މިރޭގެ އިޙްޔާ ފޯރަމް މާލޭގައި، ތަޤުރީރު ކުރައްވާނީ އައްޝައިޚް އަޙްމަދު ސަމީރު

މި އަހަރުގެ ރަމަޟާން މަހުގެ ރޭތައް އިޙްޔާ ކުރުމަށް ބާއްވާ އިޙްޔާ ފޯރަމް ސިލްސިލާގެ ތިންވަނަ ފޯރަމް މިރޭ ބޭއްވުމަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރައިން ވިދާޅެވެއްޖެ އެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އިޙްޔާ ފޯރަމް ސިލްސިލާގެ ތިންވަނަ ފޯރަމް އޮންނާނީ މިރޭ އިސްލާމީ މަރުކަޒުގެ ޖަލްސާ ކުރާ މާލަމުގައި ކަމަށެވެ.

މިރޭގެ ފޯރަމްގައި ތަޤުރީރު ކުރައްވާނީ ރާއްޖޭގެ މަޝްހޫރު ޢިލްމުވެރިޔާ އައްޝައިޚް އަޙްމަދު ސަމީރުއެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އިޙްޔާ ފޯރަމް ފެށުމަށް ހަމަޖެހިފައިވަނީ މިރޭ 21:30 ގައި ކަމަށެވެ. އަދި މިރޭގެ ފޯރަމްގައި ތަޤުރީރު  ކުރައްވާނީ "އިސްލާމްދީނުގެ މަތީގައި ޘާބިތުވާށެވެ" މި މަޢުޟޫގެ މައްޗަށް ކަމަށް އެ ވުޒާރާއިން މަޢުލޫމާތުދެއެވެ.

ފާއިތުވި އަހަރުތަކެކޭ އެއްގޮތަށް މިއަހަރު ވެސް  އިޙްޔާ ފޯރަމްއަށް ވަޑައިގަންނަވާ ބޭފުޅުންގެ ތެރެއިން ގުރުއަތުން ހޮވޭ ބޭފުޅުންނަށް ހާއްސަ އިނާމުތަކެއް ދިނުމަށް ވަނީ ހަމަޖެހިފައެވެ. އެގޮތުން، 1 ވަނައަށް ދާ ފަރާތަކަށް ބީއެމްއެލް އިސްލާމިކް އިން ވަނީ 1500 ރުފިޔާގެ ގިފްޓު ކާޑެއް ހުށައަޅައިފައެވެ. އަދި ދެވަނައަށް ދާ ފަރާތަކަށް ބީއެމްއެލް އިސްލާމިކް އިން 1000 ރުފިޔާގެ ގިފްޓު ކާޑެއް ދިނުމަށް ހަމަޖެހިފައިވާއިރު، ތިންވަނައަށް ދާ ފަރާތަކަށް ހުށައަޅާފައިވަނީ 700 ރުފިޔާގެ ގިފްޓު ކާޑެކެވެ. އަދި 4 ވަނައަށް ދާ ފަރާތަކަށް ވަނީ 500 ރުފިޔާގެ ގިފްޓު ކާޑެއް ހުށައަޅައިފައެވެ. މީގެ އިތުރުން، އިސްލާމީ ކަންތައްތަކާ ބެހޭ ވުޒާރާއިން ވަނީ އިނާމެއްގެ ގޮތުގައި ރިޔާޟުއްޞާލިޙީން އަދި ފިޤުޙުއްސުންނާ ދިނުމަށް ހަމަޖެހިފައެވެ.

މިއަހަރުގެ ރަމަޟާން މަހު މާލޭގައި 8 އިޙްޔާ ފޯރަމް ބޭއްވުމަށް ވަނީ ހަމަޖެހިފަ އެވެ. މީގެ އިތުރުން، އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިޔުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ނިންމަވާފަ އެވެ. އަދި 6 ސްކޫލަކާއި އެކު ދަރިވަރުންގެ އިޙްޔާ ފޯރަމެއް ވެސް މި ރަމަޟާން މަހު އޮންނާނެ ކަމަށް އެ ވުޒާރާއިން ވިދާޅުވެއެވެ.