ބައިލައްކަ ރުފިޔާ ފޭރުނު މީހެއްގެ ބަންދަށް 15 ދުވަސް ޖަހައިފި!

ބައިލައްކަ ރުފިޔާ ފޭރުނު މީހެއްގެ މައްޗަށް ކްރިމިނަލް ކޯޓުން 15 ދުވަހުގެ ބަންދުގެ މުއްދަތެއް ޖަހައިފިއެވެ. 

މިމައްސަލައަކީ މަގުމަތިން ދިޔަ ފިރިހެނެއް ގެސްޓު ހައުސްއަކަށް ގެންގޮސް ފޭރުނު މައްސަލައެކެވެ. 

މިކަންތައް ހިނގައިފައިވަނީ މިދިޔަ މަހުގެ 26 ވަނަ ދުވަހުގެ ރޭ 21:30 ހާއިރުއެވެ. މިކަން ހިނގައިފައިވާ ގޮތަކީ އައިޖީއެމްއެޗް ކައިރިން ދިވެހި ފިރިހެނަކަށް ގޮވައި ހުއްޓުވާ އޭނާއަށް ކޮޓަރިއަށް ދިއުމަށް ދައުވަތު ދިނުމަށްފަހު، މާފަންނު މުރަނގަ މަގުގައި ހުރި ގެސްޓްހައުސް އަކަށް ގެންގޮސް ދިވެހި ފިރިހެނަކު ބައިވެރިވެގެން، އެ މީހާ ރަހީނުކޮށްގެނެވެ. އަދި އެފިރިހެން މީހާގެ ފޯނާއި ކޭޝްކާޑު އަތުލައި އޭނާގެ އެކައުންޓުން 53،000 ރުފިޔާ ފޭރިގެނަފައިވެއެވެ. 

މިމައްސަލައިގައި ފުލުހުން ހައްޔަރުކޮށްފައިވަނީ ގއ. ކަނޑުހުޅުދޫ، ވިދާތަރި، އިކްލީލް އިބްރާހިމް (41އ) އާއި ސ. މަރަދޫ، ކުންނާރުގެ، އައިޝަތު މަލްޖާ މޫސާ ދީދީ (27އ) އެވެ.

އިކްލީލް އިބްރާހީމް ހައްޔަރުކޮށް އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އޭނާގެ ބަންދަށް ފުރަތަމަ ދީފައިވަނީ 15 ދުވަހެވެ. މިމުއްދަތު ހަމަވާތީ އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ދެވަނަ ފަހަރުވެސް ބަންދަށް ދިނީ 15 ދުވަހެވެ.

މިމައްސަލާގައި ޝާމިލްވާ އަންހެން މީހާވެސް އަދިވެސް ހުރީ ފުލުހުންގެ ބެލުމުގެ ދަށުގައެވެ.