ތަޙުޤީޤު ނިމެންދެން ޙިޖާމާ ކްލިނިކް ބަންދުކުރުމަށް ވެރިފަރާތައް އަންގައިފި!

ޞިއްޙީ ވުޒާރާގެ ހުއްދަނެތި ހިންގަމުންދިޔަ ޙިޖާމާ ކްލިނިކްގެ މައްސަލާގެ ތަޙުޤީޤު ނިމެންދެން ކްލިނިކް ބަންދުކޮށްފައި ބެހެއްޓުމަށް އެތަނުގެ ވެރިފަރާތައް އަންގައިފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ. 

ފުލުހުން ބުނެފައިވަނީ ޞިއްޙީ ވުޒާރާގެ ހުއްދަ ނެތި ޙިޖާމާ ޖެހުމުގެ ޚިދުމަތް ހުޅުމާލޭގައި ދެމުންދާ ކްލިނިކެއްގެ މައްސަލަ ބަލައިދިނުމަށް އެވުޒާރާއިން ފުލުހަށް ހުށައަޅައިފައިވާ ކަމަށެވެ.

އަދި އެމައްސަލައާ ގުޅިގެން ފުލުހުން ބަލަންޖެހޭ ކަންކަން ބަލައިފައިވާ ކަމަށްވެސް ފުލުހުން ވަނީ ބުނެފައެވެ. 

މީގެއިތުރުން ކްލިނިކްގެ ވެރިފަރާތުން ޤާނޫނުގެ ދަށުން ހޯދަން ޖެހޭ ހުއްދަތައް ހޯދައިގެން ޙިޖާމާގެ ފަރުވާ ދިނުމަށާއި މިހާރު ދެމުންގެންދާ ޙިޖާމާ ޖެހުމުގެ ހުއްދަ ލިބެންދެން ހުއްޓައިލުމަށް ލިޔުމުން އަންގައި ނަޞޭޙަތް ދީފައިވާ ކަމަށްވެސް ފުލުހުން ވަނީ ބުނެފައެވެ. 

އަދި މިމައްސަލައާ ގުޅިގެން ފުލުހުންގެ ތަޙުޤީޤަށް ދޭންޖެހޭ އެއްބާރުލުން ޙިޖާމާ ކްލިނިކްގެ ވެރިފަރާތުން ދެމުންދާ ކަމަށް ފުލުހުން ވަނީ ބުނެފައެވެ. 

“ފަރުދުން” ނޫހުން ބެލިބެލުމުން އެނގިފައިވަނީ ފުލުހުން ބަލަމުންދަނީ ހުޅުމާލޭގައި ހިންގަމުންދާ ފަޒީސް ޙިޖާމާ ކްލިނިކެވެ. 

ފަޒީސް ޙިޖާމާ ކްލިނިކްގެ މައްސަލާގައި ޞިއްޙީ ވުޒާރާއިން މީގެކުރިން ބުނެފައިވަނީ ރަޖިސްޓްރީކޮށް، އޮޕަރޭޓިން ލައިސެންސް ލިބެންދެން އެ ތެރަޕީގެ ޚިދުމަތްތައް ހުއްޓާލުމަށް އެ ކްލިނިކްގެ ވެރިޔާ ފަޒީލާ އުސްމާނަށް އަންގާފައިވާ ކަމަށެވެ. އެއާ ޚިލާފަށް މަސައްކަތްކުރާނަމަ ޤާނޫނުގެ ދަށުން ފިޔަވަޅު އަޅާނެ ކަމުގެ އިންޒާރު އެވުޒާރާއިން ދީފައިވާކަމަށްވެސް ބުނެފައެވެ.

އަދި ފަޒީލާގެ ޙިޖާމާ ޚިދުމަތް ޕްރޮމޯޓް ކުރަން ސޯޝަލް މީޑިއާގައި ކޮށްފައިވާ އިޝްތިހާރުތަކަކީ އެވުޒަރާގެ ހުއްދަ ލިބިގެން ނޫނީ ކުރެވޭނެ ކަމަކަށް ނުވާތީ އެ އިޝްތިހާރުތައް ނެގުމަށް ވެސް އަންގާފައިވާއިރު މީސްމީޑިއާގައި އޭނާ އާއްމު ކުރާ ބަލި މީހުންގެ މެޑިކަލް ރިޕޯޓުތަކުގެ މައުލޫމާތަކީ އެންމެ ރައްކާތެރި އަދި ޞައްޙަ މަޢުލޫމާތުކަން ކަށަވަރު ނުވާތީ އެ ރިޕޯޓުތައް ނެގުމަށް ވެސް އެވުޒާރާއިން ވަނީ އަންގައިފައެވެ.