ލީގުގެ އެއްވަނައިގައި ލިވަޕޫލަށް 16 ޕޮއިންޓުގެ ލީޑެއް

އިންގްލިޝް ޕްރިމިއަރ ލީގުގައި ރޭ ފަހަތުން އަރާ ސައުތެމްޕްޓަން 3-1 އިން ބަލިކުރުމަށްފަހު ލިވަޕޫލުން 16 ޕޮއިންޓުގެ ލީޑެއް ނަގައިފިއެވެ. 

އާރނޭ ސްލޮޓްގެ ލިވަޕޫލަށް މިހާތަނަށް ލީގުގައި ކުޅެފައިވާ 29 މެޗުން 70 ޕޮއިންޓު ލިބިފައިވާއިރު، ދެވަނައިގައި އޮތް އާސެނަލްއަށް ލިބިފައިވަނީ 54 ޕޮއިންޓެވެ. ނަމަވެސް އާސެނަލްއަށް ދެ މެޗުގެ އެޑްވަންޓޭޖެއް އެބައޮތެވެ. އޭގެ ތެރެއިން ފުރަތަމަ މެޗުގައި މިރޭ އާސެނަލް ބައްދަލުކުރާނީ މެންޗެސްޓަރ ޔުނައިޓެޑާއެވެ.

ލިވަޕޫލްގެ ޑިފެންޑަރ، ވާރޖިލް ވެން ޑައިކް އާއި ގޯލް ކީޕަރު، އެލިސަން ބެކާގެ މިސްކޮމިއުނިކޭޝަނަކާ ގުޅިގެން ސާފު ނުކޮށްލެވުނު ބޯޅައެއްގެ ބޭނުން ހިފައި، ސައުތެމްޕްޓަންގެ ސްމޯލްބޯން އެ ޓީމަށް ލީޑު ނަގައިދިނީ ފުރަތަމަ ހާފުގެ އިތުރު ވަގުތުގައެވެ. 

އެ ވަގުތު، ދެ މެޗަށް ސަސްޕެންޑުކޮށްފައި ހުރި ސްލޮޓު ފްރަސްޓްރޭޓުވެގެން ރިއެކްޓުކުރި ގޮތް ކެމެރާތަކަށް އަރާފައިވެއެވެ. ސަސްޕެންޝަންގެ ސަބަބުން ސްލޮޓު އިންނަން ޖެހުނީ މެޗު ބަލާށެވެ. 

ނަމަވެސް ދެވަނަ ހާފުގައި ކުޅުން ރަގަޅުކޮށް ލިވަޕޫލުން ވަނީ 51 ވަނަ މިނެޓުގައި މެޗުގެ ނަތީޖާ ހަމަހަމަކޮށްފައެވެ. ވާތް ފަރާތުން ޕެނަލްޓީ އޭރިއާގެ ތެރެއަށް ވަނުމަށްފަހު ލުއިޒް ދިއާޒް ގޯލު ކުރިމައްޗަށް ހުރަސްކޮށްލި ބޯޅަ ގޯލުގެ ތެރެއަށް ފޮނުވާލީ ޑާވިން ނުނޭޒްއެވެ.

ލިވަޕޫލުން ލީޑު ނެގީ އޭގެ ތިން މިނެޓުފަހުން، ނުނޭޒްއަށްކުރި ފައުލަކަށް ލިބުނު ޕެނަލްޓީއަކުން މުޙައްމަދު ސަލާހެވެ. އަދި އޭނާ ވަނީ، އިތުރު ޕެނަލްޓީއަކުން، މެޗު ނިމެން ދެ މިނެޓަށްވެފައި ވަނިކޮށް ލިވަޕޫލްގެ ލީޑު ފުޅާކޮށްދީފައެވެ. އެއީ ސައުތެމްޕްޓަންގެ ކުޅުންތެރިއެއްގެ އަތުގައި ޕެނަލްޓީ އޭރިއާގެ ތެރެއިން ޖެހުމުން، ވީޑިއޯ އެސިސްޓެންޓް ރެފްރީ ޕެނަލްޓީއެއްކަމަށް ކަނޑައެޅި ބޯޅައެކެވެ. 

މި ދެ ގޯލާއެކު ސަލާޙް މިވަނީ ސީޒަނުގައި މި ސީޒަނުގައި މިހާތަނަށް 32 ގޯލު ކާމިޔާބުކޮށްފައެވެ. އަދި އެއީ ލީގުގައި އޭނާ ކާމިޔާބުކުރި 26 އަދި 27 ވަނަ ގޯލު ވެސް މެއެވެ.

މެޗަށްފަހު ވާހަކަ ދައްކަމުން ސައުތެމްޕްޓަންގެ ކޯޗު އިވާން ޖުރިކް ބުނީ، ފުރަތަމަ ޕެނަލްޓީ އޭނާ ޤަބޫލުނުކުރާ ކަމަށާއި، އެއީ މެޗު އެނބުރުމަށް ދިމާވި ސަބަބު ކަމަށެވެ.