ވިޒިޓް މޯލްޑިވްސްގެ ގްލޯބަލް ބްރޭންޑް އެމްބެސެޑަރަކަށް ފެބްރީޒިއޯ ރޮމާނޯ

ރާއްޖޭގެ ޓުއަރިޒަމް ޕްރޮމޯޝަން ބްރޭންޑް، ވިޒިޓް މޯލްޑިވްސްގެ ގްލޯބަލް އެމްބެސެޑަރަކަށް، އިޓަލީގެ މަޝްހޫރު ފުޓުބޯޅަ ޖާނަލިސްޓް، ފެބްރީޒިއޯ ރޮމާނޯ ހަމަޖައްސައިފިއެވެ. މިކަން ހާމަކުރުމުގެ ގޮތުން ވިޒިޓް މޯލްޑިވްސްއިން ވަނީ ރޭ ދަންވަރު ވީޑިއޯއެއް ވެސް އާންމުކޮށްފައެވެ.

ފެބްރީޒިއޯއަކީ ފުޓުބޯޅަ ޚަބަރުތައް އެންމެ ތާޒާކޮށް ގެނެސްދިނުމުގައި ދުނިޔޭގެ އެންމެ މަޤުބޫލު ނޫސްވެރިޔާއެވެ. ޙާއްސަ ގޮތެއްގައި ފުޓުބޯޅަ ކުޅުންތެރިންގެ ޓްރާންސްފަރ އާއި ގުޅުންހުރި މައުލޫމާތުތަކާއި، ކުލަބުތަކާއި ގުޅުންހުރި މައުލޫމާތު ތަކުގައި ފެބްރީޒިއޯ އަކީ އެއްވަނައެވެ.

މީގެ އިތުރުން، ފެބްރީޒިއޯ ގެނެސްދޭ ކުޅިވަރު ޚަބަރުތަކުގެ ސައްޙަކަން ހާމަކޮށްދެނީ، ދުނިޔޭގެ ބޮޑެތި ކުޅިވަރު ނޫސް މަޖައްލާ ތަކުންވެސް، އެންމެ އިތުބާރު މަސްދަރުގެ ގޮތުގައި އޭނާ ބަލައިގަންނާތީއެވެ. 

ޙާއްސަކޮށް، "ހިއަރ ވީ ގޯ" ޖެހުމަށްފަހު ކުޅުންތެރިއެއްގެ ޓްރާންސްފަރއެއް ނުވަތަ އެހެންވެސް ފުޓުބޯޅަ އާއި ގުޅުންހުރި ޚަބަރެއް ފެބްރީޒިއޯ އާންމުންނާއި ޙިއްސާ ކޮށްފިނަމަ، ދެން އެކަމެއް އޭނާ ބުނާ ގޮތަށް ނުހިނގުމަކީ ވަރަށް ނާދިރުކަމެކެވެ. މިކަމުން ރަމްޒުކޮށްދެނީ ފުޓުބޯޅަ ކުޅުންތެރިންނާއި އަދި ޓީމުތަކާ އޭނާ އޮންނަ ގާތް ގުޅުމެވެ. 

🚨 Exciting news! We have partnered with football expert Fabrizio Romano as our new Global Brand Ambassador.

Get ready for an unforgettable journey to paradise with insider tips and updates! 🇲🇻 #VisitMaldives #FabrizioRomano #MaldivesAmbassador pic.twitter.com/fsknOAb7Gh

— Visit Maldives (@visitmaldives) March 7, 2025

ވިޒިޓް މޯލްޑިވްސްގެ ޕާޓްނަޝިޕް ވެސް އޭނާ އިއުލާންކުރީ "ހިއަރ ވީ ގޯ" އިންނެވެ. އެއަށްފަހު އޭނާ ބުނީ، ރާއްޖޭގެ ރީތިކަމަށް އޭނާ ހައިރާންވި ކަމަށާއި، "ރިޗާޖް" ކޮށްލަންދާން އެންމެ ރަގަޅު މަންޒިލަކީ ރާއްޖެކަމަށެވެ. އަދި ކުރިޔަށްއޮތް ދުވަސްތަކުގައި ރާއްޖޭގެ ގިނަ ވާހަކަތަކެއް ގެނެސްދޭނެކަމަށް ވެސް އޭނާ ވަނީ ހާމަކޮށްފައެވެ.

ފެބްރީޒިއޯގެ މަޤުބޫލުކަން އޭނާގެ ސޯޝަލް މީޑިއާ ޕްލެޓްފޯމްތަކުން ވެސް ހާމަވެއެވެ. އެގޮތުން އެ ޕްލެޓްފޯމްތަކުގައި އޭނާގެ ފޮލޯވަރުން ތިބި އަދަދު ޙިއްސާކޮށްލާނަމެވެ.

• އެކްސް: 23.5 މިލިއަން
• ޓިކްޓޮކް: 15.2 މިލިއަން
• ފޭސްބުކް: 22 މިލިއަން
• އިންސްޓަގްރާމް: 33.9 މިލިއަން

ފެބްރީޒިއޯ ވަނީ 2022ގައި އޮތް ކުޅިވަރު އެވޯޑް ހަފްލާ "މޯލްޑިވްސް ސްޕޯޓްސް އެވޯޑު" ގައި ވެސް ބައިވެރިވެފައެވެ.