ކުޅިވަރު
މެޗު ފަށަން ކުޑަތަންވެފައި ވަނިކޮށް ޓީމު ޓޮކްޓަރ މަރުވުމުން ބާސެލޯނާގެ މެޗު ފަސްކޮށްފި

ބާސެލޯނާ ސްޓޭޑިއަމް---
ސްޕެނިޝް ލަ ލީގާގައި ބާސެލޯނާ އާއި އޮސަސޫނާ ބައްދަލުކުރަން ހަމަޖެހިފައި އޮތް މެޗު ފެށެން ކުޑަތަންވެފައި ވަނިކޮށް ބާސެލޯނާގެ ޓީމު ޓޮކްޓަރ، ކާލްސް މިނާރޯ ގާސިއާ މަރުވުމާ ގުޅިގެން އެ މެޗު ފަސްކޮށްފިއެވެ.
ރާއްޖެ ގަޑިން ރޭ މެންދަމު 1 ޖަހާއިރު ފަށަން ހަމަޖެހިފައި އޮތް މި މެޗު ފަސްކުރީ މެޗު ފެށެން 20 މިނެޓަށްވެފައި ވަނިކޮށެވެ. އޭރު ބާސެލޯނާގެ ސްޓޭޑިއަމަށް އޮތީ ސަޕޯޓަރުން ވަދެ ފުރާލާފައެވެ.
މި ހާދިސާއާ ގުޅިގެން އެ ކްލަބުގެ ރައީސް، ޖޯން ލަޕޯޓާ ނެރުނު ސްޓޭޓްމެންޓެއްގައި ބުނީ، އެ ކްލަބުގެ ފުރަތަމަ ޓީމުގެ ޑޮކްޓަރ، ކާލްސް މިނާރޯ ގާސިއާ މަރުވެފައިވާކަން ހިތާމައާއެކު އިޢުލާންކުރާކަމަށާއި، މި ހާދިސާއާ ގުޅިގެން ބާސެލޯނާ އާއި އޮސަސޫނާ ބައްދަލުކުރަން ހަމަޖެހިފައިއޮތް މެޗު ފަހުގެ ތާރީޙަކަށް ބަދަލުކޮށްފައިވާ ކަމަށެވެ. އަދި ޓީމުގެ ހުރިހާ ބޯޑު މެންބަރުންނާއި މުވައްޒަފުންގެ ނަމުގައި ގާސިއާގެ އާއިލާއަށް ތައުޒިޔާ ފޮނުވާފައިވެއެވެ.
އަދި އެންމެންގެ ހިތުގައި އަބަދުވެސް ގާސިއާއަށް ލޯބި އޮތް ކަމަށާއި، ބާސެލޯނާގެ ހުރިހާ މެޗެއްގައި ޓީމާއެކު ދަތުރުކޮށް، ޓީމުގެ ކުޅުންތެރިންނާއި ކޯޗިން ސްޓާފުންގެ މެޑިކަލް ހުރިހާކަމެއް ވެސް ވަރަށް ކައިރިން އޭނާ ބަލާފައިވާކަމަށް ލަޕޯޓާ ބުނެފައިވެއެވެ.
ރޭގެ މެޗަށް ބާސެލޯނާ ނިކުންނަން ތައްޔާރުވީ، އެ ޓީމުގެ ލީގުގެ އެއްވަނައިގައި ނަގާފައިވާ އެއް ޕޮއިންޓުގެ ލީޑު ފުޅާކުރުމަށެވެ.