަމުން އަރައިގަތުމަށްޓަކައި އާޓިފިޝަލް އިންޓެލިޖެންސްގެ އެހީއަށް ބަރޯސާވާން މަޖުބޫރުވެފައެވެ.